एमालेको मधेश अधिवेशनः रघुवीर भर्सेस सुमन–सरोज गुटको चर्को प्रतिस्पर्धा, आधा दर्जन नेता आकांक्षी

एमालेको मधेश अधिवेशनः रघुवीर भर्सेस सुमन–सरोज गुटको चर्को प्रतिस्पर्धा, आधा दर्जन नेता आकांक्षी

A+ A A-

मधेश प्रदेश अधिवेशनमा एमालेका सचिव रघुवीर महासेठ भर्सेस पोलिटब्युरो सदस्य सुमन प्याकुरेल, सरोज यादव समूहको प्रतिस्पर्धा हुने देखिएको छ । सचिव महासेठको विकल्पमा प्याकुरेल र यादवले समूहबन्दी प्रतिस्पर्धाको प्रयास गरिरहेका छन् । हुनलाई केही समयअघि प्याकुरेल, पुरुषोत्तम पौडेल प्रदेश अध्यक्ष हुने चर्चा पनि भएको थियो ।

उनीहरूले अनौपचारिक रूपमा तयारी पनि गरेका थिए । तर, पार्टीले पोलिटब्युरो सदस्यलाई उम्मेदवार हुन रोकेपछि परिस्थिति फरक बनेको हो । त्यसपछि चर्को समूहबन्दी हुने अवस्था देखिएको हो । विगतमा मधेशमा महासेठ भर्सेज रामचन्द्र झाको समूह बन्ने गरेको थियो । झाले एमाले छोडेपछि महासेठ हावी हुन थालेका थिए ।

त्यसमाथि दशौँ महाधिवेशनमा सचिव भएपछि महासेठ समूहबन्दीलाई थप बलियो बनाउने प्रयासमा लागेका छन् । मधेशको एमाले राजनीति जहिले पनि दुई धारमा देखिने क्रममा महासेठको विपरीत धारमा प्याकुरेल र यादव उभिएका हुन् । त्यही कारण अहिले एकअर्कोले अध्यक्षको उम्मेदवार तयार गरिरहेका छन् ।

दुवै समूहका लागेर आधा दर्जन एमाले नेताहरू अध्यक्षको दौडमा रहेका छन् । उनीहरू अध्यक्षको आकांक्षासहित नेतृत्वसँग लविङ बढाइरहेका छन् ।

यद्यपि, नेताहरूले औपचारिक रूपमा उम्मेदवारी घोषणा भने गरिसकेका छैनन् । एमाले स्रोतका अनुसार राजकिशोर यादव, लक्ष्मीनारायण यादव, राजनारायण यादव, चन्देश्वर मण्डल, विचारी यादवसहितका नेताहरूले आफ्नो पक्षमा माहौल बनाउन सक्रिय देखिएका छन् ।

स्रोतका अनुसार राजकिशोर यादव अहिलेसम्म केन्द्रीय नेताको पर्खाइमा छन् भने लक्ष्मीनारायण यादव र चन्देश्वर मण्डललाई एमालेका मधेश प्रदेशका संसदीय दलका नेता सरोज यादव र नेता सुमन प्याकुरेलको समूहले अघि सारेको छ । यद्यपि, लक्ष्मीनारायण यादवलाई उम्मेदवार हुने योग्यता नपुग्ने भन्दै एमालेभित्रै प्रश्न पनि उठिरहेको छ ।

पार्टीका सचिव तथा कोशी प्रदेशका इन्चार्ज महासेठको सहयोगमा राजनारायण साह र विचारी यादव अघि सरेका छन् । त्यसो त, मण्डलले एमाले नेता लीलानाथ श्रेष्ठको समूहबाट उम्मेदवार हुने चर्चा पनि छ । प्रदेश अध्यक्षमा आधी दर्जन अकांक्षी देखिए पनि मुख्य प्रतिस्पर्धा भने दलका नेता सरोज यादव समूहका लक्ष्मीनारयण यादव र महासेठ समूहका राजनारायण साहबीच हुने एक थरी एमाले नेताहरूको भनाइ छ ।

अर्कोथरी नेताहरूले भने महासेठ समूहबाट विचारी यादव र प्याकुरेल–यादव समूहबाट चन्देश्वर मण्डल उम्मेदवार हुने पनि तर्क गरिरहेका छन् ।

यद्यपि, मधेशमा पछिल्लो समय महासेठको समूह बलियो बन्दै गएका कारण उम्मेदवारहरू अन्तिममा फेरबदल हुन सक्ने पनि बताइन्छ । तर, लामो समयदेखि पार्टीका लागेका राजकिशोर यादव कुनै केन्द्रीय नेताको आशीर्वाद पाए चुनाव आफ्नो पक्षमा पार्ने खेलमा पनि लागेका छन् । मधेशको राजनीतिमा प्याकुरेल–यादव समूह र महसेठ समूहको बीचमा प्रदेश उपाध्यक्ष रेवत पन्त पनि अध्यक्षको दाबीमा थिए । दुई समूहको प्रतिस्पर्धामा सर्वसम्मतको प्रयासमा पन्तले बाजी मार्ने सम्भावना हुन्थ्यो ।

तर, उनी झलनाथ खनाल स्वास्थ्य विज्ञान प्रतिष्ठानको अध्यक्षको हैसियतमा काम गर्दा आर्थिक अनियमितता गरेको आरोपमा भर्खरै अख्तियार दुरुपयोग अनुसन्धान आयोगले विशेष अदालतमा मुद्दा दायर गरेपछि ब्याक हुन पुगे ।

त्यसो त, अहिलेसम्म एमाले अध्यक्ष केपी ओली र इञ्चार्ज योगेश भट्टराईले कुनै नेतालाई संकेत गरिसकेका छैनन् । अन्य प्रदेशमा ओलीको उम्मेदवार भनेर पहिला नै संकेत बुुझिने भए पनि अहिलेसम्म मधेश प्रदेशमा भने संकेत नपाएको एक प्रदेश नेताले बताए ।

उद्घाटनसत्र सम्पन्न भएर आजै साँझदेखि बन्दसत्र भइरहेको छ । बन्दसत्रमा केन्द्रीय नेताहरूले प्रदेश नेतृत्वको लागि सर्वसहमतिको प्रयास गराउने र सर्वसहमति नभए मात्रै चुनावी प्रक्रियाबाट नेतृत्वको चयन हुने नेकपा एमालेका मधेश प्रदेशका संसदीय दलका नेता सरोज यादवले जानकारी दिए ।

प्रकाशित मिति: बुधबार, असोज २४, २०८० २२:०७