'मेराे कार्यकालकाे चाैथाे वर्षसम्म नेपाल टेस्ट राष्ट्रकाे बलियाे दाबेदार भइसकेकाे हुने छ' (भिडियाे कुराकानी)

'मेराे कार्यकालकाे चाैथाे वर्षसम्म नेपाल टेस्ट राष्ट्रकाे बलियाे दाबेदार भइसकेकाे हुने छ' (भिडियाे कुराकानी)

A+ A A-

नेपाल क्रिकेट संघ (क्यान) मा तेस्रो कार्यकालका लागि अध्यक्षका रूपमा चयन भएका छन् बैतडीका चतुरबहादुर चन्द ।

यसअघि उनलाई जबर्जस्ती क्यानको नेतृत्व हत्याएको आरोप लाग्ने गरेको थियो । यही विवादमा राष्ट्रिय खेलकुद परिषद्ले हस्तक्षेप गर्दा २०७३ सालमा क्यान आइसीसीको निलम्बनमा पर्‍याे । यद्यपि, चन्द अध्यक्ष भएकै समयमा क्यानमाथिको प्रतिबन्ध फुकुवा भयो । राेचक त के भने, क्यानमा जबर्जस्ती छिरे भन्नेआक्षेप खेपेका चन्द यसपालिको चुनावमा सर्वसम्मत अध्यक्ष चुनिएका छन् । अध्यक्ष भएपछि उनले क्रिकेट विकासका लागि धमाधम केही निर्णय गरिसकेका छन् । एकातिर सर्वसम्मत चुनिएका अध्यक्ष, अर्कातिर नेपाली राष्ट्रिय टिमका पूर्वकप्तान पारस खड्कालगायतकाे कार्यसमितितिर अबकाे ४ वर्ष धेरैकाे नजर हुने छ ।

चन्द भन्छन्- केही गराैँ भनेरै फेरि आएकाे हुँ

अध्यक्ष चन्दसँग हामीले भिडियो कुराकानी गरेका छौँ । संवादका क्रममा उनले आफूले विगतमा गरेका काम, आगामी योजनाबारे खुलाएका छन् । यसअघिको कार्यकालमा धेरै काम गर्न नसकेको स्वीकार्दै उनले अबको कार्यकाललाई परिणामुखी बनाउने प्रतिबद्धता जनाए ।

'४ वर्षभित्र टेस्ट राष्ट्रको दाबेदार'

उनले आफ्नो कार्यकालभित्रै नेपाललाई टेस्ट राष्ट्रको दाबेदारका रूपमा तयार गर्ने बताए । यद्यपि, यसका लागि सरकारले क्रिकेट खेललाई प्राथमिकता दिनुपर्ने उनको भनाइ छ । क्यानलेचाहिँ खेलाडी र घरेलु प्रतियोगिताहरूमा बढी जोड दिने चन्दले प्रस्ट पारे ।

‘सरकारले भौतिक संरचना निर्माणमा ढिलाइ नगरिदेओस्, हामी खेलाडीको वृत्तिविकासमा काम गर्छौं, यसो भयो भने मेरो कार्यकालको चौथो वर्षमा नेपाल टेस्ट राष्ट्रको बलियो दाबेदार बनिसकेको हुने छ’, उनले भने ।

घरेलु क्रिकेट बलियो नभएकाले अबदेखि प्रधानमन्त्री कप राष्ट्रिय क्रिकेट प्रतियोगितालाई राउण्ड रोविन लिगको आधारमा सञ्चालन गर्ने निर्णय गरिएको उनले बताए ।

‘खेलाडीलाई भारत, पाकिस्तान पठाएर हुन्छ कि, अब्बल प्रशिक्षकहरू ल्याएर हुन्छ कि, घरेलु प्रतियोगिताहरू बलियाे पारेर हुन्छ कि, क्रिकेटलाई उचाइतिर लानेगरी काम गरिने छ’, चन्दले भने ।

उनले प्रतियोगिताका लागि बजेट दिन सरकारले लोभ गर्न नहुने बताए । उनका अनुसार, अनुमानित ३ देखि ४ करोड खर्च हुने प्रधानमन्त्री कपका लागि सरकारले ५० लाख छुट्याएको छ । यो पनि यसअघिको भन्दा १० लाख रुपैयाँ कम रहेको उनले बताए ।

‘खेललाई वर्गीकरण गरेर सोही प्राथमिकताअनुसार बजेट विनियोजन गर्नुपर्छ । सरकारले क्रिकेट संरचना निर्माणका लागि गरेका घोषणा कार्यान्वयन गरे आगामी चार वर्षमा हामी अहिलेभन्दा धेरै अगाडि र उच्च स्थानमा हुने छौँ’, उनले भने ।

'राजनीतिक हस्तक्षेप हुन्न'

उनले क्यानमा राजनीतिक हस्तक्षेप हुन नदिने पनि बताए ।

'तपाईं आफैं कांग्रेस बैतडीको सभापति हुनुहुन्छ । क्यानमा राजनीति नहुने तर राजनीतिज्ञ हुने ?'

