साह्रै झुलाएपछि संगीतकार दीपकले एरेन्जरलाई पठाएको त्यो मेसेज (भिडियाेसहित)

साह्रै झुलाएपछि संगीतकार दीपकले एरेन्जरलाई पठाएको त्यो मेसेज (भिडियाेसहित)

A+ A A-

तिमीबाहेक को छ र ?
बुझ्ने मेरो संसार
तिम्रो खुसीभन्दा पर
मेरो छैन कुनै रहर
चाहिँदैन तिमीबिनाको
सुनैको दरबार ।

०००

दुई वर्षअघि यो गीतले निकै चर्चा बटुल्यो । प्रमोद खरेल र अस्मिता अधिकारीको आवाजमा रहेको गीतको लय झन् धेरै रुचाइएको थियो । क्षितिज सापकोटाले लेखेकाे शब्दमा दीपकराज विश्वकर्माले लय भरेका थिए । युट्युबमा म्युजिक भिडियाेले १ कराेड १० लाखभन्दा बढी भ्युज पाइसकेकाे छ ।

म्याग्दीमा जन्मेका दीपक एक दशकदेखि संगीतिक क्षेत्रमा सक्रिय छन् । उनले संगीत गरेका अन्य थुप्रै गीतले स्रोताबाट उत्साहप्रद प्रतिक्रिया पाएका छन् । 'पिरतीकाे गुन्द्री' ‘पिउन सुरु गरेपछि’, ‘मखमली चोली ३’, ‘परदेशी’लगायत सयभन्दा बढी गीतमा उनले संगीत गरेका छन् ।

नेपाल प्रहरीका जागिरे २८ वर्षे दीपकले बिहान-बेलुकाको फुर्सदलाई खेर जान दिएका छैनन् । उनी भन्छन्, ‘१० वर्षदेखि निरन्तर संगीतमा छु तर अझै संघर्षशील नै छु भन्ने लाग्छ ।’

deepak raj bishwakarma1696579915.jpg

उनी संगीतकार मात्रै होइनन्, गायक, एरेन्जर, रचनाकार पनि हुन् भने मिक्सिङ पनि गर्छन् । उनले दर्जनौँ गीत गाइसकेका छन् । केही म्युजिक भिडियाेमा उनले अभिनयसमेत गरेका छन् । गीतका सबै काम एक्लै गर्न सक्ने भएकाले धेरैले उनलाई संगीतका प्याकेज नै भन्ने गरेका छन् । काठमाडाैंकाे अनामनगरमा उनकाे आफ्नै अडियो ल्याब रेकर्डिङ स्टुडियो छ, जहाँ म्युजिक एरेन्ज र मिक्सिङकाे काम दीपक स्वयम् गर्छन् । उनले आधुनिक, लोकपपदेखि काँठे भाकाका गीतहरू गाउनुका साथै संगीत पनि गरेका छन् । उनीचाहिँ आफूलाई संगीतकारकै रूपमा चिनाउन रुचाउँछन् ।

२०५२ सालमा जन्मेका दीपक म्याग्दीमा खड्ग गर्बुजाको ‘सालैजो’ सुन्दै हुर्किए । काँठे भाका, लोकगीतप्रति सानैदेखि रुचि थियो उनमा । दीपक १६ वर्षको हुँदा उनको परिवार चितवन बसाइँ सर्‍यो । चितवनमा उनले संगीत पनि सिके । त्यहाँ उनले केही समय रेडियोमा प्राविधिक बनेर कामसमेत गरे ।

खासमा रेडियाेले आयोजना गरेको कमेडी प्रतियोगितामा प्रथम पुरस्कार जितेका थिए दीपकले । बोल्न माहिर भएकाले उनलाई रेडियोका स्टेसन म्यानेजरले सोधे, ‘तिमी पुरस्कार लान्छौ कि जागिर खान्छौ ?’

भर्खरै एसएलसी दिएका दीपकलाई ढुंगा खोज्दा देउता मिलेझैँ भयो । उनले जागिर खाने विकल्प रोजे ।

दीपकको परिवारमा आमाबुबा, चार दिदी, एक भाइ र एक दाइ छन् । उनका दाजु हस्तबहादुरमा पियानोप्रति लगाव थियो । कतारमा काम गरी फर्किंदा उनले पियानो लिएर आएका थिए । संगीत सिकेका दीपकले त्यसमा अभ्यास गर्ने मौका पाए ।

उनको सपना गायक बन्ने थियो । उनले थुप्रै गीत गाएका पनि छन् । २०६८ सालतिर रेकर्ड भएको ‘तिमी राम्री हौ कि तिम्रो जोवन’ बोलको गीत नै दीपकको पहिलो गीत हो । गोकुल बीसीले लेखेको लोकपप गीतमा दीपक शर्माको संगीत छ । त्यसयता उनले दर्जनौँ गीतमा आवाज दिइसकेका छन् । तर, धेरैमाझ उनी संगीतकारकै रूपमा चिनिएका छन् ।

