हिक्मतपछि मुख्यमन्त्रीमा मेरो दाबी हुन्छ : केदार कार्की (अन्तर्वार्ता)

A+ A A-

प्रदेशसभाको दोस्रो कार्यकालका चौथा मुख्यमन्त्री हिक्मत कार्कीले भोलि शनिबार विश्वासको मत लिँदै छन् । भदौ २२ गते सर्वोच्चको परमादेशले मुख्यमन्त्री संविधानको धारा १६८ को उपधारा (३) अनुसार नियुक्त भएका थिए । ९३ सदस्यीय प्रदेशसभामा एमालेका ४० सांसद छन् । बहुमतका लागि ४७ सदस्य आवश्यक पर्छ । एमालेनिकट देखिएको राप्रपाले कांग्रेस र एमालेको सरकार बनाए स्थायी हुने बताउँदै आएको छ । राप्रपाका ६ सांसद छन् ।

गठबन्धन दल कांग्रेसका २९, माओवादी केन्द्रका १३, एकीकृत समाजवादीका ४ र जनता समाजवादी पार्टीका १ जना सांसद छन् ।

संविधानको धारा १६८ को उपधारा (५) बमोजिम नियुक्त मुख्यमन्त्रीले उपधारा (४) अनुसार विश्वासको मत प्राप्त गर्न नसके वा मुख्यमन्त्री नियुक्त हुन नसके मुख्यमन्त्रीको सिफारिसमा प्रदेश प्रमुखले प्रदेशसभा विघटन गरी ६ महिनाभित्र अर्को प्रदेशसभा निर्वाचन सम्पन्न हुने गरी निर्वाचन मिति तोक्ने संवैधानिक व्यवस्था छ ।

सो धाराको उपयोग गर्न कांग्रेसका संस्थापनइतर समूहका नेता केदार कार्कीले आफू तयार रहेको बताएका छन् । संस्थापन समूहका उद्धव थापा कोशी प्रदेशको संसदीय दलका नेता पनि छन् । थापाले पनि तेहेरिने बताउँदै आएका छन् । यसै सन्दर्भमा कार्कीसँग शिलापत्रले गरेको कुराकानीको सम्पादित अंश:

मुख्यमन्त्रीमा तपाईंको तयारी छ कि छैन ? धारा ५ मा पुग्दा पार्टीको ह्वीप लाग्दैन, जोकोही सदस्यले दाबी गर्न पाउँछन् ?

म पनि कोसिस गर्दै छु ।

त्यसका लागि कांग्रेसभित्रका मत तानेर मात्र पुग्दैन । अन्य दलहरूसँग पनि सहकार्य गर्नुपर्ने हुन्छ । तयारी कस्तो छ ?

समानान्तर रूपमा सबै माननीयहरूसँग कुरा गर्दै छु ।