करारका स्वास्थ्यकर्मीलाई हटाएपछि वीर अस्पतालमा हुँदै छ सेवा प्रभावित

A+ A A-

चिकित्सा विज्ञान राष्ट्रिय प्रतिष्ठान (न्याम्स) ले वीर अस्पतालमा कार्यरत २ सय ५६ जना कर्मचारीलाई जागिरबाट हटाएको छ ।

नयाँ सर्जिकल भवन सुरु भएपछि सेवा दिइरहेका करारका ५२ जना डाक्टर, १५५ जना नर्स, १५ जना फार्मेसिस्ट, ११ जना ल्याब टेक्निसियनसहित २५६ जना स्वास्थ्यकर्मीलाई प्रतिष्ठानले निष्कासन गरेको छ । न्याम्सकाे कार्यकारी परिषद्को बैठकले १५ असोजमा स्वास्थ्यकर्मी र कर्मचारीलाई एकैपटक हटाउने निर्णय गरेको थियो । उपकुलपतिको अध्यक्षतामा बसेको बैठकको निर्णयपछि २१ असोजबाट उनीहरूलाई बिदा गरिएको सूचना वीर अस्पतालले २० असोज मा जारी गरेको थियो ।

पूर्व जानकारीबिना आफूहरूलाई कामबाट हटाइएको भन्दै अहिले उनीहरू आन्दोलनमा उत्रिएका छन् । आन्दोलनमा उत्रिएका उनीहरूले आफूलाई सरकारले प्रयोग गरेको बताउँछन् । कोरोना भाइरसको महामारीका बेला सरकारले २७६ जना स्वास्थ्यकर्मी र कर्मचारीलाई करारमा राखेको थियो । कोरोना सकिएपछि हाल उनीहरूले नयाँ सर्जिकल भवनमा सेवा दिँदै आइरहेका थिए । काम गर्दागर्दै पूर्व जानकारीबिना नै कामबाट निकाल्नु सरकारको गैरजिम्मेवार कदम भएको आन्दोलनमा उत्रिएकी एक नर्सले बताइन् ।

‘करारमा काम गरिरहेका कर्मचारीलाई निकाल्न मिल्दैन भन्ने हुँदैन । तर, निकाल्नुभन्दा अगाडि जानकारी गराउनुपर्‍यो भन्ने हाम्रो कुरा हो । फेरि यो चाडपर्वका बेला कामबाट निकालिनु कत्तिको जायज हो ?,’ एक नर्सले भनिन् ।

तर, अस्पतालक निर्देशक डा. सन्तोष पौडेल भने सरकारले उनीहरूलाई तलब दिन नसकेपछि अस्पातलले हटाउनु परेको बताउँछन् । उनी भन्छन्, ‘स्वास्थ्य तथा जनसंख्या मन्त्रालयलाई उहाँहरूको तलबको लिस्ट पठायौँ । स्वास्थ्य मन्त्रालयले अर्थ मन्त्रालयलाई पठायो । अर्थ मन्त्रालयले उहाँहरूलाई तलब दिन नसक्ने भएपछि स्वास्थ्य मन्त्रायलले हामीलाई आन्तरिक स्रोतबाट तबल खुवाउन भन्यो । त्यो क्षमता अहिले वीरसँग छैन ।’

स्वास्थ्य तथा जनसंख्यामन्त्री मोहनबहादुर बस्नेतले केही समयअघि वीर अस्पतालमा ७०० बेड निःशुल्क गराएका थिए । जसका कारण अस्पतालको आन्तरिक आम्दानी निकै न्यून हुने गरेको डा. पौडेल बताउँछन् । उनी भन्छन्, ‘९०० बेडमा ७०० नि:शुल्क छ । तपाईंहरू सबैलाई थाहा भएकै कुरा हो, वीर अस्पताल सबैभन्दा सस्तो छ । शल्यक्रियाका लागि हामीले एकदमै कम शुल्क मात्रै लिने गरेका छौँ । त्यस्तो शुल्कले कर्मचारीलाई तलब खुवाउन कसरी पुग्छ ?’

