करणले फुटेकाे ब्याटले खेलेकाेबारे के भन्छन् क्यान अध्यक्ष चन्द ?

A+ A A-

एसियाली खेलकुदको पुरुष क्रिकेटअन्तर्गत क्वार्टरफाइनल खेलमा मंगलबार नेपालले भारतसँग सम्मानजनक पराजय भाेग्याे । अत्यन्त प्रतिस्पर्धात्मक खेलमा नेपालले भारतलाई कडा टक्कर दिँदै २३ रनले पराजित भएकाे थियाे । कमजाेर स्राेतसाधनका बाबजुद क्रिकेटकाे महारथि भारतलाई कडा टक्कर दिएकाे भन्दै नेपाली टाेलीकाे चाैतर्फी प्रशंसा भइरहेकाे छ ।

तर मंगलबार दिउँसाेबाट सामाजिक सञ्जालमा सार्वजनिक भएकाे एक तस्वीरले भने धेरैकाे ध्यान खिचेकाे मात्रै छैन, नेपाल क्रिकेट संघ र सरकारकै आलाेचना भइरहेकाे छ । कुरा हाे नेपाली क्रिकेटर करण केसी र उनले उचालेकाे फुटेकाे ब्याटकाे । भारतविरुद्ध इनिङकाे अन्त्यतिर मैदान उत्रेका उनले १३ बलकाे सामना गर्दै २ छक्का र एक चाैकाकाे मद्दतले १८ रन जाेडेका थिए ।

सामाजिक सञ्जालमा भाइरल तस्वीर

तर सार्वजनिक भएकाे तस्वीरमा उनकाे ब्याट फुटेकाे देखिन्छ । करणले खेल्दाखेल्दै ब्याट फुटेकाे अनुमान गर्न सकिन्छ । याे विषयलाई सामाजिक सञ्जालका प्रयाेगकर्ताले नेपाली खेलाडीसँग अतिरिक्त ब्याट नभएकाे रूपमा अर्थ्याएर प्रचार गरिरहेका छन् । यसबारे हामीले क्यान अध्यक्ष चतुरबहादुर चन्दसँग जिज्ञासा राख्याैँ । उनले भने, 'करण नेपाल आउँदैछ, यसबारे उसैलाई साेध्नुहाेला ।'

नेपाली खेलाडीसँग अतिरिक्त ब्याट नभएकाे हाे भन्ने प्रश्नमा उनले प्रस्टीकरण दिँदै भने, 'हामीसँग प्रशस्त ब्याट छन् । महँगा–महँगा ब्याट छन् । खेलाडीहरूले प्रायाेजित ब्याट प्रयाेग गरेका हुन्छन्, त्यसबाफत पैसा लिएका हुन्छन् । हिजाे फुटेकाे ब्याटले किन खेलियाे त्याे कुरा त अब करणसँगै साेध्नुपर्ला ।'

उनले नेपालमा सामाजिक सञ्जालमार्फत् कुरै नबुझेर विषयलाई अतिरन्जित पार्ने गरिएकाे गुनासाे गरे ।