प्रधानमन्त्री र मन्त्री फेर्ने शेखर र गगनको प्रस्तावमा पार्टीले के गर्छ ?

A+ A A-

नेपाली कांग्रेस ९ मन्त्रालयसहित सरकारमा छ । सरकार प्रभावकारी नभएको र पार्टीका मन्त्रीहरूको कार्यसम्पादन गतिलो नभएको गुनासो कांग्रेसभित्र छ ।

अहिले कांग्रेसका शीर्ष नेताहरू नै सरकार फेर्न र सरकारको राजनीतिक मोडल फेर्न अनिवार्य भएको निष्कर्ष निकाल्न थालेका छन् । संस्थापनइतर समूहका नेता डा. शेखर कोइराला सरकार फेर्नुपर्ने निष्कर्षमा छन् भने महामन्त्री गगन थापा सरकार चलाउने राजनीतिक मोडलमा बहस चाहन्छन् ।

आइतबार थापाले वर्तमान गठबन्धनलाई फरक ढंगबाट चलाउन प्रस्ताव राखे । अहिले माओवादी अध्यक्ष पुष्पकमल दाहाल प्रचण्ड प्रधानमन्त्री छन् । प्रचण्डसहित एकीकृत समाजवादी, जसपा, विप्लव नेतृत्वको पार्टीसहितको समाजवादी मोर्चा छ । यही मोर्चालाई अढाइ वर्ष सरकार चलाउन दिनुपर्ने र कांग्रेसका मन्त्रीहरू फिर्ता हुनुपर्ने थापाको प्रस्ताव छ ।

कांग्रेसबाट पूर्णबहादुर खड्का उपप्रधानमन्त्रीसहित रक्षा, धनराज गुरुङ कानुन, प्रकाशशरण महत अर्थ, एनपी साउद परराष्ट्र, मोहन बस्नेत स्वास्थ्य, रमेश रिजाल उद्योग, सीता गुरुङ शहरी विकास, डिगबहादुर लिम्बू युवा तथा खेलकुद र सुरेन्द्रराज आचार्य महिला तथा बालकालिकामन्त्री छन् ।

‘यो दुई, अढाइ वर्ष उहाँहरूले सरकार चलाउने भन्ने कुरा छ । पहिला प्रचण्डजी प्रधानमन्त्री बन्ने, त्यसपछि माधव नेपाल बन्ने भन्ने छ । उहाँहरूको एउटै समाजवादी मोर्चा छ, पार्टीलाई पनि एउटै बनाउने भन्ने छ । मलाई लाग्छ, यो कांग्रेसका मन्त्रीहरू सबै फिर्ता बोलाऔँ,’ कांग्रेस रुपान्तरण अभियानको कार्यक्रममा उनले भने, ‘यो दुई अढाइ वर्ष उहाँहरूलाई एक्लै चलाउन दिऔँ । हामी समर्थन मात्र गरौँ । त्यसपछिको दुई, अढाइ वर्ष कांग्रेसले चलाउनुपर्छ । एक्लै चलाउनुपर्छ, त्यसमा जस भए पनि र अपजस भए पनि त्यो बेला कांग्रेसले लिन्छ ।’

यसरी सरकार नचलाउने हो भने २०८४ को चुनावमा पुग्दा पछिल्लो ४/५ वर्षमा भएका काम कारबाहीको कुनै पनि दलले जिम्मेवारी नलिने अवस्था आउने उनको भनाइ छ ।

‘यो दुई वर्ष हामीले केही भएन भन्ने भयौँ, त्यसपछिको दुई वर्ष उनीहरूले केही भएन भन्ने भए,’ थापाले भने, ‘त्यसो भए यो चार/पाँच वर्षको देशको जिम्माचाहिँ कसले लिन्छ त ?’

इतर समूहका नेता कोइरालाले प्रधानमन्त्री पुष्पकमल दाहाल प्रचण्ड अराजक भएकाले फेर्नुपर्ने बताउँदै आएका छन् ।

‘प्रधानमन्त्री नै अराजक भएर अगाडि आइरहनुभएको छ । यो चिन्ताको विषय हो । हामीलाई जिताऊ, हामी जातीय राज्य दिन्छौँ’ भन्नुहुन्छ । बहुभाषिक, बहुजातीय, बहुसांस्कृतिक देश नेपाल हो,’ भदौ २२ को पत्रकार भेटघाटमा उनले भने, ‘अर्को ठाउँमा बोलिदिनुभयो– दुई लाख मान्छे सडकमा उतार्छु । देशको प्रधानमन्त्रीले केका लागि उतार्ने ? आफ्नै विरुद्ध ? उहाँको बोलीले राष्ट्रलाई गर्ने असर त बुझ्नुपर्‍यो नि ! सरकारमा कांग्रेस वा अरू दलका मन्त्रीहरू छन् भनेर प्रधानमन्त्रीले सोच्नुपर्‍यो नि ।’

देश अराजकतातिर गएको निष्कर्षमा शेखर छन् । ‘राजनीतिक, आर्थिक, सांस्कृतिक, सामाजिक, धार्मिक, कूटनीतिक सबै अराजकतातिर गइरहेको छ । कुनै कुरा पनि ठीक छैन,’ उनले भने । प्रजातन्त्र जोगाउन अहिले कांग्रेस नेतृत्वको सरकार आवश्यक रहेको उनले बताउने गरेका छन् ।

शेखर र गगन दुवैका कुरा पार्टीको केन्द्रीय समिति बैठकमा एजेन्डाका रूपमा प्रस्तुत भएका थिएनन् ।

‘भर्खरै भएको केन्द्रीय समिति बैठकमा गठबन्धका बारेमा कुनै पनि प्रश्न, छलफल, निष्कर्ष, निर्णय आएको छैन । त्यो बैठकको प्रस्तावकर्ता महामन्त्री आफैँ हुनुहुन्थ्यो । महामन्त्रीले सार्वजनिक मञ्चमा बोलेको कुरा पार्टीको धारणा भन्न मिलेन,’ कांग्रेस प्रचार विभाग प्रमुख मीन विश्वकर्माले शिलापत्रसँग भने, ‘शेखर डा. सा'बले भन्नुभएको सरकारको विषयमा प्रश्न उठ्यो । सरकारका बारेमा हामीले पनि सोच्नुपर्ने बेला आएको छ । त्यसको अर्थ अहिले नै गठबन्धन भत्काउने भन्ने होइन । गठबन्धन यही रहने, सरकारको नेतृत्व वा केही मन्त्रीहरू हेरफेर गरेर जाने भन्ने कुरा छ । त्यो पनि बैठकमा आएर र त्यो डा. सा'बको धारणा र राय भयो । यो पार्टीको निर्णय हुन सकेन ।’

प्रकाशित मिति: सोमबार, असोज १५, २०८० २०:१५