कर्णालीमा प्रहरीले सुरु गरेकाे ‘लालटिन’ अभियान के हाे ?

A+ A A-

कर्णालीमा नेपाल प्रहरीले लागुऔषधविरुद्ध लालटिन अभियानको शुभारम्भ गरेको छ । बिहीबार रक्षामन्त्री पूर्णबहादुर खड्काले लालटिन बालेर अभियानको शुभारम्भ गरेका हुन् ।

अभियानको शुभारम्भ गर्दै खड्काले सबैको साझा संकल्प र प्रयत्नबाट मात्रै लागुऔषध नियन्त्रण गर्न सकिने बताए । उनले भने, ‘घर, समाज र राष्ट्रलाई लागुऔषधमुक्त बनाउन सबैले संकल्प गर्नु आवश्यक छ । नाकामा हुने लागुऔषध ओसार–पसार नियन्त्रणका लागि तीन तहकै सरकार र सामाजिक संघ–संस्थाको महत्त्वपूर्ण भूमिका हुनेछ,’ खड्काले भने, ‘सीमाबाट हुने लागुऔषध नियन्त्रणका लागि संघ, प्रदेश र स्थानीय तहका साथै नागरिक समाज, सामाजिक संस्था र समुदायको महत्त्वपूर्ण भूमिका रहन्छ ।’

के हो लालटिन अभियान ?

सुरक्षित कर्णाली विशेष अभियान, २०८० कार्यक्रमअन्तर्गत सञ्चालित लालटिन अभियानले कर्णाली प्रदेशमा लागुऔषध कारोबारी र प्रयोगकर्ताको खोजी गर्ने कर्णाली प्रदेश प्रहरी कार्यालय सुर्खेतका प्रमुख प्रहरी नायब महानिरीक्षक भीमप्रसाद ढकालले बताए ।

‘जसरी लालटिनको प्रकाशले वरिपरिका खराब एवं विषाक्त तत्त्वहरू नष्ट गर्दै उज्यालो छर्छ, त्यसैगरी यस अभियानले लागुऔषधको कारोबारबाट समाजलाई विषाक्त बनाउने तत्त्वहरूलाई नष्ट गर्नेछ,’ ढकालले भने, ‘जसरी अँध्यारोमा बाटो बिराएका हामीलाई लालटिनको उज्यालोले सही बाटो पहिल्याउन मद्दत गर्छ, त्यसरी नै अज्ञानतावश जीवनको बाटो बिराएर लागुऔषध दुर्व्यसनीमा फसेका व्यक्तिहरूलाई यस अभियानद्वारा सचेतना फैलाई सही मार्गमा डोर्‍याउन मद्दत पुग्नेछ ।’

कर्णालीमा दिनानुदिन विकराल बन्दै गएको लागुऔषध सेवन र कारोबारको जालोले समाजमा युवा वर्गलाई शारीरिक र मानसिक रूपमै विकृत तुल्याएर देशको विकास र समृद्धिका लागि परिचालित हुनुपर्ने ऊर्जाशक्ति कमजोर बनाउँदै लगेको आभास हुन थालेपछि अभियानको थालनी गरिएको ढकालले बताए ।

अभियानको सफल कार्यान्वयनका लागि विशेष कार्ययोजना बनाइएको उनको भनाइ छ । जसअन्तर्गत चारवटा रणनीति, १७ वटा कार्यनीति र ६६ वटा क्रियाकलापहरू तय गरिएका छन् । प्रत्येक रणनीति, कार्यनीति र क्रियाकलाप कार्यान्वयन गर्न जिम्मेवार निकाय, सहयोगी निकाय, समय सीमा, अपेक्षित उपलब्धि र कार्यान्वयनका लागि आवश्यक स्रोत साधनसमेत उल्लेख गरिएको ढकालले बताए ।

कर्णालीमा लागुऔधको अवस्था

कर्णाली प्रदेशमा विगत तीन आर्थिक वर्षको तथ्याङ्क विश्लेषण गर्दा आर्थिक २०७७/०७८ मा ७०, ०७८/०७९ मा ९५, २०७९/०८० मा १ सय १४ वटा लागुऔषध सम्बन्धि मुद्दा दर्ता भएको देखिन्छ ।

यी मुद्दामा क्रमश: १ सय ३३, १ सय ७२ र २ सय १५ जना पक्राउ परी कानुनी दायरामा पुगेका छन् । लागुऔषधमा लागेको उमेर समूह हेर्दा सबैभन्दा धेरै १६ देखि २६ वर्षभित्रका युवाहरू रहेको प्रहरीको तथ्यांक छ ।

यस्तै, विगत वर्षहरूलाई हेर्दा कर्णालीमा १ हजार ७ सय ६८ जना पुरुष र ४३ महिला लागुऔषध प्रयोगकर्ता रहेका छन् । उक्त सङ्ख्यामा क्रमश: वृद्धि हुँदै गएको तथ्यांकले देखाउँछ । पक्राउ परेका उनीहरूको साथबाट प्रहरीले गाँजा, चरेस, अफिम, हेरोइन, ब्राउन सुगर, ट्याबलेट, कोनिन, कोरेक्सलगायतका लागुऔषधहरू बरामदसमेत गरेको छ ।

कर्णाली प्रदेशमा विशेष गरी सुर्खेतको वीरेन्द्रनगर र भेरीगंगा, दैलेखको नारायणणी र दुल्लु, सल्यानको शारदानगर, जाजरकोटको भेरी, रूकुमको मुसिकोट र चौरजहारी, कालीकोटको खाँडाचक्र र तिलागुफा, जुम्लाको चन्दनाथ, मुगुको छायाँनाथ रारा नगरपालिकाहरूमा लागुऔषध कारोबार र प्रयोगकर्ता बढी रहेको प्रहरीको तथ्यांकमा उल्लेख छ ।

प्रकाशित मिति: बिहीबार, असोज २५, २०८० १३:४२