दिनभर आजः जलहरी प्रकरणमा भ्रष्टाचार मुद्दा, एसियाडअन्तर्गत क्रिकेटमा नेपाल अन्तिम आठमा (भिडियो)

दिनभर आजः जलहरी प्रकरणमा भ्रष्टाचार मुद्दा, एसियाडअन्तर्गत क्रिकेटमा नेपाल अन्तिम आठमा (भिडियो)

A+ A A-

पेट्रोलियम पदार्थको मूल्यवृद्धि गर्ने नेपाल आयल निगमको निर्णय सरकारको निर्देशनपछि फिर्ता भएको छ । अब पुरानै मूल्य आज राति १२ बजेबाट लागू हुने भएको हो । चाडबाडको मुखमा पेट्रोलियम पदार्थको मूल्य वृद्धि गरेपछि सवत्र विरोध भएको थियो ।

पशुपतिमा चढाइएको सुनको जलहरी काण्डमा पशुपति क्षेत्र विकास कोषका सदस्यसचिव मिलनकुमार थापा, तत्कालीन सदस्यसचिव प्रदीप ढकाल र स्टोरकिपर अरुणकुमार श्रेष्ठविरुद्ध भ्रष्टाचार मुद्दा दायर भएको छ । जनही एक करोड १७ लाख १ हजार ७ सय ८१ रुपैयाँ बिगो माग दाबी गरेर अख्तियार दुरुपयोग अनुसन्धान आयोगले आइतबार विशेष अदालतमा मुद्दा दायर गरेको हो ।

कांग्रेस महामन्त्री गगन थापाले वर्तमान प्रचण्ड नेतृत्वको सरकारबाट कांग्रेसका मन्त्रीहरू फिर्ता बोलाउनुपर्ने बताएका छन् । उनले मन्त्री फिर्ता बोलाए पनि समर्थन भने यथावत राख्ने बताएका छन् । उनले अढाई वर्ष समाजवादी मोर्चाले सरकार चलाउनुपर्ने र त्यसपछिको अढाई वर्ष कांग्रेसले सरकार चलाउनुपर्ने बताएका छन् ।

दिनदहाडै मान्छेको हत्या गर्नेलाई जनताले उत्सव मनाउने संविधान दिवसमा उन्मुक्ति दिएर राष्ट्रपतिले भोज गरेको रास्वपा सभापति रवि लामिछानेले आरोप लगाएका छन् । उनले आज बसेको प्रतिनिधिसभा बैठकमा यो विषय उठाएका हुन् ।

आइतबार शेयर बजार परिसूचक नेप्सेमा भारी गिरावट आएको छ । साताको पहिलो कारोबार दिन आइतबार नेप्से ३३.२० अंकले घटेको छ । कारोबार रकम करिब २ अर्बमा सीमित भएको छ ।

पाकिस्तानमा मस्जिदबाहिर बम विस्फोट हुँदा मृत्यु हुनेको संख्या ६५ पुगेको छ । माल्दिभ्समा मोहम्मद मुइज्जुु राष्ट्रपतिमा निर्वाचित भएका छन् ।

माल्दिभ्सविरुद्ध १ सय ३८ रनको फराकिलो जित निकाल्दै नेपाल १९औं एसियाली खेलकुदअन्तर्गत पुरुष क्रिकेटको क्वार्टरफाइनलमा पुगेको छ । अब सेमिफाइल प्रवेशका लागि टेस्ट राष्ट्रसँग खेल्नेछ ।

प्रकाशित मिति: आइतबार, असोज १४, २०८० १९:४५