चुनाव जित्न 'पीएस समूह'लाई चाहिएका दामबहादुर

A+ A A-

मान्छेको जीवनले कसरी र मोड लिन्छ, त्यसको भर हुँदैन । पोखरा–२३, घाँटीछिनाका दामबहादुर विकलाई एकाबिहानै आएको प्रस्तावले उनको राजनीतिक जीवन नै अर्को ढंगले अघि बढेको छ । जनवर्गीय संगठनमा सक्रिय उनी नेकपा एमालेको गण्डकी प्रदेशको पदाधिकारी बनेका छन् ।

दामबहादुर न आफूले पदाधिकारी बन्ने सोचेका थिए, न तयारी थियो । तर, मध्यरातमा नेताहरूले थमाइदिएको उपसचिवको उम्मेदवारकाे टिकट लिएर उनी चुनावी मैदानमा होमिए र जिते पनि । गत १५ देखि १९ असोजसम्म भएको नेकपा एमाले गण्डकी प्रदेशको प्रथम अधिवेशनबाट उनी उपसचिव निर्वाचित भएका छन् । एमालेभित्रै कमैले चिनेका र कमैले नाम सुनेका उनै दामबहादुर १९ असोजमा सार्वजनिक चुनावको मतपरिणामअनुसार उपसचिव निर्वाचित भएका छन् । उनले ४ सय ९९ मत र प्रतिस्पर्धी सन्तोष रावलले ३ सय ९७ मत ल्याएका थिए ।

यो निर्वाचन पार्टीभित्र राजनीतिक जीवनका लागि एउटा खुड्किलो बनेको छ । दामबहादुरले चाहेरभन्दा पनि परिस्थितिले उपसचिव पद उनीसम्म ल्याइपुर्‍याएको हो । उनले टिकट पाए पनि निर्वाचन हार्ने धेरैको आकलनबीच जितेर त्यसलाई गलत प्रमाणित गरिदिएका छन् । उनलाई चुनाव जित्न सजिलो भने थिएन । राष्ट्रिय युवा संघका पूर्वकेन्द्रीय उपाध्यक्ष म्याग्दीका सन्तोष रावल प्रतिस्पर्धी थिए ।

अब उनले टिकट कसरी पाए र कसरी जिते भन्ने जानौँ ।

गण्डकीमा नेकपा एमाले महासचिव शंकर पोखरेल र स्थायी कमिटी सदस्य खगराज अधिकारी अनि उपमहासचिव पृथ्वीसुब्बा गुरुङको समूहबीच प्रतिस्पर्धा हुँदै थियो ।

पृथ्वीसुब्बा समूहले कास्कीका हुमबहादुर गुरुङलाई उम्मेदवार बनाउने पक्का गरिसकेको थियो । १६ असोजमा खगराज समूहको पदाधिकारी प्यानल लिस्ट सार्वजनिक भयो । त्यसपछि पृथ्वीसुब्बा समूहले पहिल्यै तयार पारेको टिममा हेरफेर गर्दा दामबहादुर प्यानलको सूची हुँदै प्रदेश कमिटीको पदाधिकारीमा अटाएका हुन् ।

दामबहादुर नै ल्याउनुपर्ने परिस्थिति कसरी आयो त ?

खगराज समूहले उपाध्यक्षमा बाबुराम सुनारलाई उम्मेदवार बनाएको थियो । उपाध्यक्षमा पृथ्वीसुब्बा समूहले मीनप्रसाद गुरुङलाई ल्यायो । गुरुङ समुदायबाट उपाध्यक्ष उम्मेदवार तय भएपछि उपसचिवमा उत्पीडित समुदायलाई ल्याउने विषयमा छलफल चल्यो । त्यसमा पनि कास्कीकै मान्छे चाहिएको थियो । लेकसाइडको ‘होटल एलेगेन्ट’को मिटिङ हलमा जुटेका नेताहरूले प्रतिनिधिमा पात्र हेरे ।