जवाफमा उनले क्यानमा आफ्नो ध्यान क्रिकेटको विकासभन्दा अन्त नहुने बताए । भने, 'मेराे राजनीति क्यानमा हाेइन, पार्टीमा हाे । क्यानमा सबै खेलाडी मेरा लागि बराबर हुनेछन् भने मेरो उद्देश्य जसरी हुन्छ नेपाली क्रिकेटलाई उचाइतिर लैजाने हुने छ ।'

भुटान र माल्दिभ्ससँग दाँजाैँ

नेपाली टिम भुटान र माल्दिभ्सजस्ता देशभन्दा अब्बल भइसकेको बताए । उनीहरूभन्दा सेवा सुविधामा पनि नेपाली खेलाडी अगाडि रहेको चन्दको दाबी छ ।

'भारत र पाकिस्तानजस्ता ठूला टिमसँग नेपालले खेल्ने मौका पायो । विराट कोहली, रोहित शर्माहरूजस्ता खेलाडी र नेपाली खेलाडीबीच सेवासुविधामा गहिरो असमानता छ नि । यसले खेललाई प्रभावित पार्दैन ?

जवाफमा उनले भने, 'तुलना गर्ने भनेको छिमेकीहरूसँग नै हो । तपाईंले माल्दिभ्स र भुटानसँग पनि गर्दिनुस् न तुलना । छिमेकी उनीहरू पनि हुन् । छिमेकी भारत, पाकिस्तान र बंगलादेश मात्रै होइनन् । सेवा सुविधाको हिसाबले हामी भारतसहित टेस्ट राष्ट्रको कहीँ कतै नजिक पुग्दैनौँ । किनकि आईसीसीको फण्डिङ पोलिसी अन्यायपूर्ण छ । आईसीसीले दिन कुल पैसाको ३६ प्रतिशत त भारत एक्लैले लैजान्छ ।'

'खेलाडीको पारिश्रमिक बढाउँछौँ '

क्यान अध्यक्ष चन्दले नेपाली राष्ट्रिय क्रिकेट टिमका खेलाडीहरूको पारिश्रमिक र सेवासुविधा बढाउने पनि बताए । राष्ट्रिय टिमका क्रिकेटरको तलब मासिक एक लाख रुपैयाँ आसपास पुर्‍याउने उनले घाेषणा गरे ।

‘महिनाको ५ हजारबाट सुरु भएर क्रिकेट खेलाडीको तलब अहिले ६० हजारसम्म भएको छ, सन् २०२४ पछि यसलाई पनि हामी बढाउँछौँ’, उनले भने । खेलाडीलाई प्रोत्साहन गर्दै अघि बढ्ने नीति क्यानले लिएको उनको भनाइ छ ।

सरकारको आलोचना

खेलकुद पूर्वाधार निर्माण र खेलाडीको सन्दर्भमा गर्ने घोषणालाई लिएर उनले सरकारको आलोचना गरे । सरकारले घोषणा गरेको प्रोत्साहन, पुरस्कार रकम वर्षौंसम्म खेलाडीको हातमा नपर्नुलाई उनले बिडम्बना भने ।

अध्यक्ष चन्दले राष्ट्रिय खेलकुद परिषद (राखेप) को वर्तमान संरचनाबाट नेपाली क्रिकेटको विकास नहुने ठोकुवा पनि गरे । ‘राखेपको प्राविधिक महाशाखाको अहिलेकै संरचनाले कुनै काम गर्दैन । हेर्दै जानुहोला, ५ वर्षअघि राखेपले कुनै पनि ग्राउण्ड हामीलाई हस्तान्तरण गर्दैन’, उनले दलील दिए ।

सरकारले गत वर्ष पूर्वाधारका लागि छुट्याएको ८० करोड रुपैयाँमध्ये ४० करोड क्रिकेटकै लागि भए पनि राखेपले १७ प्रतिशत मात्रै खर्च गरेको चन्दले बताए ।

उनले राखेपको प्राविधिक फाँट बलियो नभएसम्म नेपाली क्रिकेटको संरचनामा धेरै अपेक्षा गर्न नसकिने बताए । ‘खेलकुद गतिविधि गर्ने/गराउने निकाय राखेपअन्तर्गत एउटा हुनुपर्छ, पूर्वाधार विकास गराउने निकाय राखेपकै मातहत वा शहरी विकास मन्त्रालयअन्तर्गत हुनुपर्छ ।’

क्यान अध्यक्ष चतुरबहादुर चन्दसँग गरिएको कुराकानीको पूरा भिडियो हेर्नुहोस्ः