अब मनाङकाे स्याउ मनाङमै खपत, खुल्याे वाइन कारखाना

फाइल तस्वीर ।

A+ A A-

हिमाली जिल्ला मनाङको स्याउ अब मनाङमै खपत हुने भएको छ । यहाँ उत्पादित स्याउ अन्तर्राष्ट्रिय बजारसम्म पुग्ने भए पनि यसको परिकार फेर्दै विश्व बजारमा निर्यात गर्ने उद्देश्यले स्याउको वाइन उत्पादनको सुरुआत गरिएको छ ।

मनाङ वेभरेज प्रालिले मनाङ ङिस्याङ गाउँपालिका– ४, हुम्देमा वाइन कारखाना सञ्चालनमा ल्याई कम्पनीले स्याउको उत्पादनलाई परिस्कृत गर्ने उद्देश्यले वाइन कारखाना सञ्चालनमा ल्याएको हो । यो कारखाना सञ्चालनमा आएसँगै अब मनाङको स्याउ मनाङमै खपत हुने भएको छ । अब यहाँको स्याउको मुख्य बजार पनि मनाङ नै हुने देखिएको छ ।

मनाङ वेभरेजले सञ्चालनमा ल्याएको यो कारखानासँग वार्षिक २ लाख लिटर वाइन उत्पादन गर्ने क्षमता छ । यसबाट उत्पादित वाइन पनि कम्पनीले सार्वजनिक गरिसकेको छ । कम्पनीले मनाङको ३ हजार ५ सय मिटर उचाइमा रहेको साब्जे लेकमा कार्यक्रम गरी ‘मनाङ भ्याली वाइन’ सार्वजनिक गरेको थियो ।

उत्पादित वाइनको मूल्य १ हजार २५ निर्धारण गरिएको छ । वेभरेजका प्रबन्ध निर्देशक आश्रय रञ्जितकारले भने, 'हामीले तीन वर्षको कडा मिहिनेत र अध्ययन तथा अनुसन्धानपछि वाइन कारखाना सञ्चालनमा ल्याएका छौँ, यसमा अन्तर्राष्ट्रियस्तरका मापदण्ड पूर्ण रूपमा पालना गरेका छौँ, यसले मनाङमा स्याउ उत्पादनलाई थप टेवा पुग्नेछ भने बजार अभाव समस्या पनि अन्त्य गर्नेछ ।'

उनका अनुसार, हाल मनाङमा करिब ८ सयदेखि १ हजार टन स्याउ उत्पादन हुने गरेको छ । यहाँ उत्पादित स्याउ कारखानाका लागि पर्याप्त हुनेछ । अबको ५ वर्षसम्म यहीँको स्याउ पर्याप्त हुने भए पनि त्यसपछि भने मुस्ताङ, हुम्लालगायत जिल्लामा पनि क्षेत्र विस्तार गर्नुपर्ने अवस्था आउन सक्ने उनकाे अनुमान छ ।

कम्पनीले वाइन कारखाना सञ्चालनका लागि मात्रै करिब १० करोड रुपैयाँ लगानी गरेको छ । हाल कारखानामा प्रत्यक्ष रूपमा करिब ३५ देखि ४० जनाले रोजगारी पाएका छन् भने अप्रत्यक्ष रोजगारी पाउनेको सङ्ख्या करिब ५ सय छ ।

प्रबन्ध निर्देशक रञ्जितकारले भने, 'पूर्वाधार र बाटोको असहज अवस्थाका कारण कारखानाका लागि आवश्यक सामग्री पुर्‍याउन निकै कठिन भएको थियो, अब वाइन उत्पादन गरेर बजार पुर्‍याउने चुनौती पनि रहेको उनले स्पष्ट पारे ।

व्यावसायिक स्याउखेती वृद्धि

प्राकृतिक रूपमा मनाङको चर्चाजस्तै मनाङको स्याउको पनि चर्चा उत्तिकै छ । जतिबेला एग्रो मनाङ प्रालिले ७ सय ३५ रोपनी क्षेत्रफल जग्गामा एकैपटक स्याउ खेतीको व्यावसायिक खेती थाल्यो । मनाङ एग्रोले करिब ६ वर्षअघि इटाली र सर्बियाबाट स्याउका बिरुवा ल्याएर खेती गर्न सुरु गरेको हो । हाल स्याउखेती पर्यटकको आकर्षणको केन्द्र पनि बन्दै गएकोे छ ।

स्याउ फार्ममा गाला, फुजी र गोल्डेन डिलिसेस गरी तीन प्रजातिका करिब ६० हजार बिरुवा लगाइएको छ । करिब २० अर्ब लगानीमा सुरुआत भएको यस फार्मबाट उत्पादित स्याउ एग्रो मनाङले हिमालयन फ्रेस ब्रान्ड नाममा बजारसम्म पुर्‍याउँदै आएको छ । यस फार्ममा हाल २८ जनाले रोजगारी पाएका छन् भने सिजनमा ३५ देखि ४० भन्दा बढीले काम गर्ने गरेका छन् ।

एग्रो मनाङ प्रालिका प्रबन्ध निर्देशक युवराज गुरुङका अनुसार गत वर्ष यस फार्मले ४ सय ५० टन स्याउ उत्पादन गरेको थियो भने यस वर्ष ६ सय ५० टन उत्पादन गर्ने लक्ष्य लिएको छ । वाइन कारखानाका लागि यस फार्मले प्रतिकिलो ५० रुपैयाँमा स्याउकाे काराेबार गरिरहेको छ । नेपाली स्याउले यहाँको बजारको करिब १० प्रतिशत मात्रै माग धान्न सक्ने भएकाले आफूले स्याउखेती अगाडि बढाएको गुरुङ बताउँछन् ।

'एग्रो मनाङको फार्म हाउस दक्षिण एसियाकै सबैभन्दा ठूलो हो । यसका साथै मनाङको पिसाङमा पनि तीन सय ८० रोपनीमा गत वर्षबाट स्याउखेती सुरु भएको छ, यसरी बजार सुनिश्चितता बढ्दै जाँदा स्याउको व्यावसायिक खेती गर्नेको सङ्ख्या पनि बढ्दै गएको छ,' गुरुङले भने ।

उनले हाल एग्रो मनाङ फार्ममा प्रतिहेक्टर ४० टन स्याउ उत्पादन भएको जानकारी दिए । यस फार्मले करिब ६० हजार स्याउका बोटबाट उत्पादन लिइरहेको छ । मनाङ एग्रोको स्याउ फार्मसँगै मनाङ वेभरेजको वाइन कारखानामा खपत हुनेछ । यससँगै मनाङ एग्रोको कोल्ड स्टोर पनि छ । जसमा स्याउलाई ग्रेडिङ गरी भण्डारण गर्ने, बिक्री गर्ने र बजारसम्म पठाउने कामका साथै कारखानालाई पनि त्यहीँबाट छुट्याउने काम हुन्छ । मनाङ वेभरेजले जिल्लामा उत्पादित सबैको स्याउलाई वाइन बनाउन कारखानामा लिने जनाएको छ । (राससकाे सहयाेगमा)

प्रकाशित मिति: शनिबार, असोज २०, २०८० ०५:३०