गण्डकीको गुटले दोधारमा पद्‌मा

A+ A A-

२०७४ सालको प्रतिनिधिसभाको निर्वाचनमा नेपाली कांग्रेसका नेता गोपालमान श्रेष्ठलाई हराएपछि एकाएक चर्चामा आएकी थिइन्, हालकी नेकपा एमाले सचिव पद्‌मा अर्याल । त्यसयता सत्ता र पार्टीमा शक्तिमा रहेकी पद्‌मा आफ्नो गृहप्रदेश गण्डकीको पार्टी अधिवेशनसँगै दोधारमा परेकी छन् ।

गण्डकीका दुई समूहमध्ये कुन समूहलाई रोज्ने भन्नेमा उनी अझै दोधारमा छिन् । गण्डकीमा नेतृत्व छान्न बुधबार दिउँसो मतदान हुँदै छ । केन्द्रमा पद्‌मा उपाध्यक्ष विष्णु पौडेलनिकट मानिन्छिन् । गण्डकीमा पौडेल समूहको नेतृत्व उपमहासचिव पृथ्वीसुब्बा गुरुङले गर्छन् । अहिले प्रदेशको अधिवेशनमा पद्‌माले पृथ्वीसुब्बालाई सहयोग नगर्ने महासचिव शंकर पोखरेल र स्थायी कमिटी सदस्य खगराज अधिकारीनिकट नेताहरूको दाबी छ ।

अध्यक्षका उम्मेदवार मायानाथ अधिकारी आफूनिकट भएको विश्वास पद्‌मालाई छ । पद्‌मा मायानाथलाई सहयोग गर्न चाहन्छिन् । मायानाथ पोखरेल-अधिकारी पक्षबाट अध्यक्षको उम्मेदवार बन्दै छन् । पोखरेल-अधिकारीनिकट एक नेताले भने, ‘उहाँ मायानाथ कमरेडको पक्षमा हो । त्यसैले हामीतिर आउन तयार हुनुहुन्छ तर उहाँको पछाडि भएकाले जानु हुँदैन भन्ने कुरा गर्नुभएको छ । यहाँनेर केही समस्या छ ।’ माले पृष्ठभूमिका नेता र प्रतिनिधि बनेर आएकाहरू विभाजित हुने डरले पद्‌माले कुन समूह रोज्ने भनेर अझै निर्णय गर्न सकेकी छैनन् ।

पोखरेल-अधिकारी समूहको कुरा सुनेपछि हामीले पौडेल-गुरुङ समूहका नेतासँग पनि कुरा गरेका थियौँ । सचिव अर्यालले साथ छोडिहाल्ने विश्वास यो समूहलाई छैन । ‘हिजो विष्णु कमरेड महासचिव नबन्ने भएपछि उहाँले पद्‌मा कमरेडलाई सचिव प्रस्ताव गरेको होइन ? यो कुरा उहाँलाई थाहा छ,’ ती नेताले भने, ‘पद्‌मा कमरेड सचिव नभएको भए खगराज हुनुहुन्थ्यो होला । प्रतिस्पर्धी नै मिल्ने कुरा कसरी होला र ?’

गत शनिबार पोखरा आएदेखि पद्‌मा लेकसाइडको शान्तिपाटन गल्लीमा रहेको अतिथि रिसोर्टमा बसेकी छन् । उनलाई भेट्न पौडेल-गुरुङ र पोखरेल-अधिकारी समूहका नेता त्यहीँ पुगेका छन् । पदाधिकारी हुन चाहनेहरूको पनि उक्त रिसोर्टमा बाक्लै आउजाउ छ । यसरी त्यहाँ पुग्नेमा नेकपा माले पृष्ठभूमिका नेता धेरै छन् । पद्‌माले व्यवसायी पुष्पज्योति ढुंगानालाई आफ्नो दूत बनाएर दुवै गुटतिर निरन्तर छलफल चलाइरहेकी छन् ।

पद्‌मा र स्थायी कमिटी सदस्य किरण गुरुङ अझै पनि सर्वसम्मतिको प्रयासमा छन् । पद्‌मा मायानाथलाई अध्यक्ष बनाउनुपर्ने लाइनमा छिन् । पृथ्वीसुब्बा पक्षले नवराज शर्मालाई रोज्दा उनले कित्ता फेर्ने सम्भावनाबारे चर्चा चलेको हो । स्याङ्जामा गत स्थानीय तह र प्रदेशको चुनावमा टिकट वितरणमा पद्‌माले एकलौटी गरेकोमा अहिले प्रतिनिधि बनेर आएकाहरू असन्तुष्ट छन् । तिनैमध्येका एक हुन्, मीनप्रसाद गुरुङ । उनलाई पद्‌माले प्रतिनिधिसभा नभए पनि प्रदेश सभा १ (क) मा उम्मेदवार बनाउने आश्वासन दिएकी थिइन् ।

