हट्यो यातायात व्यवस्था कार्यालय एकान्तकुनाको भिड, आजदेखि अनलाइन सेवा सुरु

A+ A A-

सर्वाधिक भिड हुने यातायात व्यवस्था कार्यालय एकान्तकुनाले बिहीबारदेखि अनलाइन सेवा सुरु गरेको छ । अनलाइन सेवा सुरु भएपछि सर्वाधिक भिड हुने ललितपुरको एकान्तकुनामा सेवाग्राहीको भिड अहिले हटेको छ ।

भौतिक पूर्वाधार तथा यातायातमन्त्री प्रकाश ज्वाला र बागमती प्रदेशका श्रम, रोजगार तथा यातायातमन्त्री लक्ष्मण लम्सालले बिहीबार एकान्तकुना यातायात व्यवस्था कार्यालयमा अनलाइन सेवा सुरु गरेका हुन् ।

दैनिक हजारौँ सेवाग्राही एकान्तकुना कार्यालयमा बिहानैदेखि लाइन बस्ने गरेका थिए । ‘आजदेखि त्यो लाइन पूर्ण रूपमा हट्नेछ’, मन्त्री ज्वालाले भने, ‘दैनिक हजारौँ सेवाग्राहीले पाउँदै आएको सास्ती आजदेखि हटेको छ ।’

नयाँ सवारीचालक अनुमतिपत्रको आवेदन गर्न यसअघि नै अनलाइन सेवा सञ्चालनमा थियो । तर, बिहीबारदेखि राजस्व भुक्तानी, लाइसेन्स नवीकरण र वर्ग थप पनि अनलाइनबाटै हुने भएको छ । ‘सवारीचालक अनुमतिपत्रका लागि अब तीनपटक मात्र यातायात व्यवस्था कार्यालयमा जानुपर्नेछ,’ प्रदेशका यातायातमन्त्री लम्सालले भने, ‘यसअघि एउटै लाइसेन्सका लागि नौपटकसम्म यातायात व्यवस्था कार्यालयमा धाउनुपर्ने बाध्यता थियो ।’

सवारीचालक अनुमतिपत्रका लागि अबदेखि लिखित परीक्षा, ट्रायल परीक्षा र बायोमेट्रिक गर्न तीनपटक मात्र यातायात व्यवस्था कार्यालय जानुपर्नेछ । अन्य सबै कामहरू घरबाटै अनलाइन सेवामार्फत गर्न सकिने यातायात व्यवस्था विभागका महानिर्देशक उद्धव रिजालले बताए ।

भौतिक पूर्वाधार तथा यातायातमन्त्री ज्वालाले मन्त्रीको शपथ लिएलगतै यातायात कार्यालयहरूमा लाग्ने भिड हटाउने प्रतिबद्धता गरेका थिए । प्रतिबद्धताअनुसार २० असारदेखि कास्की यातायात व्यवस्था कार्यालयबाट अनलाइन सेवा सुरु गरिएको थियो । कास्कीमा सफल भएपछि सर्वाधिक भिड हुने एकान्तकुनाबाट आजदेखि अनलाइन सेवा सुरु गरिएको छ ।

‘अबको केही दिनभित्र मधेश र लुम्बिनी प्रदेशका यातायात व्यवस्था कार्यालयमा पनि अनलाइन सेवा सुरु गर्छाैं,’ मन्त्री ज्वालाले भने । उनका अनुसार अब यातायात व्यवस्था कार्यालयको भिड हटाउने र बिचौलियाहरूको अन्त्य गर्न देशका सबै यातायात व्यवस्था कार्यालयहरूमा अनलाइन सिस्टम लागू गरिनेछ ।

प्रकाशित मिति: बिहीबार, असोज २५, २०८० १६:३५