पृथ्वीसुब्बा पोखरा–५ को वडाध्यक्ष भइसकेका र परिचित अनुहार पनि भएकाले धनबहादुर नेपालीलाई ल्याउन चाहन्थे । तर, उनी खगराज समूहबाट लड्ने मनस्थितिमा रहेको बुझेपछि उनको नाममा छलफल भएन । त्यसपछि पोलिटब्युरो सदस्य एवं पूर्व खेलकुदमन्त्री जगत विश्वकर्माले दामबहादुरको नाम प्रस्ताव गरे । ‘अहिले प्रदेश कमिटीमा पनि छन् । मलाई सहयोग पनि गर्ने मान्छे हुन् । दलित समुदायमा पपुलर पनि छन्,’ १६ असोज मध्यरातमा जगतको यही प्रस्तावपछि दामबहादुरको नाम फाइनल भएको हो ।

मीनप्रसाद स्याङ्जामा पृथ्वीसुब्बा समूहलाई मत तान्न उम्मेदवार बनाइएका थिए । मीन उम्मेदवार बन्दा हुमको नाम काटियो । त्यसपछि उम्मेदवारको टिकट दामबहादुरको पोल्टामा पुग्यो । दामबहादुरलाई पृथ्वीसुब्बा समूहले उम्मेदवार बनाउन तयार हुनुको अर्को पनि कारण छ । दामबहादुरले पृथ्वीसुब्बा समूहविरुद्ध अधिवेशनअघि पोखरामा हुन लागेको खगराज समूहको एउटा भेला नै असफल पारिदिएका थिए । खगराज समूहमा रहेका धनबहादुर नेपाली, निर्मल दियालीलगायतले दलित समुदायका प्रतिनिधिको भेला अधिवेशन सुरु हुनु एकदिनअघि पोखरामा गर्दै थिए । त्यसपछि दामबहादुरले जिल्ला–जिल्लामा आफ्नो सम्पर्कमा भएकालाई त्यो भेलामा नजान भनिदिए । त्यसपछि भेला सोचेजस्तो भएन ।

दामबहादुरसहित पृथ्वीसुब्बा समूहको उम्मेदवार तय हुँदा बिहानको साढे ५ बजेको थियो । १६ असोज रातभर नेताहरू नसुती चरण–चरणमा बैठकमा बसेका थिए । दलित क्लस्टरबाट सदस्य बन्ने योजनामा रहेका दामबहादुर उपसचिवको उम्मेदवार बने र चुनाव जिते । ‘जनजाति, उत्पीडित समुदाय समेटिएको समावेशी भएकाले कार्यकर्ताले अनुमोदन गरेजस्तो लाग्छ,’ दामबहादुरले सुनाए, ‘मलाई पार्टी र नेताहरूले विगतदेखिको योगदान हेरेर व्यवस्थापन गर्नुभएको हो ।’

उनी २०५६ सालदेखि २०६८ सालसम्म चापाकोट गाउँ कमिटीको अध्यक्ष थिए । त्यसपछि क्षेत्रीय कमिटीमा दुई कार्यकाल र कास्की जिल्ला कमिटीमा तीन कार्यकाल काम गरे । उनी नवराज शर्मा नेतृत्वको प्रदेश कमिटीमा सदस्य रहेकोमा फेरि अध्यक्ष निर्वाचित शर्माकै कमिटीमा उपसचिव बनेका छन् ।

दामबहादुर २०७४ सालमा तत्कालीन पोखरा लेखनाथ महानगरपालिका–२३ को वडाध्यक्षमा २ सय ५७ मतले हारेका थिए । एमालेको जनवर्गीय संगठन नेपाल उत्पीडित जातीय मुक्ति समाजका केन्द्रीय सदस्य र कास्की इन्चार्ज हुन् । उनी मुक्ति समाजबाटै अधिवेशनका लागि प्रतिनिधि बनेर आएका थिए ।

दामबहादुरले चुनावमात्र जितेका छैनन्, ऐतिहासिक अधिवेशनमार्फत एमालेभित्र उत्पीडित समुदायको आवाज बोल्नुपर्ने ठाउँसम्म पुगेका छन् । उनी एमालेको गण्डकी प्रदेश कमिटीमा दलित समुदायबाट पदाधिकारीमा प्रतिनिधित्व गर्ने पहिलो व्यक्ति बनेका छन् । यसअघि प्रदेश र जिल्ला कमिटी हाँकेका अन्य पदाधिकारीबीच बसेर आफूलाई स्थापित गर्नुपर्ने चुनौती दामबहादुरलाई छ ।

प्रकाशित मिति: आइतबार, असोज २१, २०८० ०७:५९