दुर्गमका शिक्षा ज्योति ‘जोशी सर’ सम्मानितः पञ्चायतकालमा बर्खास्त, बहुदल आएपछि पुनर्वहाली

दुर्गमका शिक्षा ज्योति ‘जोशी सर’ सम्मानितः पञ्चायतकालमा बर्खास्त, बहुदल आएपछि पुनर्वहाली

A+ A A-

पञ्चायतकालको मध्यतिरसम्म पहाडी जिल्लाका दुर्गम गाउँहरूमा विद्यालय बिरलै थिए । परिणामतः विद्यालयको पहुँजभन्दा बाहिर धेरै बालबालिका थिए । यसले पिरोल्थ्यो- चित्रकुमार जोशी उर्फ ‘जोशी सर’लाई ।

पूर्वी पहाडी जिल्ला पाँचथरको दक्षिण-पश्चिम क्षेत्रको तत्कालीन दुर्गम नेवारगाउँ र त्यस आसपासका धेरै बालबालिका पनि शिक्षाबाट बञ्चित थिए । जोशी सरलाई ती बालबालिकालाई विद्यालयको पहुुँजमा पुर्‍याउने चाहना भयो । उनका अनुसार ५ फागुन २०३४ मा तत्कालीन स्याउलाको छाप्रे विद्यालय त्रिवेणी प्रा.वि.को शिक्षक भएपछि ती बालबालिकालाई विद्यालयमा भर्ना गरे । त्यसबेला गरेको दुःख सम्झिँदै उनले शिलापत्रसँग भने, ‘रातमा राँको बालेर गाउँमा घरघर डुलेर विद्यार्थी जम्मा गरेको थिएँ ।’

उनै जोशीले प्रा.वि.लाई नि.मा.वि. बनाउने क्रममा रातिराति गाउँका साहु महाजनको घरमा गई आफैँ ब्याज ब्यहोर्नेगरी ऋण नै काडे । यसरी दुर्गम क्षेत्रमा शिक्षाको ज्योति फैलाउन गरेको शैक्षिक संघर्षको स्मरण गर्दै हाल मा.वि. भइसकेको त्रिवेणी मा.वि.ले जोशीलाई अन्तर्राष्ट्रिय शिक्षक दिवसका अवसरमा सम्मान गरेको छ । २०१९ सालमा स्थापित उक्त विद्यालयमा २४ वर्ष अध्यापन गर्ने क्रममा उनी प्रधानाध्यापकसमेत भए ।

वामपन्थी विचारधाराबाट प्रभावित उनी ११ चैत २०४४ मा पञ्चायती सरकारबाट बर्खास्तीमा परेका थिए । बर्खास्तीमा पर्नुको कारण वामपन्थी राजनीतिक संलग्नताको आरोप थियो । तर, २०४६ सालको पहिलो जनआन्दोलनको बलमा पञ्चायती शासनको अन्त्यपछि प्रजातन्त्रको पुनःस्थापना भएसँगै उनको पुनर्वहाली भयो ।

यसरी दुर्गभ भेगमा शिक्षाको ज्योति बनेका शिक्षासेवी जोशीले धर्मपत्नी इन्द्रकमला जोशीसँगै सम्मान ग्रहण कार्यक्रममा भने, ‘रातदिन नभनेर, भोकतिर्खा बिर्सेर समाज उज्यालो बनाउने मेरो अथक यात्रालाई विद्यालय परिवारले सम्झियो । मैले फलामे टुकी बालेर पढाएका विद्यार्थीहरू आज कोही यहीँ विद्यालयका शिक्षक भए । कतिपय विशिष्ट पदमा पुगेका छन् । मेरो जीवन नै यहीँ बिताएर गरेको योगदानप्रतिको यो सम्मानले भावुक भएको छु ।’