कोशीमा आलोपालो रणनीति बनाएको एमालेलाई सत्ता टिकाउन मुस्किल, बन्ला त केन्द्रको विपरीत प्रदेशमा गठबन्धन ?

कोशीमा आलोपालो रणनीति बनाएको एमालेलाई सत्ता टिकाउन मुस्किल, बन्ला त केन्द्रको विपरीत प्रदेशमा गठबन्धन ?

A+ A A-

सर्वाेच्च अदालतकाे आदेशपछि दोस्रोपटक कोशी प्रदेश सरकारको नेतृत्वमा आएकाे एमालेलाई सरकार टिकाउन सहज छैन । २२ भदौमा संविधानको धारा १६८ को उपधारा ३ अनुसार सबैभन्दा ठूलाे दलकाे संसदीय दलका नेताका हैसियतले एमालेका हिक्मत कार्कीले मुख्यमन्त्रीकाे शपथ लिएका थिए । उनले अब असाेज २० भित्र प्रदेशसभाबाट विश्वासकाे मत लिनैपर्छ । एक महिनाभित्र विश्वासको मत लिनुपर्ने संवैधानिक व्यवस्था छ ।

योपटक सरकारले विश्वासको मत लिन सकेन भने संविधानको धारा १६८ को उपधारा ५ अनुसार नयाँ सरकार बन्नेछ । र त्यसले पनि विश्वासकाे मत पाउन नसके प्रदेशसभा विघटन गरी ताजा जनादेशमा जानुपर्ने हुन्छ ।

काेशी प्रदेशसभामा दलहरूकाे उपस्थितिकाे गणित निकै बांगाेटिंगाे छ । जसले गर्दा जुन दलकाे सरकार बने पनि विश्वासकाे मत पाउन कठिन भइरहेकाे छ ।

एमाले सकेसम्म कार्की नेतृत्वकाे सरकारलाई निरन्तरता टिकाउने रणनीतिमा छ । 'अहिलेको सरकारलाई नै निरन्तरता दिनु सबैभन्दा राम्रो कुरा हो । त्यसका लागि कोशी प्रदेशसभामा भएका सबै राजनीति दलहरूसँग एक दुई दिनमा छलफल सुरु गर्ने तयारी गरेका छाैँ', एमाले सचिव तथा कोशी प्रदेश इन्चार्ज रघुविर महासेठले भने ।

महासेठले थप भने, ‘अझै केही दिन बाँकी छ । हामी यहि सरकारको निरन्तरताको लागि प्रयास गर्ने छौँ । पहिलो चरणमा प्रदेशमा छलफल गर्ने छौँ । अर्को चरणमा केन्द्रमा पनि छलफल गरेर अगाडि बढ्छौं ।’

केन्द्रमा पानी बारबारको अवस्थामा रहेका दलहरूसँग पनि एमालेले कोशीमा भने सम्पर्क गरिरहेकाे छ ।

सरकारलाई निरन्तरता दिनका लागि राजनीतिक दलहरूबीच सहमति हुन आवश्यक रहेको एमाले स्थायी कमिटी सदस्य शेरधन राई बताउँछन् । उनले भने, ‘एमाले अहिले दुवै विकल्पमा कुरा गर्न तयार छ । तर सकेसम्म अहिलेको सरकारलाई निरन्तरता दिउँ तर पालै पालो कसले कति समय सरकार संचालन गर्ने भनेर सहमति गर्नुपर्छ । होइन भने उपधार ५ मा गएर निमार्ण हुने सरकारका बारेमा पनि पहिला नै सहमति गर्न दलहरू तयार हुनुपर्छ । तर सहज भनेको अहिलेको सरकारलाई निरन्तरता दिने तर लिखित सम्झौता विश्वासको मत लिनुभन्दा पहिला गर्नुपर्छ ।’

२४ पुस २०७९ मा पहिलोपटक मुख्यमन्त्री बनेका कार्की विश्वासको मत पाउन नसकेपछि १५ असार २०८० मा पदमुक्त भएका थिए । ९३ सदस्यीय कोशी प्रदेशमा विपक्षी गठबन्धनसँग बहुमत ४७ मत छ भने एमाले-राप्रपासँग ४६ मत छ । त्यसैले कार्कीले विश्वासकाे मत पाउन अहिलेकाे विपक्षी गठबन्धनलाई कुनै पनि हालतमा ताेड्नुपर्छ । विपक्षी गठबन्धनकाे कांग्रेससँग २९, मा‌ओवादी केन्द्रसँग १३, नेकपा एकीकृत समाजवादीसँग ४ र जसपासँग एक सिट छ । यी दलहरूमध्ये कसैले कार्कीलाई समर्थन नगरी कार्कीकाे सरकारले विश्वासकाे मत पाउँदैन ।

प्रतिकूल प्रदेशसभाकाे गणितका कारण एमाले आलाेपालाे रणनीतिमा छ । कार्की सरकारलाई निरन्तरता दिलाउने र त्यसमा नै आलोपालो गर्नेगरी सहमति गर्न तयार रहेको एमाले स्थायी कमिटी सदस्य राई बताउँछन् ।

राईलगायत एमाले नेताहरू अहिले गठबन्धनका नेताहरूसँग एक एक्लै भेटघाट छलफलमा रहेका छन् । तर देखिने गरी कुनै प्रगति भएकाे छैन । त्याे सहमति हुन गाह्राे पनि छ । किनकी केन्द्रकाे गठबन्धनविपरीत काेशीमा प्रदेशस्तरीय गठबन्धन बन्ने सम्भावना कम छ । प्रदेशमा केन्द्रकाे गठबन्धनविपरीत भए केन्द्रकाे सरकारमाथि नै संकट आउने जाेखिम छ ।

अहिलेसम्म राजनीतिक दलहरू मध्यावधि निर्वाचनमा जान नचाहेका तर मुख्यमन्त्री पहिला कसले पाउने भन्नेमा भने विभाजित देखिन्छन् । नेकपा एसका दलका नेता राजेन्द्र राईले अहिलेको अवस्थामा एमालेलाई सहयोग नगर्ने बताएका छन् । नेकपा एसले सर्वदलीय सरकार बने पनि गठबन्धनसहितको बन्नुपर्ने मत राखेकाे छ ।

प्रकाशित मिति: बिहीबार, असोज ११, २०८० १५:१०