चाडपर्वको मुखमा तरकारीकाे मूल्य आकासियाे : व्यापारी भन्छन्– घाटा त खानु भएन नि

चाडपर्वको मुखमा तरकारीकाे मूल्य आकासियाे : व्यापारी भन्छन्– घाटा त खानु भएन नि

फाइल तस्वीर

A+ A A-

दैनिक भान्सामा प्रयोग हुने हरियो तरकारीको मूल्य आकासिएपछि उपभोक्ता बिलखबन्दमा परेका छन् । हरियो तरकारीकाे भाउ अचाक्ली महँगो भए पनि बजार अनुगमन गर्ने निकाय भने बेखबर छन् । कुनै बस्तुको मूल्यमा बढीमा २० प्रतिशतसम्म मुनाफा राखेर बेच्नुपर्ने कानुनी व्यवस्थालाई तरकारी व्यापारीहरूले ख्याल गरेका छैनन् ।

थोक भाउमा खासै फरक नपरे पनि खुद्रामा भने अचाक्ली मूल्य बढ्दा उपभोक्ताहरू हरियो तरकारी खान नसक्ने अवस्थामा पुगेका छन् । जनकपुरधामको पेठिया बजारमा भेटिएकी सुधा कर्णले बजारभरि घुमेर महँगो मूल्य तिर्दा समेत किनिहाल्ने जस्तो राम्रो र ताजा तरकारी नपाएको गुनासो गरिन् ।

‘तरकारीको मूल्यकाे त कुरै नगरौँ, पहिले किलो आउने पैसाले अहिले पाउ पनि आउँदैन। त्यो पनि पसलैपिच्छेको फरक फरक मूल्य हुन्छ', उनले भनिन्, ‘बजार अनुगमन गर्ने निकायले किन यो विषयमा वास्ता नगरेको होलान् ? चाडपर्वको बेलामा पनि सरोकारवाला निकायलाई फुर्सद मिलेनछ ।'

खुद्रा बजारमा तरकारीको मूल्य ५० देखि एक सय प्रतिशतसम्म बढेको उपभोक्ताकाे गुनासाे छ । तर थोक बजारमा भने खासै अन्तर देखिँदैन । जनकपुर आलु प्याज व्यवसायी सङ्घका अध्यक्ष अलाउद्दिन राइनले भने, ‘उपभोक्ता पनि महँगोमा परेका छन् भने किसानले पनि लागत अनुसारको पैसा पाएको छैन, सबै बिचोलियाले खाइरहेका छन् ।सरकारलाई कुनै मतलब छैन ।’

तरकारी उत्पादनमा धनुषा तथा महोत्तरी लगायतका जिल्ला पछि परेकोले व्यापारीहरूले भारतबाट साइकल, मोटरसाइकलमा तरकारी ल्याएर बढी मुनाफामा बेच्ने गरेका जानकारहरू बताउँछन् । पेठिया बजारका खुद्रा व्यापारी मनोज साहले खरिद गरेको तरकारीमध्ये झण्डै ५० प्रतिशत कुहिने र सड्ने भएकाेले महँगो मूल्यमा बिक्री गर्न बाध्य भएको बताए ।

दोब्बर मुनाफा राखेर बेच्न पाइन्छ र भन्ने जिज्ञासामा व्यापारी साह भन्छन्, ‘थोक व्यापारीहरू थोरै नाफा राखेर राम्रो नराम्रो सबै मिसाएर बिक्री गर्छन्, फेरि उपभोक्ताले रोजीरोजी तरकारी लिन्छ । यो बेलामा चर्को मूल्य नलिएर के गर्ने त ? घाटा त खानु भएन नि ।’

उपभोक्ता हित संरक्षण मञ्च जनकपुरधामका अध्यक्ष बटुकनाथ झाले व्यापारीको मनोमानी हुँदा समेत अनुगमन गर्ने निकाय मौन रहेका कारण तरकारीको मूल्य आकासिएकाे बताए ।

प्रकाशित मिति: सोमबार, असोज २२, २०८० ०७:३१