एमाले प्रदेश अधिवेशनमा पूर्वमाओवादी कसले जिते, कसले हारे ?

A+ A A-

नेकपा एमालेमा पार्टी विभाजनपछि सुस्ताएको आन्तरिक लोकतन्त्र जारी प्रदेश अधिवेशनहरूमा पुनर्बहाली भइरहेको छ । अधिवेशन भइसकेका चार प्रदेशले निर्वाचनमार्फत नयाँ नेतृत्य चयन गरेको छ ।

नेकपा विभाजनपछि एमालेमै रहेका पूर्वमाओवादी समूहका लागि आन्तरिक प्रतिस्पर्धा नयाँ अनुभव भएको छ । प्रतिस्पर्धा र सर्वसम्मतमार्फत केही नेताहरू प्रदेश कमिटीमा निर्वाचित भएका छन् ।

सबैभन्दा पहिले भएकाे लुम्बिनीको प्रदेश अधिवेशनमा उपसचिवमा पूर्वमाओवादी पृष्ठभूमिका पूर्णबहादुर बुढामगर ४१८ मत ल्याएर विजयी भए । उनी रोल्पाका हुन् । माओवादीको आधार इलाका मानिने रोल्पाबाट बुढामगरले एमालेको लुम्बिनी प्रदेश उपसचिवमा चुनावबाटै जित हात पारेका छन् । रोचक कुरा, बुढामगरका प्रतिद्वन्द्वी दुर्गा चौधरी पनि पूर्वमाओवादी नै हुन् । उपाध्यक्षमा उठेका रुपन्देहीका विश्वराज बराल भने पराजित भए ।

अधिवेशनमा होस् कि कमिटीमा अब पूर्वमाओवादी भन्ने भावना कसैमा नरहेको बराल बताउँछन् । उनले भने, ‘अधिवेशनमा सबै एमालेका सदस्य भएर भाग लिएका हौँ । कसैले विजय प्राप्त गर्‍यौँ भने कसैले पराजय । अहिले पूर्वमाओवादी भन्ने खासै छैन । कसैलाई त्यसतर्फ ध्यान पनि छैन ।’

सदस्यमा पूर्वमाओवादी पृषठभूमिका अरू केही नेता पनि निर्वाचित भएका छन् । केही भने सदस्यमा नै पराजित भएका छन् । नवलपरासीबाट सीमा गिरी र सूर्य न्यौपाने सर्वसम्मत प्रदेश कमिटी सदस्यमा चयन भए । रुपन्देहीका कल्पना हरिजन, मुकुन्द भुसाल, प्रेम गुरुङ प्रदेश कमिटीमा चुनाव लडेर विजयी भएका हुन् ।

रुपन्देहीमा चुनाव लडेर हार्ने पाँज जना छन् । प्रदेश कमिटी उपाध्यक्षमा निर्वाचन लडेर विश्व बराल पराजित भए । सदस्यमा लक्ष्मी कोइराला, गंगा कार्की, पुरन गुरुङ र हीरा केवट पराजित भए ।

अर्घाखाँचीबाट दुई जना प्रदेश कमिटीमा चयन भए जसमा कृष्णबहादुर भुसाल र भीम केसी छन् । दुवै जना सर्वसम्मत प्रदेश कमिटीमा चयन भएका हुन् । अर्घाखाँचीकै प्रकाश ज्ञवाली भने लेखा समितिको सचिवमा २ मतले पराजित भएकाे बरालले जानकारी दिए ।

पूर्वमाओवादीबाट अधिवेशन भएका प्रदेशहरूमा अपवादबाहेक सबै जिल्लाबाट प्रतिनिधित्व भएको छ । लुम्बिनी प्रदेशमा उपसचिवमा पूर्वमाओवादीबीच न प्रतिस्पर्धा भएको पूर्ण बुढामगरले बताए । उनले भने, ‘उपसचिवमा पूर्वमाओवादीबीच प्रतिस्पर्धा भयो । मैले जिते दर्गा चौधरी कमरेड पराजित हुनुभयो । लोकतान्त्रिक प्रक्रियामा यस्तो हुन्छ नै । तर हामीहरूले अधिवेशनमा पूर्वमाओवादी भनेर कुनै सम्पर्क भेटघाट गरेनौँ ।’

कपिलवस्तुबाट पनि तीन जना प्रदेश कमिटी सदस्यमा विजयी भएका छन् । जसमा दोणराज सुवेदी, विमला चौधरी, लक्ष्मी सारु रहेका छन् । दाङबाट रामजी चौधरी र सीता शर्मा चौधरी प्रदेश कमिटीमा सर्वसम्मत चयन भए । साेही जिल्लाबाट निर्वाचनमा ध्रुव आचार्य र पर्शुराम श्रेष्ठ पराजित भए ।

बाँकेबाट एक जना विजयी भए भने तीन जना पराजित भए । विजयी हुनेमा पर्शुनारायण थारू छन् भने सुजन विक, दुर्गाप्रसाद चौधरी र सुरेन्द्र थापा पराजित भए । विक उपाध्यक्षमा, चौधरी उपसचिव र थापा सदस्यमा पराजित भएका हुन् । बर्दियाबाट शिवनारायण चौधरी र सझिधन बुढा निर्वाचित भए । द्रव्य शाह र शिव चौधरी पराजित भए ।

बागमती प्रदेश बागमती प्रदेशमा त पूर्वमाओवादीको न्यून उपस्थिति रहेको देखिन्छ । १४ जिल्लामा माओवादीबाट एमालेमा नै रहनेको संख्या धेरै नरहेको भए पनि प्रदेश कमिटीको अधिवेशनमा केही निर्वाचित भएका छन् भने केही पराजित भएका छन् ।

