निजीक्षेत्रको मनोबल नबढाई अर्थतन्त्रमा सुधार कठिन छः पुन

A+ A A-

नेकपा माओवादी केन्द्रका उपमहासचिव वर्षमान पुन अनन्तले मुलुको आर्थिक अवस्था सुधारका लागि विशेष पहल गर्न सरकारसँग माग गरेका छन् ।

प्रतिनिसभामा बिहीबार विशेष समयमा बोल्दै पुनले आर्थिक मन्दीको अवस्था अनत्यका लागि विज्ञसहित सम्बद्ध क्षेत्रको सुझाव लिएर सरकारले तत्काल प्रभावकारी कदम चाल्नुपर्नेमा जोड दिए ।

व्यवसायीहरूमा व्याप्त असुरक्षाका कारण बजारमा माग नहुँदा बैंकहरूमा रकम थुप्रिएर बसेको उनको भनाइ थियो । पूर्वअर्थमन्त्रीसमेत रहेका पुनले सरकारले निजीक्षेत्रको मनोबल उठाउने गरी काम गर्नुपर्ने बताए ।

‘पछिल्लो समय आर्थिक मन्दीको अवस्था छ । मन्त्रिपरिषद् र अर्थ मन्त्रालयले त्यसबारे बोल्नुपर्छ । बाह्य क्षेत्र राम्रै रहे पनि आन्तरिक रूपमा अर्थतन्त्र चलायमान हुन सकेको छैन,’ पुनले भने, ‘सरकारले निजीक्षेत्रको मनोबल उठाउने काम गर्नुपर्छ । निजीक्षेत्रसहित सरोकारवाला सबैको सुझाव लिएर लगानीकर्तामा रहेको डर हटाउन सरकारले पहल गर्नुपर्छ ।’

उनले दसैँ, तिहार र छठजस्ता प्रमुख चाडपर्व नजिकिए पनि विगतका वर्षहरूमा जस्तो आयात नहुनुको कारण खोज्न सरकारलाई आग्रह गरे । शेयरबजार र घरजग्गाको कारोबारमा सुस्तता आएको, साना लगानीकर्ता टाट पल्टिएको र ठूला लगानीकर्ता पनि समस्यामा परेको उनको भनाइ थियो । चाडपर्वमा कालो बजारी र अभाव रोक्न र सहज रूपमा उपभोग्य सामान पाउने अवस्था बनाउन सरकारको ध्यानाकर्षण गराए ।

उनले गैरआवासीय नेपालीले विदेशमा आर्जन गरेको सीप र धन नेपालको विकासमा लगाउन नीतिहरूमा आवश्यक लचकता अपनाउन जरुरी रहेकोमा जोड दिए । संविधानको व्यवस्थाअनुसार हालै जारी भएको नागरिकता विधेयकले गैरआवासीय नागरिकताको व्यवस्था गरेको भए पनि व्यावहारिक जटिलता देखिएकाले त्यसमा सरकारको ध्यान जानुपर्ने उल्लेख गरे ।

‘एकपटकको नेपाली सधैँको नेपाली’ भन्ने मान्यताअन्तर्गत राजनीतिकबाहेक आर्थिक, सामाजिक र सांस्कृतिक अधिकारसहितको गैरआवासीय नागरिकताको व्यवस्थाले संसारभर छरिएका नेपालीलाई नेपालमा लगानीको वातावरण बनाएको बताए । ‘गैरआवासीय नेपालीले नेपालमा लगानी गरिहेका छन् । थप लगानी गर्न चाहेका छन्,’ उनले भने, ‘अमेरिकासहित केही देश र नेपालको करसम्बन्धी व्यवस्थामा मेल नखाएका कारण दोहोरो कर तिर्नुपर्ने अवस्था छ,’ पुनले भने, ‘ती देशसँग दोहोरो कर अन्त्यसम्बन्धी सम्झौताका लागि म सरकारको ध्यानाकर्षण गराउन चाहन्छु ।’

इजरायलमा प्यालेस्टिनी हमास समूहको आक्रमणमा परी १० नेपालीको मृत्यु भएकोमा उनले आफू र आफ्नो दलको तर्फबाट दुःख व्यक्त गरे । सरकारले घटनालगत्तै राष्ट्रिय शोक घोषणा गरेको, सर्वदलीय बैठक बोलाएर संकटको घडीमा सबै रानजीतिक दल र सिंगो मुलुक एक ढिक्का रहेको सन्देश दिएकोमा प्रधानमन्त्री पुष्पकमल दाहाल प्रचण्डलाई धन्यवाद दिए ।

सरकारले युद्धग्रस्त क्षेत्रमा फसेका नेपालीलाई सुरक्षित स्थानमा स्थानान्तरण गराइसकेको र नेपाल ल्याउन परराष्ट्रमन्त्री एनपी साउदलाई इजरायल पठाएको भन्दै सरकारले प्रशंसा गरे । ‘सम्मानीय प्रधानमन्त्रीले सर्वदलीय बैठक आह्वान गर्नुभयो । दुःखको यो अवस्थामा सरकारलाई सहयोग गर्ने र सरकासँग सबै दल र राष्ट्र नै सँगै उभिएको अवस्था छ । यो सकारात्मक पक्ष हो,’ उनले भने ।

इजरायलमा रहेका नेपालीको सुरक्षा र इच्छुकहरूको नेपाल फिर्ती सहज बनाउन पुनले माग गरे । संसारकै सबैभन्दा बलियो हवाई सुरक्षा तथा बलियो सेना र प्रभावकारी गुप्तचरी भएको इजरायलमा भएको आक्रमणलाई सामान्य रूपमा लिन नहुने उनले बताए । युद्धको अवस्थामा रहेको देशमा भएका नागरिकको सुरक्षा गर्नु र सुरक्षित देश फिर्तीको वातावरण बनाउनु चुनौतीपूर्ण भए पनि सरकारले आफ्नो दक्षता प्रदर्शन गरेकोमा धन्यवाद दिए ।

प्रकाशित मिति: बिहीबार, असोज २५, २०८० १७:०६