अहिले अस्पतालको सेवा बढ्दै गएपछि आन्तरिक स्रोत भने निकै कम भएको उनले बताए । ‘हटाइएका स्वास्थ्यकर्मीका लागि १ करोडभन्दा बढी बजेट आवश्यक पर्ने भयो । तर, वीरले व्यवस्थापन गर्न सकेन । अस्पतालको आन्तरिक आयले अस्पतालका लागि चाहिने अरु खर्चसमेत गर्न सक्ने अवस्था छैन’, उनले भने ।

प्रभावित हुन लाग्यो सेवा

ठूलो संख्यामा स्वास्थ्यकर्मी निकाल्दा वीर अस्पतालको सेवा प्रभावित भइरहेको निर्देशक डा. पौडेल बताउँछन् । ‘तत्काललाई अहिले आईसीयू, शल्यक्रिया, आकस्मिक कक्षलगायत अन्य विभागमा यसको असर देखिन थालेको छ । तर, बिरामीको चाप कम हुने विभागमा कम गर्दै अरुमा असर नपुर्‍याउन के गर्न सकिन्छ भनेर काम गरिरहेका छौँ,’ उनले भने ।

त्यस्तै, आइतबार तय गरिएका शल्यक्रिया हुन सकेनन् । अस्पतालले ६० बेडको आईसीयूलाई घटाएर ३७ मा पुर्‍याएको छ । २५६ जना कर्मचारी निकालिएसँगै २३ बेड घटाउनु परेको डा. पौडेल बताउँछन् । उनी भन्छन्, ‘आईसीयू सञ्चालन गरिरहेका छौँ भनेर मात्र पनि भएन । गुणस्तरको कुरा आउँछ । आईसीयूमा एउटा बेडमा एक जना नर्स चाहिन्छ, जुन जनशक्ति अब हामीकहाँ छैन ।’

वीरमा स्वास्थ्यकर्मी हटाइँदा न्युरोलोजी, युरोलोजी, ग्यास्ट्रो सर्जरी, डाइलासिस र प्रत्यारोपण सेवा पूर्ण रूपमा बन्द भएका छन् । न्युरो विभागमा कार्यरत १२ जना नर्समध्ये ६ जना नर्स हटाइँदा न्युरो सेवा प्रभावित भएको छ ।

आइतबार सदनमा प्रमुख प्रतिपक्ष दल नेकपा एमालेकी सांसद विद्या भट्टराईले करारमा कार्यरत वीर अस्पतालका स्वास्थ्यकर्मी र कर्मचारीलाई हटाउने सरकारको निर्णयप्रति आपत्ति जनाएकी थिइन् ।

‘करारमा रहेका स्वास्थ्यकर्मीहरूलाई आर्थिक अवस्था देखाएर हटाउने सरकारको आकस्मिक निर्णयले वीर अस्पतालले प्रवाह गरिरहेका विस्तारित सेवा खस्किनुका साथै आम नागरिक सेवाबाट वञ्चित हुन्छन्’, उनले भनेकी थिइन्, ‘सेवा लिन आएका नागरिकलाई निजी स्वास्थ्य संस्थामा जान सरकारले नै बाध्य गरिरहेको छ ।'

सांसद भट्टराईले वीर अस्पतालको विस्तारित सेवाका लागि र नागरिकलाई निजी स्वास्थ्य संस्थामा जान बाध्य नपार्न सरकारले सेवा प्रवाहको कामलाई निरन्तरता दिन हटाइएका स्वास्थ्यकर्मीलाई पुनर्वहाली गर्न स्वास्थ्य तथा जनसंख्यामन्त्री मोहनबहादुर बस्नेतलाई आग्रह गरेकी थिइन् ।

प्रकाशित मिति: सोमबार, असोज २२, २०८० १८:२७