साइकल मिस्त्रीले हेलिकोप्टर बनाए, उडाउने अनुमति पाएनन्

A+ A A-

धनुषाको मिथिला नगरपालिकाका एक साइकल मिस्त्रीले बनाएको हेलिकप्टर अहिले चर्चामा छ । १७ वर्षीय हरिनारायण पण्डितले इखै इखमा हेलिकोप्टर नै निर्माण गरेर देखाएका छन ।

साईकल, मोटरसाईकल, ट्याक्टर, बस र कारमा प्रयोग हुने इन्जिनको पार्टपूर्जा जोरजाम एवं प्रयोग गरेर हरिनारायणले २ महिनामा हेलिकोप्टर निर्माण गरेका छन् । जसमा पेट्रोलबाट चल्ने इन्जिन जोडिएको छ ।

यतिवेला उनी हेलिकोप्टर उडाउने तयारीमा छन् । हरिनारायण ढल्केवरको तारा साईकल स्टोरमा ३ वर्षदेखि साइकल मर्मतको काम गर्दैछन् । सुरुमा महिनाको ९ हजार र २ वर्षदेखि मासिक १२ हजार रुपैयाँ पारिश्रमिक बुझ्छन् उनी ।

साइकल पसलमै काम गर्दा गर्दै एकवर्षअघि हरिनारायणले रेन्जर साइकलमा पेट्रोल इन्जिन प्रयोग गरी मोटरसाइकल बनाएर सडकमा गुडाएका थिए । ‘मैले १ असोज २०७५ मा विश्वकर्मा पूजाको दिन आफुले बनाएको मोटरसाईकल पूजा गरेर चलाएको थिएँ । केहि महिनासम्म चढे । पटक पटक प्रहरीले रोक लगायो,’ हरिनारायणले भने, ‘प्रहरीले रोक लगाउँदै हेलिकप्टर वनाउन चुनौति दिएका थिए । मेरो मनमा इख भयो । मैले हेलिकप्टर बनाएर उडाएर देखाउँछु भन्ने प्रण लिएँ । त्यो मोटरसाईकल घरमै थन्काए । र हेलिकप्टर बनाउन सुरु गरे ।’

हेलिकप्टर निर्माणमा २ लाख रुपैयाँ खर्च भएको हरिनारायणले बताए । ‘विभिन्न पार्टपूर्जा जोरजाम गरी अहिलेसम्म २ लाखभन्दा बढी खर्च भएको छ । केही आमाबुबाले सहयोग गर्नुभएको छ । केही साथीभाइसंग पैँचो लिएको छु र केही आफैले साइकल पसलमा गरेको काम बापत पाएको तलब खर्च गरेर बनाएको छु,’ हरिनारायणले भने ।

छोराको हेलिकोप्टर निर्माणमा बुबा श्रीनारायण र आमा निर्मला देवीले सघाएका छन् । ‘छोराले हेलिकोप्टर बनाउने इच्छा जाहेर गरे । मेरो घरको आर्थिक अवस्था निकै कमजोर छ,’ बुबा श्रीनारायणले भने, ‘छोराको इच्छा पूरा गर्न सकेजति समान किन्न आर्थिक सहयोग गरेको छु ।’

हरिनारायणले बनाएको हेलिकोप्टरको एकपटक परीक्षण उडान भइसकेकाे छ । हेलिकोप्टरलाई औरही खेलाको खुल्ला चौरमा २ जना सवार भएर १० देखि २० फिट्सम्म तत्काल उडाउन सक्ने हरिको भनाई छ ।

हरिनारायणले गत आइतवार नै हेलिकोप्टर उडाउने तयारी गरेका थिए । तर स्थानीय प्रशासनले अनुमति नदिएपछि उडान स्थगित गरेको उनले बताए ।

यता धनुषाका प्रमुख जिल्ला अधिकारी प्रदीपराज कणेलले हरिनारायणले हेलिकोप्टर बनाएको विषयमा आफुले जानकारी पाएको बताए । बनाएको हेलिकोप्टर उडाउन नागरिक उड्ययन कार्यालयबाट अनुमति दिए मात्र आफुले अनुमति दिनसक्ने प्रजिअ कणेलको भनाई छ ।

‘हरिनारायणले हेकिोप्टर बनाएर उडाउने तयारी गरेको जानकारी आएको छ । तर उडायो केही दुर्घटना भयो भने त्यसको जिम्मेबारी कसले लिने । त्यसको लागि नागरिक उड्ययन कार्यालयबाट अनुमति लिन भनेको छु’ उनले भने ।

प्रदेश २ का पर्यटन, उद्योग, वन तथा वातावरण मन्त्री रामनरेश रायले हरिनारायणको हेलिकप्टर हेर्ने इच्छा जनाउदै हेरेपछि त्यसलाई दक्ष बनाउने तर्फ काम गर्ने आश्वासन दिएका छन् ।

प्रकाशित मिति: बुधबार, असोज ८, २०७६ ०३:३२