एमाले गण्डकी अधिवेशन : पीएस र खगराज गुटमा कसकाे पल्ला भारी ?

एमाले गण्डकी प्रदेश अधिवेशनको माहोल निकै तातेकाे छ । एमालेका प्रदेश इञ्चार्ज सचिव गोकर्ण विष्टले उपमहासचिव पृथ्वीसुब्बा (पीएस) गुरुङ र स्थायी कमिटी सदस्य खगराज अधिकारीलाई दायाँबायाँ राखेर गण्डकीमा गुट नभएको उद्घोष गरेका भए पनि अलिहे प्रदेशमा गुटगत सक्रियता निकै बढेको छ । यी दुई समूह प्रदेशमा आफ्नो गुट बलियो बनाउन प्रनितिधि चयन प्रक्रियामा खेलोफड्को गर्न थालिसकेका छन् ।

हुनलाई, २०७४ को स्थानीय चुनावपछि नै एमालेको गण्डकी प्रदेशमा नेता पीएस र अधिकारीको प्यानलका रूपमा समूह निर्माण भएको थियो । २०७९ को स्थानीय चुनावपछि दुईगुटको निरन्तरतामात्र होइन थप कसिलो गुट बन्न थालेका छन् । उनीहरूमा केन्द्रीय गठबन्धनले पनि भूमिका निर्वाह गरिरहेको छ । महासचिव शंकर पोखरेलको समूहनिकट भएर अधिकारीले गुट निर्माण गरिरहेका छन् भने पीएसले उपाध्यक्ष विष्णु पौडेलनिकट भएर काम गरिरहेका छन् ।

गण्डकी प्रदेशका एमाले नेताहरूको भनाइमा ११ जिल्ला अध्यक्षमध्ये मुस्किलले दुई अध्यक्ष अधिकारीको पक्षमा रहेका छन् । अहिलेसम्म ७ जिल्ला अध्यक्ष पीएसनिकट र २ अध्यक्ष भने धरमरमा रहेको एमाले नेताहरूको भनाइ छ । त्यसरी हेर्दा गण्डकी प्रदेशमा गण्डकी प्रदेश सभामा पनि पीएस नै बहुमतमा छन् । तर रोचक कुरा चाहिँ अधिकारीको गृहजिल्ला कास्कीका अध्यक्ष पीएसनिकट रहेका छन् भने पीएसका गृहजिल्ला अध्यक्ष तरअधिकारीकिट रहेका छन् ।

पहिला पीएसनिकट रहेका पीएस मुख्यमन्त्री हुँदाका भौतिकमन्त्री रामशरण बस्नेत, राजनीतिक सल्लाहकार गोविन्द नेपाली र प्रमुख सचेतक मायानाथ अधिकारी अहिले पीएससँग टाढिएर अधिकारीनजिक हुन पुगेका छन् । अधिकारीले पीएसमाथि दबाब बढाउने रणनीति सुरु गरिरसकेका छन् र त्यो दबाब लमजुङबाटै सुरु भएको छ । जिल्ला अध्यक्ष, सचिव, दोर्दी गाउँपालिका अध्यक्ष, अनेमसंघ केन्द्रीय अध्यक्ष र नेता प्रेम घलेलाई आफ्नो पक्षमा पार्ने प्रयासमा अधिकारी लागेका छन् ।

उनीहरू अहिले महासचिव पोखरेलको समूहको रूपमा भनेर पीएससँग दूरी बढाउन थालेका छन् । त्यसरी पीएससँग दूरी बढाउने भूमिका भने अधिकारीमात्र होइन, उनलाई साथ दिइरहेका संविधानसभा सदस्य भीष्म अधिकारीको भूमिका पनि देखिएको एमाले नेताहरूको भनाइ रहेको छ । राइनस नगरपालिकाका पूर्वमेयर र किसान संघ प्रदेश अध्यक्षसमेत अधिकारीसँग नजिकिन खोजिरहेका छन् । यद्यपि, लमजुङबाट चयन हुने प्रतिनिधिहरू गुरुङनिकट नै बहुमत हुने एमाले नेताहरू चर्चा गर्छन् । प्रदेश अध्यक्षमा वर्तमान अध्यक्ष नवराज शर्मा र मायानाथ अधिकारीबीच प्रतिस्पर्धा हुने विश्लेषण भइरहेको छ ।

गण्डकीको अधिवेशनमा सचिव पदमा अर्यालको भूमिकाले निकै फरक पर्ने एमाले नेताहरूको विश्लेषण रहेको छ । हुनलाई अर्याल लुम्बिनीको इञ्चार्ज भए पनि स्याङ्जाकी अर्यालको प्रभाव बलियो नै रहेको छ । एमाले नेताहरूको भनाइमा अर्यालको खास चाहना रश्मी आचार्यलाई सचिव बनाउने रहेको छ । हालका उपाध्यक्षलाई बिदाइ गर्ने मुडमा तीनै पक्षका नेताहरू रहेका छन् । तसर्थ उपाध्यक्षमा जनजाति अनुहार खोजी हुन थालेको छ । गोरखा अध्यक्ष प्रेम गुरुङ र स्याङ्जा पूर्वअध्यक्ष मीन गुरुङ सतहमा आएता पनि त्यति धेरै चर्चा भने भइसकेको छैन । यद्यपस, प्रेम गुरुङ प्रभावी बन्न खोजिरहेका छन् ।

प्रकाशित मिति: सोमबार, असोज १५, २०८० ०८:०१