चालु आर्थिक वर्षको असोज १५ सम्म १ खर्ब ६८ अर्ब ९१ करोड रुपैयाँ राजस्व संकलन

A+ A A-

चालु आर्थिक वर्षको असोज १५ गतेसम्म सरकारले १ खर्ब ६८ अर्ब ९१ करोड रुपैयाँ राजस्व संकलन गरेको छ ।

मंगलबार प्रतिनिधिसभा अन्तर्गतको अर्थसमिति बैठकमा अर्थ मन्त्रालयले वर्तमान अर्थतन्त्रको अवस्थाको विषयमा जानकारी दिँदै यस्तो बताएको हो ।

समिति बैठकमा बोल्दै अर्थ मन्त्रालयका सह–सचिव बाबुराम सुवेदीले वार्षिक लक्ष्य १४ खर्ब २२ अर्ब ५४ करोडको तुलनामा ११.८७ प्रतिशत राजस्व संकलन भएको जानकारी दिए । उनले सरकारको चालु आर्थिक वर्षको चालु खर्च १ खर्ब ४२ अर्ब ६३ करोड, पुँजीगत खर्च १० अर्ब ८३ करोड र वित्तीय व्यवस्था ३७ अर्ब ४२ करोड रहेको बताए ।

उनले चालु खर्च र पुँजीगत खर्च र वित्तीय व्यवस्थातर्फ ४७.४ प्रतिशतले खर्च वृद्धि भएको उल्लेख गर्दै सरकारको कुल खर्च १ खर्ब ९० अर्ब ८८ करोड रहेको बताए । उनले आर्थिक वर्षमा आन्तरिक ऋणतर्फ ७७ अर्ब १३ करोड र वाह्य ऋणतर्फ ४ अर्ब ९७ गरी जम्मा ६९ अर्ब १८ करोड सार्वजनिक ऋण परिचालन भएको जनाए ।

उनले चालु आर्थिक वर्ष २०८०/०८१ को भदौ महिनासम्म १० अर्ब ६३ करोड बराबरको वैदेशिक सहायता प्रतिवद्धता प्राप्त भएको जानकारी दिए । उनले आर्थिक वर्षको भदौसम्म उद्योगबाट १४ अर्ब ६५ करोड बराबरको प्रत्यक्ष वैदेशिक लगानी स्वीकृत भएको पनि बताए ।

उनले २०८० भदौ मसान्तसम्म उद्योग विभागबाट ४ खर्ब ६४ अर्ब ६२ करोड बराबरको वैदेशिक लगानी स्वीकृत भएको उल्लेख गरे । उनले लगानी बोर्डबाट ४२ परियोजनाका लागि १२ खर्ब ५० अर्ब बराबरको लगानी स्वीकृत भएको जानकारी दिए । उनले चालु आर्थिक वर्षको साउन महिनामा २ अर्ब ६५ करोड बराबरको वैदेशिक लगानी भित्रिएको उल्लेख गर्दै गत आर्थिक वर्षको साउन महिनामा यस्तो लगानी ४१ करोड मात्रै रहेको बतए ।

उनले सन् २०२३ को अगस्टसम्म आठ महिनाको अवधिमा नेपाल भित्रिने पर्यटकको संख्या सन् २०२२ को सोही अवधिको तुलनामा ८४ प्रतिशतले वृद्धि भई ६ लाख १ हजार ३ सय ६० पुगेको बताए । उनले पुँजीबजार र बैंकको ब्याजदरलाई प्रतिस्पर्धामा नै छाड्ने अर्थ मन्त्रालयको नीति रहेको बताए ।

त्यस्तै समिति बैठकमा बोल्दै अर्थ मन्त्रालयका राजस्व सचिव डा.रामप्रसाद घिमिरेले सरकारको राजस्व संकलन उत्साहजनक रुपमा नभएको उल्लेख गरे ।

प्रकाशित मिति: मंगलबार, असोज १६, २०८० १७:२५