राजधानीसँगैको गाउँ, जहाँका जनता फोन गर्न धनगढी पुग्नुपर्छ

A+ A A-

सुदूरपश्चिम प्रदेशको राजधानी हो धनगढी । प्रदेशको अन्य क्षेत्रभन्दा यहाँ थोरै विकास भएको छ । तर धनगढी बजारसँगै जोडिएको एक गाउँ सञ्चारको पहुँच बाहिर छ ।

धनगढी उपमहानगरपालिका ७ पटेलाका बासिन्दा मोबाइल नेटवर्कले काम नगर्दा समस्यामा छन् । मोबाइलमा नेटवर्क नै नआउँदा फोन गर्न बजारनै पुग्नु पर्ने बाध्यता रहेको स्थानीय निलम चौधरीले बताए ।

उनले भने, ‘नेपाल टेलिकम धनगढी देखि ८ किलोमिटरमै नेटवर्कले काम नगर्दा हैरानी बढेको छ ।’

मोबाइलमा नेटवर्क नै नआउने, आए पनि डाटा नचल्ने, फोनमा कुराकानी गर्न नमिल्ने समस्या रहेको उनी बताउँछन् ।

गत वर्ष नेटवर्कले अलिअलि काम गरे पनि गत जेठमा आएको हावाहुरी पछि सञ्चार सेवा पूर्ण रूपमा प्रभावित बनेको स्थानीय वसन्त खातीले गुनासो गरे ।

समस्या समाधानका लागि कुनै निकायले चासो नदिएको उनको भनाइ छ । उनले भने, ‘नेटवर्कको सुधारका लागि पटक–पटक टेलिकमलाई जानकारी गराइसक्यौ तर कुनै सुनुवाइ भएन ।’

जनप्रतिनिधिहरूले समेत समस्या समाधानका लागि चासो नदिएको उनको भनाई छ ।

टेलिकमको लापरबाहीका कारण वडावासी नेटवर्कको पहुँच बाहिर रहेको धनगढी उपमहानगरपालिका वडा नम्बर ७ का वडा अध्यक्ष सिताराम रानाले बताए ।

टावर बिस्तारका क्रममा टेलिकमका केही प्राविधिकहरूले मापदण्ड बिनानै टावर राखेका कारण नेटवर्कको कभरेज पुग्न नसकेको उनको भनाई छ । वडामा रहेको समस्या समाधानको लागि टेलिकमसँग छलफल भइरहेको उनले बताए ।

धनगढी उपमहानगरपालिका ७ पटेलावासीको समस्याबारे जानकारी नभएको नेपाल टेलिकम धनगढी प्रमुख सुरत मल्लले दाबी गरे ।

‘पटेलामा नेटवर्कले काम नगरिरहेको भनेर हालसम्म कुनै गुनासो आएको छैन, तर पनि अब जानकारी भयो हामी त्यो क्षेत्रका छिट्टै प्राविधिक पठाउछौं,’ उनले भने ।

कैलालीमा मात्रै नेपाल टेलिकमका १ सय ७ वटा बिटिए टावर रहेको बताउँदै उनले कुनै क्षेत्रमा खराबी आएको हुन सक्ने स्वीकार गरे । नेटवर्कको कभरेज नपुगेका स्थानमा प्राविधिक खटाएर समस्या समाधान गरिने मल्लले दाबी गरे ।

प्रकाशित मिति: मंगलबार, असोज ७, २०७६ ००:५६