बाक्लो भेटघाटमा वर्षमान र विष्णु, एमाले-माओवादी नजिक हुन थालेका हुन् ?

A+ A A-

माओवादी केन्द्रका उपमहासचिव वर्षमान पुनले सरकारमाथि अनेक बहानामा आक्रमण गरी मुलुकमा अस्थिरता निम्त्याउने प्रयास भइरहेको तर जिम्मेवारपूर्ण पहलका कारण ती प्रयास असफल भएको दाबी गरेका छन् ।

अनेरास्ववियु (क्रान्तिकारी)को बैठकलाई सम्बोधन गर्दै बुधबार पुनले भने, ‘इराक युद्धमा जस्तै इजरायल युद्धलाई बहाना बनाएर घेराबन्दी गर्ने र अस्थिरता निम्त्याउने प्रयास भएको थियो । सरकारले जिम्मेवारीपूर्ण पहलका कारण ती सबै असफल भएका छन् ।’

सत्ता गठबन्धनका दलहरुबीच खटपट संकेत गर्नेगरी २० असोजमा उनले एमालेसँग फेरि पनि सहकार्य वा पार्टी एकताको सम्भावना औल्याएका थिए । त्यसले सत्ता गठबन्धनभित्रै सरकार ढाल्ने चलखेल भइरहेको संकेत मात्र गरेन् माओवादी केन्द्रले पुनमार्फत ‘एमाले कार्ड’ फ्याँकेको चर्चा राजनीतिक बजारमा व्यापक भयो । एमाले उपाध्यक्ष विष्णु पौडेललाई भेटेर निस्केसँगै पुनले सो अभिव्यक्ति दिएका थिए । त्यसले धेरै शंका उपशंका गर्ने ठाउँ दिएको छ ।

पुननिकट स्रोतका अनुसार, एमाले उपाध्यक्षसँग उनको भेटघाट उसैगरी बाक्लिएको छ, जसरी पुसको पहिलो साता थियो । १० पुसमा एमाले–माओवादी नयाँ समीकरणबाट पुष्पकमल दाहाल प्रचण्डलाई प्रधानमन्त्री बनाउन पुन बालकोट धाएका थिए । ‘एमालेमा पौडेल र माओवादीमा पुन समुह अहिले पनि कम्युनिष्ट मिलेर सरकार बनाउनु पर्ने मतमा छन् । कांग्रेस नेताहरुले सरकार छाड्ने अभिव्यक्ति दिइरहेका बेला भएका भेटघाटले त्यो सम्भावना निम्त्याउन पनि सक्छ’ स्रोतले भन्यो ।

त्यसो त, एमाले र माओवादी केन्द्रका नेताहरु अहिले पनि एकअर्काविरुद्ध सार्वजनिक मञ्चहरुबाट बोलिरहेकै छन् । तर, दुई पार्टीलाई नजिक्याउन पौडेल, पुन लगायतका केही नेताहरु भने संवादमा छन् । अहिले बाक्लिएका गोप्य भेटघाटको अन्र्तय पनि त्यही देखिन्छ ।

केहि दिनअघि पुन र पौडेल बुढानिलकण्ठको एक घरमा लामो भेटघाट गरेका थिए । विश्वस्त स्रोतका अनुसार, यी दुई नेता मात्र होइन, माओवादी र एमालेका दोस्रो पुस्ताका चार जना नेताहरु निरन्तर संवाद र भेटघाटमा छन् । एमाले महासचिव शंकर पोखरेल र माओवादी उपमहासचिव जनार्दन शर्माबीच पनि ललितपुरमा भेटवार्ता भएको थियो ।

गत वर्ष पनि एमाले र माओवादी केन्द्रका नेताहरु पानी बाराबारको अवस्थामा थिए । शीर्ष नेताहरु झन् धेरै टाढा थिए । ३० बैशाख २०७९ को स्थानीय तह निर्वाचनमा कांग्रेससँगको गठबन्धनबाट लाभ लिँदासमेत माओवादी केन्द्रका दोस्रो ततहका नेताहरुले वाम गठबन्धनमा जोड दिएका थिए । तर,शीर्ष तहको तिक्तताका कारण त्यो सम्भावना थिएन् । चुनावपछि भने सत्ता समीकरणको आवश्यकताले यी दुई दललाई एकठाउँ ल्याइपुर्‍याएको थियो ।

एमाले–माओवादी सहकार्य कति सहज ?

एमाले र माओवादी केन्द्रका दोस्रो तहका नेताहरु निरन्तर भेटघाट र छलफलमा हुँदा पुनले भने झै सरकारमा भेट हुने सम्भावना नकार्न नसकिने नेताहरु बताउछन् । शिर्ष नेताहरु भने अहिले नै मिल्न सकिने अवस्थामा पुगी नसकेको दुबै तर्फका नेताहरु स्वीकार्छन् ।

माओवादी–एमालेबीच सहकार्य हुनसक्ने संभावना धेरै रहेको माओवादी केन्द्रका केन्द्रीय सदस्य लेखनाथ न्यौपाने बताउछन् । उनले भने ,‘रहरले भन्दा पनि संकटले दुबै दल एक ठाउँमा आउने सम्भावना धेरै छ । अहिलेको संकटभन्दा पनि २०८४ को संकटको दुबैले आकलन गरेका छन् । त्यहि भएर पनि एक हुन आवश्यक छ, हुनुपर्छ ।’

तर, एमालेका पोलिटब्युरो सदस्य खिमलाल भट्टराई भने व्यक्तिगत सम्बन्धका कारण भेटघाट हुनु स्वाभाविक भएको तर राजनीतिक रूपमा एमाले अहिले माओवादीसँग नजिक हुन नसक्ने दाबी गर्छन् । उनले भने, ‘एमालेले अहिले माओवादीसँग मिल्ने, सरकारमा जाने कुरा सोचेको छैन । यो हुन पनि सक्दैन ।'

माओवादी केन्द्रका अर्का नेता देवेन्द्र पौडेल भने राजनीतिमा असम्भव भन्ने केहि नभएको बताउँछन् । ‘अहिले पनि एमालेका साथीहरुसँग हाम्रो सम्बन्ध राम्रै छ । मिल्नेबारे पनि कुरा भइरहेको छ’ माओवादी केन्द्रका सचिवसमेत रहेका पौडेल भन्छन्, ‘पार्टीहरु एउटा कारण टाढिए भन्दैमा जीवनभर नमिल्ने भन्ने हुँदैन । सहकार्य हुनसक्छ, राजनीति हो, जे पनि हुन्छ ।’

कांग्रेसको आन्तरिक गुटबन्दीका कारण पनि गठबन्धनमा समस्या आउनसक्ने स्थिति देखिए पनि माओवादी केन्द्रले एमालेसँग नजिकिएर बैकल्पिक रणनीति बनाएको बुझ्न कठिन छैन । नेताहरु संवादमा रहे पनि यी दुई पार्टीबीच तत्कालै सहकार्य वा सत्ता गठबन्धन बनिहाल्ने परिस्थिति भने बनिनसकेको माओवादी केन्द्रनिकट स्रोत बताउँछ ।

* थप सम्पादन गरिएकाे ।

प्रकाशित मिति: बुधबार, असोज २४, २०८० २१:५३