अन्तिम समयमा टिकट सीताकुमारी सुन्दासलाई दिएको भन्दै त्यसयता पद्‌मासँग मीनप्रसाद असन्तुष्ट छन् । स्याङ्जा १ मा लडेका नारायण मरासिनी र प्रदेशसभा लडेकी सुन्दास खगराज अधिकारीनिकट हुन् । आफूलाई पृथ्वीसुब्बा पक्ष भनेर ट्याग लगाएर अधिकारी पक्षले टिकट खोसेकाले उनी त्यता नजाने पक्षमा छन् ।

चुनावमा टिकट नपाएपछि मीनप्रसाद तीन महिनालाई बेलायत गएका थिए । आफूलाई धोका दिएको निष्कर्षसहित मीनप्रसाद पद्‌मा खगराज पक्षमा गए उनले रोजेको उम्मेदवारलाई मत नदिने पक्षमा छन् । पोखरेल-अधिकारीनिकट स्रोतले पनि मीनप्रसादको नाममा आफूहरूको समूहमा छलफल चलिरहेको बतायो ।

स्रोतकाअनुसार पद्‌माले मंगलबार बिहान पृथ्वीसुब्बालाई भेटेकी छन् । स्थायी कमिटी सदस्य किरणले पृथ्वीसुब्बासँगै ब्रेकफास्ट गरेका थिए । उनी पछिल्लो समय खगराज अधिकारी समूहतिर मिलेको भन्ने सुनिए पनि अहिलेसम्म सर्वसम्मत नै भनेर हिँडेका छन् । दुवैले मायानाथको नाममा सर्वसम्मत गर्नुपर्ने प्रस्ताव लिएर पृथ्वीसुब्बालाई भेटेका थिए ।

पृथ्वीसुब्बा आफ्नै गृहजिल्ला लमजुङका मायानाथ आफूइतर समूहसँग मिलेकोमा असन्तुष्ट छन् । मायानाथलाई अध्यक्ष बनाउनुपर्ने प्रस्तावमा पृथ्वीसुब्बाले समर्थन नजनाएपछि पद्‌मा र किरण मौन बस्ने रणनीतिमा छन् । किरणले मंगलबार दिउँसो फेसबुकमा स्टाटस लेखेर आफू बिरामी भएको जानकारी गराएका छन् । डेंगी संक्रमण भएकाले आफू आराम गरिरहेको उनको भनाइ छ । यसले उनी प्रदेश अधिवेशनको निर्णायक घडीमा सक्रिय नरहने पक्का भएको छ ।

पोखरेल-खगराज समूहले ९ सय ७ जनामध्ये १६ जना प्रतिनिधि पकडमा रहेको हिसाब निकालेको छ । अब किरण कसैको पक्षमा नखुल्दा यी मत कता जान्छन् भन्न सक्ने अवस्था छैन । त्यही समूहले पद्‌माको ७९ मत रहेको हिसाब गरेको छ । पद्‌माले गुटबन्दीमा लाग्न नहुने अभिव्यक्ति सोमबार अधिवेशनको उद्घाटन सत्रमा दिएकी थिइन् ।

‘अमूक कमरेडको नाममा व्यक्ति हाबी होइन, हामी एमालेको व्यक्ति हो भन्ने मनन् गर्नुपर्छ,’ अधिवेशनको उद्‌घाटन समारोहलाई सम्बोधन गर्दै उनले भनिन्, ‘व्यक्तिका मान्छे भएर विभाजित हुने होइन, पार्टीका मान्छे भएर हामी खडा हुने हो ।’

पद्‌मा-किरणले खगराजलाई रोजेमा यो पक्ष बलियो रहने देखिन्छ । पृथ्वीसुब्बालाई रोजेमा उनी बलियो हुनेछन् । आज रातभरमा पद्‌मा र किरणको समर्थन कसलाई रहन्छ वा तटस्थ बस्छन् भन्ने निर्क्यौल हुनेछ । मंगलबार साँझ ६ बजेसम्म उम्मेदवारी दर्ताको समय छ । उम्मेदवारी दर्तापछि आज रातभरमा पद्‌माले आफ्नो लाइन क्लियर गर्ने वा दुवै पक्षमा नखुली मौन बस्ने रणनीति रहेको बुझिएको छ । सर्वसम्मत नहुने देखिएमा पद्‌मा दुवै पक्षमा नखुली बुधबार काठमाडौं फर्किनेसम्मको चर्चा छ ।

गण्डकीमा कास्की, नवलपुर, स्याङ्जा र पर्वतको मत ५२ प्रतिशत छ । त्यसैले यी जिल्लाको मत जसले बढी आफ्नो पक्षमा पार्न सक्छ त्यही पक्षको उम्मेदवारले चुनाव जित्ने छ । दुवै पक्षका नेताहरू पद्‌माको गृहजिल्लामा के हुन्छ भन्नेमा छन् । स्याङ्जाका प्रतिनिधिको मत कसरी जान्छ त्यसमा दुई पक्षका उम्मेदवारको हार-जित निर्धारण हुने विश्लेषण दुवै समूहका नेताको छ ।

प्रकाशित मिति: मंगलबार, असोज १६, २०८० १४:४९