सुदूरपश्चिम श्री शारीरिक सुगठनको उपाधि पन्त र चन्दलाई

A+ A A-

प्रथम सुदूरपश्चिम श्री शारीरिक सुगठनको उपाधि लक्ष्मीदत्त पन्त र सुनिल चन्दले प्राप्त गरेका छन् । सुदूरपश्चिम फिट्नेस एण्ड फारवेस्ट स्पोर्टस् क्लबको आयोजनामा शुक्रबार सुरु भएको प्रतियोगिताअन्तर्गत शारीरिक सुगठन विधामा चन्द र मेन्स फिजिकतर्फ पन्तले उपाधि जितेका हुन् ।

यस्तै शारीरिक सुगठन विधामा द्वितीय पुरस्कार आर्यान शाही, तृतीय अर्जुन साउद र अनिल सेरलाले सान्तवना पुरस्कार प्राप्त गरेका छन् भने मेन्स फिजिकतर्फ द्वितीय पुरस्कार अजय रिजाल, तृतीय अमृत रावत र सन्देश शाहले सहानुभूति पुरस्कार पाए ।

प्रतियोगिताका दुवै विधाका विजेतालाई जनही नगद २५ हजार पुरस्कार प्रदान गरिएको छ । यस्तै दुवै विधामा दोस्रो हुनेलाई नगद १५ हजार र तेस्रो हुनेलाई नगद १० हजार नगद पुरस्कार दिइएको छ । साथमा जिन्सी पुरस्कारहरू पनि प्रदान गरिएको छ ।

प्रदेशका सामाजिक विकासमन्त्री झपटबहादुर साउदले विजेता खेलाडीलाई ट्रफी, नगद पुरस्कार तथा सामाग्री हस्तान्तरण गरे ।

सो अवसरमा मन्त्री साउदले खेलकुदको विकासका लागि प्रदेश सरकारले बजेटमा कमी हुन नदिने प्रतिवद्धता व्यक्त गरे । उनले भने, ‘अहिले खेलकुदमा सीमित स्रोतसाधन रहेको छ । प्रदेश सरकारले अहिले पनि खेलकुदमा बजेट विनियोजन गरेको छ । तर, त्यो अपर्याप्त हो । आगामी आर्थिक वर्षमा प्रदेश सरकारले प्राथमिकता क्षेत्र पहिचान गरी खेलकुदमा बजेट विनियोजन गर्ने छ ।’

उनले वेरोजगारी, गरिबी व्याप्त रहेको बताउँदै ‘यो साझा समस्या बनेको छ । जसका कारण कुलतमा फसेका छन् । तेब्बर ढंगले लागु औषध दुव्र्यशनी प्रयोगकर्ता बढेको छ’ बताए ।

प्रकाशित मिति: शनिबार, असोज १३, २०८० २०:१८