एमाले सुदूरपश्चिम अधिवेशन : तीन जना आकांक्षीका बीच लेखराज र कर्ण थापा मिल्ने चर्चा

एमाले सुदूरपश्चिम अधिवेशन : तीन जना आकांक्षीका बीच लेखराज र कर्ण थापा मिल्ने चर्चा

A+ A A-

नेकपा एमाले सुदूरपश्चिम प्रदेशमा अध्यक्षका लागि तीन जना दाबेदार रहेका छन् । अधिवेशन सुरु हुनुपूर्व नै तीन जना अध्यक्षको दाबेदार रहेपछि सर्वसम्मत हुने सम्भावना करिब सकिएको छ ।

अध्यक्षलगायत पदाधिकारीका लागि चुनाव हुने पक्कापक्कीजस्तै भएको छ । अध्यक्षका आकांक्षीहरू आन्तरिक रूपमा आफ्नो पक्षका प्रचारप्रसारमा लागेका छन् । अहिलेका उपाध्यक्ष कमल तिमिल्सेना, सदस्य कृष्ण जैसी र बचन सिंह अध्यक्षका आका‌ंक्षी छन् ।

अन्य प्रदेशमा जस्तै यो प्रदेशमा पनि नेतृत्व चयन केन्द्रीय नेतृत्व जोडिएको छ । प्रदेशको नेतृत्वको चयनमा अध्यक्ष केपी शर्मा ओलीदेखि उपाध्यक्ष विष्णु पौडेल, महासचिव शंकर पोखरेल र प्रदेश इन्चार्ज छविलाल विश्वकर्मासम्मकाे आफूअनुकूल नेतृत्व चयन होस् भन्ने चाहना हुने नै छ । सचिव लेखराज भट्ट, पूर्वउपाध्यक्ष भीम रावल र स्थायी कमिटी सदस्य कर्ण थापाका गुट पनि सक्रिय छन् ।

प्रदेश अधिवेशनमा नबोलाइए पनि रावलको गुट पुन: सक्रिय भएको बताइन्छ । कर्णालीबाट केही दिन पहिला नै भट्ट सुदूरपश्चिम गएर थापासँग छलफल गरेपछि समीकरणमा फेरबदल आएको एक प्रदेश कमिटी सदस्यले बताए ।

केही समय पहिलासम्म भट्ट र रावलनिकटहरूले तिमिल्सेनालाई समर्थन गरेका थिए । थापाले जैसीलाई समर्थन गरेका थिए । तर, भट्ट र थापाबीच भेटवार्ता भएपछि समीकरणमा फेरबदल हुन सक्ने आकलन गरिएको छ ।

अहिलेका तीन जना दाबेदारहरूमा तिमिल्सेनालाई रावल गुटले समर्थन जनाएको छ । सिंहलाई भट्ट गुटले र जैसीलाई थापा गुटले समर्थन गरेको एक प्रदेश नेताले बताए ।

रावल गुटले तिमिल्सेनालाई समर्थन गरेपछि भट्टले सिंहलाई अगाडि बढाएको बताइन्छ । प्रदेशमा तीन गुटमा शक्तिशाली गुट भट्टको मानिन्छ । भट्टले रावल र थापाबाट असन्तुष्टहरूको नेतृत्व गर्दा बलियो बनेकाे नेताहरू बताउँछन् ।

भट्टसँग मिलेर थापाले आफू बलियो हुने दाउ हेरेको चर्चा चलेको छ । सुरुमा जैसीलाई अध्यक्षमा समर्थन गरेका थापा पछिल्लो समयमा भट्टसँग मिलेर जान तयार भएको एक केन्द्रीय सदस्यले बताए । ती सदस्यले भने, ‘लेखराज कमरेड प्रदेशमा आएपछि कर्ण कमरेडसँग छलफल भयो । त्यसले दुवै जना मिलेर जान सक्ने वातावरण बनेको जस्तो देखिन्छ । त्यस्तो भएमा जैसीको व्यवस्थापन र सिंह अध्यक्षमा लड्ने हुन सक्छ ।’

तिमिल्सेना र जैसी अछामका हुन् । रावल गुटले तिमिल्सेनालाई समर्थन गरेपछि अछामका दुवै नेताहरू अध्यक्षमा भिड्दा रावल गुट हाबी हुने देखेपछि थापा एक कदम ब्याक भएको बताइन्छ ।

उता रावल गुटले पुरानो आफ्नो पक्षका सबैलाई एक ठाउँमा ल्याएर आफूअनुकूलको अध्यक्ष बनाउने तयारी गरेको रावलनिकट एक नेता बताउँछन् । ती नेताले भने, ‘हाम्रो समूहबाट कमलजी अध्यक्षको उम्मेदवार हो । जसका लागि सबै एक हुन्छौँ । सिनियर पनि कमल नै हुनुहुन्छ । उहाँ अहिले उपाध्यक्ष हुनुहुन्छ । अरु प्रदेशको सदस्य हुनुहुन्छ । उपाध्यक्ष स्वत: अध्यक्षको दाबेदार हुन्छ नै ।’

नयाँ समीकरण हुँदा गुटहरू भत्केर नयाँ बन्ने सम्भावना हुन्छ । सुदूरपश्चिमको राजनीतिमा बझाङ, बाजुरा र अछाम फेक्टर एक हुन्छ । बैतडी, दार्चुला र डडेल्धुरा एक हुन्छन् । डोटी दुवैतर्फ मिल्ने गर्छ ।

यसमा पोलिटब्युरो र केन्द्रीय सदस्यहरूको मुख्य भूमिका रहन्छ । तीनवटै गुटले उम्मेदवार बनाउँदा भूगोलको विशेष ख्याल गर्ने देखिन्छ ।

एमालेले पछिल्लो समयमा पदाधिकारीहरूलाई दोहरो कार्यकारी जिम्मेवारी नदिने नियम ल्याएकाले अहिलेका अध्यक्ष तथा संघीय सांसद दामोदर भण्डारी र सचिव तथा प्रदेश सांसद धर्मराज पाठक बिदा हुनेछन् ।

प्रकाशित मिति: आइतबार, असोज २१, २०८० १५:३१