उत्तर कोरियाको संविधानमै समेटियो परमाणु हतियार बनाउने विषय, किमले के भने ?

A+ A A-

उत्तर कोरियाले आफ्नो देशको परमाणु क्षमता बढाउने नीति संविधानमै समावेश गरेको छ । योसँगै अब परमाणु हतियारको वृद्धि-विकासको विषय प्योङयाङको कानुनको हिस्सा बनेको छ ।

उत्तर कोरियाली समाचार संस्था केसीएनएका अनुसार त्यहाँको संसद र सर्वोच्च अदालतले दुई दिनको बृहत् छलफलपछि परमाणु हतियारको विषय संविधानमा समेट्न सर्वसम्मतिले सहमति जनाएका हुन् । नयाँ संवैधानिक संशोधनले उत्तर कोरियाको आणविक शक्ति बढोत्तरीको उद्देश्यलाई राज्यको आधारभूत कानुनका रूपमा स्थापित गर्नेछ ।

उत्तर कोरियाली सर्वोच्च नेता किम जोङ उनले संसदमा यस विषयमा भनेका छन्, ‘देशको परमाणु क्षमतालाई थप मजबुत गर्ने नीतिलाई कानुन बनाइएको छ । हामी धेरैभन्दा धेरै परमाणु हतियार बनाउन चाहन्छौँ किनभने हामी हाम्रो अस्तित्व सुरक्षित गर्न चाहन्छौँ र कुनै पनि सम्भावित युद्ध रोक्न चाहन्छौँ ।’

किमले परमाणु हतियारको तीव्र विकासपछि त्यसलाई देशका विभिन्न हिस्सामा तैनाथ गर्न आदेश पनि दिएका छन् । उनी थप भन्छन्, ‘अमेरिकाले सैन्य उक्साहटको सबै सीमा पार गरेको छ । उसले दक्षिण कोरियासँग मिलेर हाम्रो सीमा क्षेत्र नजिक सैन्य अभ्यास गरिरहेको छ भने हतियार तैनाथ गरेको छ ।’ उनले अमेरिका जापान र दक्षिण कोरियाको त्रिदेशीय अभियानलाई नेटोको एसियाली स्वरुप भन्दै निन्दा पनि गरे ।

यी देशको युद्ध अभ्यासलाई उत्तर कोरियाले आफूमाथि आक्रमणको प्रशिक्षण भन्ने गरेको छ । मंगलबार मात्र दक्षिण कोरियाले १० वर्षमा पहिलोपटक सैन्य परेडको आयोजना गर्दै उत्तर कोरियाको शासन समाप्त गर्ने चेतावनी दिएको थियो । त्यहाँका राष्ट्रपति युन सुक योलले उत्तर कोरियाबाट परमाणु हतियार आक्रमण भएको खण्डमा आफूले अमेरिकासँग मिलेर आक्रमण गर्ने र सर्वोच्च नेता किम जोङ उनको शासन अन्त्य हुने बताएका थिए ।

सन् २००६ मै संयुक्त राष्ट्रसंघले उत्तर कोरियामाथि परमाणु हतियारकै विषयमा प्रतिबन्ध लगाएको थियो । प्योङयाङले परमाणु तथा ब्यालिस्टिक क्षेप्यास्त्र कार्यक्रम अगाडि बढाउनु राष्ट्रसंघको नियम विपरीत भएको सुरक्षा परिषद्‌ले जनाएको थियो ।

प्रकाशित मिति: बिहीबार, असोज ११, २०८० १६:५६