एमाले कर्णाली अधिवेशन : सहमतिको प्रयास विफल, निर्वाचनको कार्यक्रम अघि बढ्यो

एमाले कर्णाली अधिवेशन : सहमतिको प्रयास विफल, निर्वाचनको कार्यक्रम अघि बढ्यो

A+ A A-

बुधबारबाट वीरेन्द्रनगरमा जारी नेकपा एमाले कर्णाली प्रदेशको पहिलो अधिवेशन नेतृत्व चयनमा सहमति जुट्न नसकेपछि निर्वाचन हुने भएको छ । नयाँ नेतृत्व छनोटका लागि नेताहरूबीच सहमति नजुटेपछि अन्तत: निर्वाचन हुने भएको हो । अधिवेशनको बन्दसत्रमा सहमति जुट्न नसकेपछि निर्वाचन कमिटीले निर्वाचन तालिका सार्वजनिक गरेको छ ।

निर्वाचन तालिकाअनुसार शुक्रबार उम्मेदवारको मनोनयन दर्ता र शनिबार निर्वाचन हुनेछ । एमाले अध्यक्ष केपी शर्मा ओलीले सहमतिका आधारमा पदाधिकारी चयन गर्न दिएको निर्देशन अवेज्ञा गर्दै नेताहरू आफ्नो हठबाट पछाडि नहटेपछि निर्वाचनबाट नेतृत्व चयन हुन लागेको हो ।

अध्यक्ष ओलीले सर्वसम्मत नेतृत्व चयन गर्न नसके गुट उपगुट बनाएर चुनाव नलड्न निर्देशन दिएका थिए । अध्यक्ष ओलीले मात्रै होइन, एमाले महासचिव शंकर पोखरेलले पनि बुधबार बन्दसत्र सुरु हुनुअघिसम्म सहमतिको अधिकतम प्रयास गरेका थिए । तर, सहमति हुने छाँट नदेखेपछि उनी काठमाडौं फर्किएका थिए ।

महासचिव पोखरेलले आफ्नै टिममा बनेको गुटलाई रोक्न नेताहरूसँग वान टु वानको भेटघाटमा सहमतिको प्रयास गरे पनि स्थायी कमिटी सदस्य यामलाल कँडेल र प्रदेश अध्यक्ष विनोदकुमार शाहबीचको प्रतिष्ठाको लडाइँले अधिवेशन निर्वाचनउन्मुख बनेको हो ।

प्रदेश अध्यक्षका लागि कँडेलले पार्टी पोलिटब्युरो सदस्य सल्यानका गुलावजंग शाह र प्रदेश अध्यक्ष शाहले प्रदेश कमिटी सदस्य कालीकोटका मीनबहादुर शाहीलाई अध्यक्ष बनाउन लबिङ थालेपछि सहमतिको सम्भावना टरेको एमाले स्रोतको दाबी छ ।

उद्घाटन समारोहलाई सम्बोधन गर्दै अध्यक्ष ओलीले कालीकोटका शाहीलाई प्रदेश अध्यक्ष बनाउन खोजेको प्रस्ट देखिन्थ्यो । सोहीअनुसार महासचिव पोखरेल पनि सकारात्मक देखिएको बताइएको थियो । तर, अध्यक्ष ओली काठमाडौं फर्किएपछि एकाएक समीकरणमा बदलाव आएको बताइएको छ ।

शाहीलाई ओलीको समर्थन हुँदाहुँदै पनि महासचिव पोखरेलले एक टिकटक भिडियोबाट विवादित छवि बनाएका पार्टी पोलिटब्युरो सदस्य गुलावजंग शाहलाई अध्यक्ष बनाउन थालेको लबिङ नै अन्तत: चुनावमा जाने विन्दु बनेको एमालेका एक केन्द्रीय सदस्यले बताए ।

महासचिव पोखरेलले गुलावजंग शाहलाई नेतृत्वमा ल्याउन गरेको यो प्रयास नौलो भने होइन । साविक भेरी र राप्ती अञ्चल हुँदादेखि नै सल्यानमा प्रकाश ज्वालालाई दबाउनका लागि पोखरेलले शाहलाई बोकेर हिँड्ने गरेको आरोप उनीमाथि रहेको एमाले स्रोत दाबी गर्छ । शाहलाई पार्टीको पोलिटब्युरो सदस्यमा ल्याउनमा मुख्य हात महासचिव पोखरेलको भएको मानिन्छ ।

भावी नेतृत्वका लागि नेताहरूबीच अन्य पदमा सहमतिनजिक पुगे पनि अध्यक्षका लागि आ–आफ्नै रटानले सहमतिको सम्भावना टरेको हो । अध्यक्ष पदका लागि प्रस्ताव गरिएका शाही र शाह आफ्नै गृह जिल्लामा पार्टी कार्यकर्ताबाट नरुचाइएका नेता भएको बताइन्छ ।

शाही राष्ट्रिय योजना आयोगको सदस्य रहिसकेका नेता हुन् भने शाह निवर्तमान प्रदेशसभा सदस्य र गत मंसिरमा सम्पन्न दोस्रो प्रदेशसभा निर्वाचनमा पराजित भएका नेता हुन् । स्थायी कमिटी सदस्य कँडेलनिकट नेताका अनुसार अध्यक्षमा पोलिटब्युरो सदस्य सल्यानका गुलावजंग शाह, उपाध्यक्षमा जुम्लाका टेकराज पछाई, सचिवमा सुर्खेतका ध्रुवकुमार शाही र उपसचिवमा दैलेखका रवीन्द्रराज शर्मा तथा मुगुका जितबहादुर मल्लको नाम पक्का भएको छ ।

यस्तै, प्रदेश अध्यक्ष शाहको टिमबाट अध्यक्षमा कालीकोटका मीनबहादुर शाही, उपाध्यक्षमा जाजरकोटका लालबहादुर महतारा, सचिवमा सुर्खेतका डण्डीप्रसाद शर्मा, उपसचिवमा दैलेखका रुद्र शाहीको नाम टुङ्गो लागेको जनाइएको छ ।

प्रकाशित मिति: शुक्रबार, असोज १२, २०८० १७:२६