सांगीतिक क्षेत्रमा संघर्ष गर्ने क्रममा उनले लामाे समय दाेहाेरी साँझमा गाएका थिए । दुई वर्षयता भने दोहोरी साँझ छोडेर उनी आफ्नै स्टुडियोमा काम गरिरहेका छन् । संघर्षको समयमा आफूले निकै दुःख पाएको सम्झिँदै दीपक भन्छन्, 'मेरो स्टुडियोमा नयाँलाई विशेष प्रोत्साहन गर्छु । गीतसम्बन्धी सम्पूर्ण काममा मैले पूर्णतः सहयोग गर्दै आएको छु ।'

जागिरसँगसँगै संगीत

चितवनबाट काठमाडौं उनी प्रहरीको जागिर खान आएका थिए । ८ वर्ष भइसकेको छ, उनी प्रहरी सेवामा आबद्ध भएको । तर, संगीतको सपनालाई उनले थन्किन दिएनन् । बरु यस अवधिमा उनले आफूलाई ‘संगीतको प्याकेज’का रूपमा तयार गरेका छन् । उनी आफैँ लेख्छन्, आफैँ लय भर्छन्, आफैँ एरेन्ज, मिक्सिङ गर्छन् ।

अनि बने एरेन्जर

रुचिको विषय जसरी पनि सिक्ने दीपकको स्वभाव छ । गायक बन्न चाहन्थे उनी । तर, संगीतकारले झुलाइदिएपछि संगीत सिकेर आफैँ शब्दमा लय भर्न थाले । संगीत गरेर गीत रेकर्ड गर्थे । त्यसपछि एरेन्जरले झुलाइदिन थाले । निकै मिहिनेत गरेर उनले एरेन्ज गर्न पनि सिके । फेरि मिक्सिङ गर्न सिक्नुपर्छजस्ताे लाग्याे उनलाई ।

दीपक सम्झिन्छन्, ‘यो फिल्डमा नयाँ हुँदा एरेन्जरले एउटै गीतलाई डेढ वर्ष लगाइदिन्थे । कडा कुरा गरे नटिकिएला, असहयोग होला भन्ने डर हुन्थ्यो । त्यसैले आफैँ एरेन्ज गर्न सिकेँ, आफैँ मिक्सिङ गर्न सिकेँ ।’

उनी त्याे टेक्स्ट मेसेज सम्झिन्छन्, जुन एरेन्जरले झुलाएपछि उनले पठाएका थिए, 'तपाईंले मलाई जुन व्यवहार गर्नु’भो, मलाई कुनै गुनासो छैन । म भान्जालाई ड्राइभ लिएर पठाउँछु, त्यो फाइल कपी गरेर पठाइदिनुहोला हस् धन्यवाद ।'

त्यसपछि एरेन्जरले तुरुन्तै समय दिएर गीत तयार गरिदिएको उनी बताउँछन् । 'तर मैले जसरी पनि एरेन्ज सिक्छु भन्ने अठोट गरिसकेको थिएँ । महिनौं युट्युबमा झुण्डिएँ । गुरुसँग कक्षा पनि लिएँ', दीपकले सुनाए ।

उनले अघिल्लो पुस्तादेखि नयाँ पुस्ताका गायक, गायिकासँग काम गरिसकेका छन् ।

भाइरल हुने रहर छैन

दीपक आफू भाइरलहरूको होडबाट अलग्गै रहेको बताउँछन् । भन्छन्, 'म संगीत साधना, मिहिनेत र निरन्तरतामा विश्वास गर्छु ।'

आफूसँग ज्ञान, सीप छ भने दीर्घ सफलता हात पर्ने उनको विश्वास छ । 'भाइरल नै हुने चाहना भए म काँठे भाका, लोकपपतिर लाग्ने थिइनँ होला । अहिले जे चल्छ, त्यतै जोड दिन्थेँ । तर सिर्जना गरेर मात्र हुँदैन, त्यसले केही न केही छाप छोड्नुपर्छ, यो क्षेत्रमा योगदान गर्नुपर्छ भन्ने मेरो मान्यता छ,' उनले भने ।

नेपाल प्रहरीमा उनको जागिर सञ्चार शाखामा छ । उनी रेडियो नेपालमा प्रहरीको कार्यक्रम चलाउँछन् । बिहान ९ बजेदेखि ६ बजेसम्म पूर्ण समय उनी जागिरमै लगाउँछन् । अफिस जानुअघि र पछिको समय उनी स्टुडियोमा खट्छन् ।

उनले हामीसँग सांगीतिक क्षेत्रका आफ्ना भोगाइ अनुभव सुनाएका छन् । भिडियोमा हेरौँ, गायक, संगीतकार दीपकराज विश्वकर्मालाई:

भिडियाे