आफ्नी पार्टीकी मन्त्रीलाई जिम्मेवारी दिन मुख्यमन्त्री यादवले विभाजन गरे जनमतले सम्हालेको मन्त्रालय

आफ्नी पार्टीकी मन्त्रीलाई जिम्मेवारी दिन मुख्यमन्त्री यादवले विभाजन गरे जनमतले सम्हालेको मन्त्रालय

A+ A A-

मधेश प्रदेशका मुख्यमन्त्री सरोजकुमार यादवले मन्त्रालय विभाजन गरी मन्त्रीहरूको जिम्मेवारी हेरफेर गरेक छन् । उनले शुक्रबार जनमत पार्टीको भागमा रहेको शिक्षा तथा समाज कल्याण मन्त्रालय विभाजन गरेका हुन् । यसअघि विनाविभागीय मन्त्री रहेकी जसपाकी सुरिता साहलाई विभागको जिम्मा दिन उनले मन्त्रालयको संख्या बढाएका हुन् । साह चार महिनादेखि विनाविभागीय थिइन् ।

सो मन्त्रालय विभाजन गरे खेलकुद तथा समाज कल्याण मन्त्रालय र शिक्षा तथा संस्कृति मन्त्रालयको बनाइएको छ । सुरिता साहलाई खेलकुद तथा समाज कल्याण मन्त्रालयको जिम्मेवारी दिइएको छ भने यसअघि शिक्षा तथा समाज कल्याणमन्त्री रहेका जनमतका संसदीय दलका नेता महेशप्रसाद यादवले शिक्षा तथा संस्कृति मन्त्रालयको जिम्मेवारी पाएका छन् ।

प्रदेश प्रमुख हरिशंकर मिश्रले शुक्रबार मुख्यमन्त्री तथा मन्त्रिपरिषद्को सिफारिसमा मन्त्रीहरूको कार्यविभाजन तोकेका छन् ।

योसँगै मधेशमा मन्त्री १२ र राज्यमन्त्रीको संख्या २ भएकाे छ । पहिलोपटक मधेश प्रदेश सरकार गठन हुदाँ मुख्यमन्त्रीसहित ७ वटाा मन्त्रालय मात्र रहेका थिए । त्यसपछि जसपा विभाजन हुदाँ तत्तकालीन मुख्यमन्त्री लालबाबु राउतले मन्त्रालयलाई फुटाएर १० वटा मन्त्रालय बनाएका थिए ।

६ दलीय सरकार भएकोले सबै दललाई खुसी पार्न मुख्यमन्त्री यादवले वाध्यतावश मन्त्रालयको संख्या बढाएको मधेश प्रदेश सरकारका मुख्यन्याधिवक्ता विरेन्द्र ठाकुरले बताए । प्रदेश सभामा रहेको संख्याको २० प्रतिशतसम्म सरकारले मन्त्री बनाउन सक्ने कानुनी प्रवधान रहेको उनले बताए । मधेश प्रदेशसभामा १०७ सदस्यीय छ । यस हिसाबले मधेशमा २१ जनासम्म मन्त्रीको संख्या राख्न सकिने उनले बताए । उनले भने, ‘मन्त्रिपरिषद् ठूलो भएको खण्डमा सरकारको खर्च पनि बढ्ने भएकोले त्यो व्यवहारिक पनि हुँदैन ।’
यता, आफ्नो जानकारी बिना मन्त्रालय फुटाएकोमा जनमतका संसदीय दलका नेता मन्त्री यादवले आपत्ति जनाएका छन् ।
मन्त्रिपरिषद् बैठकमा मन्त्रालय फुटाउनेसम्बन्धी कुनै प्रस्ताव नै नगरी अवैधानिक रुपमा मुख्यमन्त्रीले मन्त्रालय फुटाएकोमा उनले आक्रोश व्यक्त गरे । आफ्नो पार्टी केन्द्रीय गठबन्धनमा रहेकोले प्रदेश सरकारमा बस्ने वा नबस्ने विषयमा केन्द्रमा छलफल भएपछि मात्रै कुनै निर्णय हुने उनले बताए ।

मन्त्रिपरिषद्ले पूर्णता पाएसँगै मधेश प्रदेशमा जसपाका मुख्यमन्त्रीसहित ४ मन्त्री र १ राज्यमन्त्री, कांग्रेसका ३ मन्त्री, जनमतका २ मन्त्री, लोसपाका १ मन्त्री, माओवादी केन्द्रका १ मन्त्री र १ राज्यमन्त्री र नेकपा एसको १ मन्त्री रहेका छन् ।

प्रकाशित मिति: शुक्रबार, असोज १९, २०८० २१:५६