नेकपा एसको जनजागरण : कतै उत्साह, कतै निराशा

A+ A A-

नेकपा एमालेबाट विभाजन गरी करिब दुई वर्षअघि अलग भई गठन भएको नेकपा एकीकृत समाजवादी पार्टी यतिबेला जनजागरण अभियानका नाममा देश दौडाहमा छ ।

नेकपा एस मधेश प्रदेशमा जनगारण अभियान सकेर शुक्रबार बागमती प्रदेशमा प्रवेश गरेको छ । १४ असोजमा एमाले अध्यक्ष केपी शर्माको गृह जिल्ला झापाबाट सुरु भएको जनजागरण अभियान २९ असोजमा सम्पन्न हुँदैछ । अभियानले कोशी प्रदेशमा खासै उत्साह जोगाउन नसके पनि मधेशको कार्यक्रमले भने राहत दिएको छ ।

अभियानको क्रममा नेकपा एसले मधेश प्रदेशका ८ वटा जिल्लामा १८ वटा आमसभा, पार्टी प्रवेश र कार्यकर्ता भेटघाटलगायतका कार्यक्रम गरेको छ ।

यी विभिन्न १८ वटा कार्यक्रममा विभिन्न पार्टीहरूबाट करिब ५ हजार कार्यकर्ताले पार्टी प्रवेश गरेको नेकपा एसका मधेश प्रदेशका अध्यक्ष रामचन्द्र यादवले जानकारी दिए । अभियानले विभिन्न पार्टीमा निरास भएका नेता तथा कार्यकर्ता नेकपा एसमा प्रवेश गरेको उनले बताए । खास गरी नेकपा एमाले र लोकतान्त्रिक समाजवादी पार्टी (लोसपा)बाट बढी नेता तथा कार्यकर्ता आफ्नो पार्टीमा प्रवेश गरेको उनले बताए ।

गत २०७९ सालको निर्वाचनमा पार्टीले थ्रेस होल्ड नकटाएर राष्ट्रिय पार्टी नभए पनि नेपालको वर्तमान राष्ट्रिय राजनीतिमा नेकपा एसको महत्त्वपूर्ण भूमिका रहेको उनले बताए । उनले जनजागरण अभियानले राष्ट्रिय पार्टी मात्र नभई मुलुकै नम्बर वान कम्युनिस्ट पार्टी निर्माण गर्न टेवा पुग्ने दाबी गरे ।

पार्टी अध्यक्ष माधवकुमार मधेश प्रदेशको भए पनि गत निर्वाचनमा मधेशमा नेकपा एस छवटा स्थानीय तह मात्रै जित्न सफल भयो । जसमध्ये अध्यक्ष नेपालको गृह जिल्ला रौटहतमा ४, सप्तरीमा १ र सिरहामा १ गरी ६ वटा पालिका नेकपा एसले जितेको छ । त्यसैगरी, प्रदेशसभामा ४ वटा प्रत्यक्षमा र ३ समानुपातिक गरी ७ जना सदस्य रहेका छन् । प्रतिनिधिसभामा नेकपा एसले २ वटा सिट जितेको छ ।

मधेश प्रदेशमा नेकपा एमाले पहिलो पार्टी बन्दा नेकपा एमालेबाट विद्रोह गरेर बनेको नेकपा एस भने मधेशको छैटौँ नम्बरको पार्टी हो । जबकी एसका अध्यक्ष नेपाल पनि मधेश प्रदेशकै हुन् । यसरी हेर्दा, नेकपा एस अलग भए पनि नेकपा एमालेलाई खासै फरक परेको छैन भने झन मधेशमा एमाले मजबुत हुँदै गएको छ । एमाले संगठन विस्तारदेखि विभिन्न पार्टीबाट जनअधार भएका नेताहरूलाई प्रवेश गराउने गरेको छ ।

पार्टीले मधेश प्रदेशमा जनजागरण अभियान चलाउदाँ पनि नेकपा एमालेका जनआधार भएका एउटा पनि नेतालाई नेकपा एसले प्रवेश गराउन सकेन । पार्टीका मधेश प्रदेश अध्यक्ष रामचन्द्र यादवले एमालेका जिल्लास्तरका नेता नभए पनि नगरस्तरका नेता तथा कार्यकर्ता सयौँको संख्यामा पार्टीमा प्रवेश गरेको दाबी गरे ।

‘हाम्रो पार्टीको नाम, चुनाव चिह्न, झण्डा नयाँ भए पनि हाम्रो पार्टी पुरानो पार्टी हो,’ मधेश प्रदेश अध्यक्ष यादवले भने, ‘हाम्रो मधेशका सबै जिल्लामा संगठनहरू छन् । केही प्राविधिक समस्याले मात्रै हाम्रो सिट बढी आउन सकेन । तर राष्ट्रिय राजनीतिमा अझै पनि हाम्रो भूमिका महत्वपूर्ण छ ।’

‘नेकपा एमालेका अध्यक्ष केपी शर्मा ओलीको हेपाहावादी, विधिपद्धति मिचेर पार्टी संचालन गर्ने प्रवृत्तिको विरोधमा हामी विद्रोह गरेर अलग भयौँ,’ उनले भने, ‘तर केही साथीहरूको भ्रम अझै नचिरिएर एमालेमै बसे । तर अब पार्टीले जनजागरण अभियान संचालन गरेपछि त्यस्ता साथीहरू विस्तारै पार्टीसँग जुडिरहेका छन् ।’

जनगारण अभियानले कार्यकर्तामा उत्साह थपिएको बताउँदै उनले अगामी निर्वाचनमा पार्टी एमालेभन्दा बलियो अवस्थमा रहने दावी गरे ।

पार्टीले जनजागरण अभियान संचालन गरिरहे पनि मधेश प्रदेशमा अझै नेकपा एसप्रति खासै आकर्षण देखिएको छैन । अभियानको मुलु नारा सुशासन, रोजगारी र सम्वृद्धि रहे पनि नेकपा एसले मधेश प्रदेशका लागि कुनै खास योजना वा कार्यक्रम भए पनि मधेश प्रदेशका लागि पार्टीले छुट्टै कुनै फरक एजेण्डालाई अगाडि बढाउन सकेको छैन ।

नेकपा एसले मधेश प्रदेश सरकारको महत्त्वपूर्ण मन्त्रालय पाए पनि जनअपेक्षाअनुसार काम गर्न सकिरहेको छैन । यस्तोमा पार्टीले जनजागरण अभियानले पनि मधेशलाई लोभ्याउन नसक्ने देखिन्छ ।

प्रकाशित मिति: शुक्रबार, असोज १९, २०८० १९:५५