रुबियोले बनाए कीर्तिमान, अन्तरिक्षयान बिग्रिएपछि ३७१ दिनसम्म अन्तरिक्षमै बस्नुपर्‍यो

अन्तरिक्षमा ३ सय ७१ दिन बिताएपछि अमेरिकी अन्तरिक्षयात्री फ्र्यांक रुबियो सेप्टेम्बर २७ मा पृथ्वीमा फर्किएका छन् । उनीसँगै रुसी अन्तरिक्षयात्रीहरू सर्गेई प्रोकोपियभ र दिमित्री पेतेलिन पनि अन्तरिक्षबाट पृथ्वीमा सकुशल अवतरण गरे ।

काजकिस्तानमा उनीहरू अन्तरिक्षयानको क्याप्सुलबाट फर्किएसँगै अमेरिकी अन्तरिक्षयात्री फ्र्यांक रुबियोले कीर्तिमान बनाएका छन् । रुबियोले ३७१ दिन अन्तरिक्षमा बिताएपछि उनी अन्तरिक्षमा धेरै समय बिताउने अमेरिकी नागरिक बने । वास्तवमा रुबियोले नचाहँदा नचाहँदै यो रेकर्ड कायम गरेका हुन् । किनभने उनलाई १८० दिनका लागि इन्टरनेसनल स्पेस स्टेसन पठाइएको थियो ।

स्पेस स्टेसन अन्तरिक्षयात्रीको घर मानिन्छ जहाँबाट उनीहरू अन्तरिक्षबारे अध्ययन गर्दछन् । तर, पृथ्वीमा फर्किने अन्तरिक्षयानको क्याप्सुलमा खराबी आएपछि रुबियो ३७१ दिनसम्म अन्तरिक्षमै बस्न बाध्य भए । अन्तरिक्षयानको क्याप्सुल अन्तरिक्षमा रहेको कवाडी बस्तुसँग ठोक्किँदा त्यसको चिसोप्रणालीमा खराबी आएको बताइएको छ । जब स्पेस स्टेसनबाट अन्तरिक्षयात्रीहरू पृथ्वीमा फर्किन्छन्, क्याप्सुल पृथ्वीको सतहमा प्रवेश गर्नासाथ क्याप्सुल निकै तातिने गर्छ । जसलाई नियन्त्रण गर्न चिसो प्रणाली (कुलिङ सिस्टम) को आवश्यकता पर्छ ।

चिसो प्रणालीबिना फर्किँदा अन्तरिक्षयात्रीको ज्यानै जान सक्छ । त्यही कारण रुबियोलाई तोकिएको समयमा पृथ्वी फर्काइएको थिएन । पृथ्वीमा अवतरण गरेसँगै रुबियोले कीर्तिमानी त बनाए । तर, उनले आफूलाई एक वर्षसम्म अन्तरिक्षमा बस्नुपर्ने पहिल्यै थाहा भएको भए आफूले कहिल्यै अन्तरिक्षमा जाने निर्णय नलिने प्रतिक्रिया जनाएका छन् ।

प्रकाशित मिति: शुक्रबार, असोज १२, २०८० १४:०६