बागमती प्रदेशमा पूर्वमाओवादी दुई जना पदाधिकारीमा उम्मेदवार बने पनि पराजित भए । उपसचिवमा काभ्रेकी रिता ढकाल र उपाध्यक्षमा चितवनका अच्युत पन्त पराजित भए । पूर्वमाओवादीका प्रदेश कमिटी सदस्यमा भने कही निर्विरोध त केहीबाट चुनावबाट निर्वाचित भएका छन् ।

दोलखाबाट प्रदेश कमिटी सदस्यमा कृष्ण भुजेल र लक्ष्मण गोभाजु विजयी भए भने केशव चौलागाई पराजित भए । काभ्रेबाट रमेश पन्त, चूडामणि गौतम, जितवबहादुर रानामगर र नोर्बु लामा विजयी भए ।

सिन्धुपाल्चोकबाट विदुर भारती र आङछिरिङ शेर्पा विजयी भए । धादिङबाट ईश्वरी रिजाल प्रदेश कमिटी सदस्य बनेका छन् ।

रसुवाबाट चमेली विक र नुवाकोटबाट अजितमान तामाङ प्रदेश कमिटी सदस्य निर्वाचित भएका छन् ।

चितवनबाट अन्जन तिमिल्सेना, जगनाथ आचार्य र दिवश पाण्डे प्रदेश कमिटी सदस्यमा चयन भएका छन् ।

भक्तपुरबाट भास्कर श्रेष्ठ र मिलन सुवाल निर्वाचित भए । ललितपुरबाट शरोज ढंगोल र दिनेश अछामी सर्वसम्मत र रामहरि बजगाईं चुनावमा विजयी भएका छन् ।

मकवानपुरबाट पाँच जना प्रदेश कमिटीमा निर्वाचित भएका छन् । जसमा दिलबहादुर घिसिङ र नवराज तिमल्सेना निर्वाचनबाट र बलराम बल, दोर्जे लामा पाख्रिन छिरिङ तथा बरि बल सर्वसम्मत सदस्यमा चयन भएका हुन् ।

रामेछापबाट तीन जना प्रदेश कमिटी सदस्यमा उम्मेदवार बनेका थिए तर तीन जना पराजित भए । पराजित हुनेमा भुवन विक्रम घिमिरे, ज्ञानकुमार योन्जन र टंक चौलागाई रहेका छन् ।

कर्णाली प्रदेश प्रदेशमा उपसचिवमा पूर्वमाओवादीका बखत भण्डारी पराजित भए । सदस्यमा गगन शाही र कृष्ण आचार्य पराजित भए । प्रदेश कमिटी सदस्यमा केही सर्वसम्मत त केही निर्वाचनमा प्रतिस्पर्धा गरेर चयन भएका छन् ।

टेकबहादुर बोगटी, सर्व घर्ती, जनक सुनार, महेन्द्रबहादुर शाही, गणेश चिन्तन प्रदेश कमिटी सदस्यमा निर्वाचित भएका छन् ।

कोशी प्रदेशमा पूर्वमाओवादीहरू पदाधिकारीमा कोही पनि परेनन् । तर प्रदेश सदस्यमा भने १५ जना सर्वसम्मत र ९ जना निर्वाचित भएका छन् ।

ओखलढुङ्गाबाट बालकृष्ण ढुङ्गेलका भाइ केशवहरि ढुङ्गेल सर्वसम्मत भएका छन् । साेही जिल्लाबाट निर्वाचनमा पराजित हुनेमा सुरेश थापा र सुदीप सुनुवार छन् ।

सोलुखुम्बुबाट महेश किराँती निर्विरोध निर्वाचित भएका छन् । खोटाङबाट कमल बुढाथोकी, राजनप्रसाद ढकाल सर्वसम्मत भएका छन् ।

भोजपुरबाट प्रेम कार्की सर्वसम्मत प्रदेश कमिटी सदस्यमा चयन भएका छन् । धनकुटाबाट गणेशप्रसाद राई, देवकुमार राई सर्वसम्मत भएका छन् ।

ताप्लेजुङबाट देव आङबुहाङ, राजकुमार चुडाल सर्वसम्मत भएका छन् । इलामबाट राजु थापा र सुमन नेम्वाङ सर्वसम्मत चयन भएका छन् । त्यस्तै, उदयपुरबाट जीवन कार्की सर्वसम्मत प्रदेश कमिटीमा चयन भएका छन् ।

निर्वाचन लडेर विजयी हुनेमा उदयपुरकी सृजना तामाङ, सुनसरीबाट माया पोखरेल, झापाबाट कुमार भुजेल, मोरङबाट देवराज भण्डारी, प्रकाश राई, दिलीप दवाडिया , बालेश्वर कामत र फूल थुङ्गा खतिवडा रहेका छन् ।

धनकुटाबाट बलबहादुर राई, गणेश कुमार राई, प्रकाश राई र रामकुमारी राई रहेका छन् । संखुवासभाबाट विपिन तामाङ पनि प्रदेश कमिटीमा चयन भएका छन् ।

अहिले पूर्वमाओवादीहरू पनि कुनै पनि प्रदेशमा पूर्वमाओवादी हौँ भनेर सार्वजनिक रूपमा बहस छलफल नगर्ने गरेको नेताहरू बताउँछन् ।

प्रकाशित मिति: शुक्रबार, असोज १९, २०८० २१:०३