'जीएआई फुड एन्ड वेभरेज एन्ड हस्पिटालिटी २०२३' असोज १८ देखि सञ्चालन हुँदै, १५० स्टल रहने

'जीएआई फुड एन्ड वेभरेज एन्ड हस्पिटालिटी २०२३' असोज १८ देखि सञ्चालन हुँदै, १५० स्टल रहने

A+ A A-

काठमाडौंको भृकुटीमण्डपमा यही असोज १८ गतेदेखि 'जीएआई फुड एन्ड वेभरेज एन्ड हस्पिटालिटी २०२३' एक्स्पोको आयोजना हुने भएको छ । यो एक्स्पो विशेष रूपमा खाद्य, पेय पदार्थ र आतिथ्यमा केन्द्रित नेपालमा सबैभन्दा तीव्र वृद्धिदर भएको यस क्षेत्रको एक मात्र बृहत् एक्स्पो भएको आयोजकले जनाएका छन् ।

यही असोज २१ गतेसम्म सञ्चालन हुने यस एक्स्पोमा ३० हजारभन्दा बढी आगन्तुकहरूको सहभागिता रहने आयोजकको अपेक्षा छ । एक्स्पोमा आउने आगन्तुकहरूमध्ये करिब १५ हजार व्यावसायिक आगन्तुकहरू रहने आयोजकले बताएका छन् ।

एक्स्पोमा होटल व्यवसायी, रेस्टुरेन्ट, क्लब, बार, पब, पार्टी प्यालेस, क्यान्टिन, सुपर मार्केट, ग्रोसरी मार्ट, किराना पसल, बेकरी, स्न्याक्स उत्पादक, कृषि खाद्य प्रशोधन उत्पादकहरूका मालिक तथा प्रबन्धकहरू, केटररहरू, शेफहरू, बारटेन्डर र बरिस्टाहरूको सहभागिता बाक्लो रहनेछ । यो एक्स्पो खानपिनकेन्द्रित भएकाले उपभोक्ताहरूको पनि बाक्लो उपस्थिति रहने आयोजकको भनाइ छ ।

आयोजकका अनुसार, यस मेलामा आगन्तुकहरूले खाना, पेय पदार्थ र आतिथ्य उत्पादन तथा सेवाहरूका बारेमा विस्तृत रूपमा बुझ्न पाउनेछन् । गत वर्षको तुलनामा यस वर्ष २५५ ले प्रदर्शकहरूको सङ्ख्यामा पनि वृद्धि भएको छ । मेलामा ५ हजार उत्पादन सेवाहरू, २ सय कम्पनी रहनेछन् भने १८ सय वर्गमिटरभन्दा माथिका १५० स्टलहरू रहनेछन् ।

कार्यक्रममा कम्पनीहरूले आफ्ना उत्पादनहरूको विशेषता, स्किम वा अफर्स, स्वाद आदिका बारेमा विस्तृत जानकारी दिने भएकाले आगन्तुकहरूका लागि नयाँ खाना र पेय पदार्थहरूको स्वाद लिन यो एक उत्कृष्ट अवसर हुनेछ । साथै, यो कार्यक्रम खाद्य, पेय र आतिथ्यबारे अवलोकन गर्न, अन्तर्क्रिया गर्न, भाग लिन वा नयाँ सम्पर्कहरू बनाउन र जानकारी प्राप्त गर्न आगन्तुकहरूका लागि महत्त्वपूर्ण स्थान हुन सक्ने आयोजकको दाबी छ ।

आफ्नो व्यापार व्यवसायलाई नयाँ उचाइमा पुर्‍याउन जीएआई फुड एन्ड वेभरेज एन्ड हस्पिटालिटी २०२३ प्रभावकारी सञ्चार र विज्ञापन प्लेटफर्म साबित हुने आयोजकको भनाइ छ । ३ दिनसम्म सञ्चालन हुने उक्त एक्सपोमा हजारौँ सम्भावित ग्राहकहरूसँग प्रत्यक्ष भेट गराउनेमा आयोजक विश्वस्त छन् ।

यस वर्ष जीएआई फुड एन्ड वेभरेज एन्ड हस्पिटालिटी २०२३ ले मोबाइल एपलाई व्यावसायिक आगन्तुक प्रवर्द्धनको मुख्य विशेषताको रूपमा प्रस्तुत गरेको छ । मोबाइल एपद्वारा दर्ता गर्ने कार्यले व्यापार, आगन्तुक प्रवर्द्धनलाई सहज बनाउनेमा आयोजक विश्वस्त छन् । यसको प्रयोगले प्रत्यक्ष अप्रत्यक्ष सबै आगन्तुकहरूको डाटा पनि सहजै सङ्कलन हुने भएको छ । यसले गर्दा प्रदर्शकहरूका लागि पनि धेरै सजिलो हुने आयोजकले बताएका छन् ।

प्रकाशित मिति: बुधबार, असोज १७, २०८० १३:१०