लोसपाको परिवारवादले प्रभावित हुँदै जिल्ला संगठन विस्तार अभियान

लाेसपा अध्यक्ष महन्थ ठाकुर

A+ A A-

लोकतान्त्रिक समाजवादी पार्टी (लोसपा) भित्र असन्तुष्टि भुसको आगोझैँ फैलिन थालेको छ । अध्यक्ष महन्थ ठाकुरले विवादास्पद केन्द्रीय कमिटी बनाएको असन्तुष्टि र आक्रोशले संगठन परिचालनमै समस्या देखिन थालेको छ । साेमबार पार्टीको निर्देशनविपरीत ठाकुरले जम्बो केन्द्रीय कमिटी, पदाधिकारी मनोनीत गरेका थिए ।

त्यसको प्रत्यक्ष असर मधेशका संगठनमा पर्न थालेको हो । जनता समाजवादी पार्टीबाट अलग भई लोसपा निर्माण भएको दुई वर्षभन्दा बढी समय भइसक्दा पनि संगठन विस्तार गर्न नसकेको लोसपालाई अहिलेको असन्तुष्टिले कार्यकर्ता जोगाउनै हम्मेहम्मे पर्ने देखिएको छ । लोसपाको भद्रगोल परिस्थितिले उदास नेता तथा कार्यकर्ताहरू विकल्प खोज्न थालेका छन् ।

जसपाबाट विभाजित हुँदा नै कमजोर रहेको लोसपा चुनावले थप कमजोर बनेकाे थियो । अहिलेको असन्तुष्टिले थप मलजल गरेको छ । दिनदिनै कमजोर हुँदै गएको महन्थ ठाकुर नेतृत्वको लोसपा झन् कमजोर हुने चर्चा हुन थालेको छ । अर्कोथरी भने लोसपा कमजोर भए पनि ठाकुरले पार्टीभित्र आफूलाई बलियो बनाउने उद्देश्यले पनि यस्तो निर्णय गरेको हुन सक्ने विश्लेषण गरिरहरेका छन् ।

पार्टी अध्यक्ष ठाकुर जीवनको उत्तरार्धमा छन् । उत्तरार्धको जीवनमा पार्टीभित्र कमजोर नहुन यस्तो निर्णय लिएको हुन सक्ने चर्चा मधेशमा भइरहेको छ । लोसपाका एक नेता यो घटनालाई तीन किसिमले व्याख्या गर्छन् । उनले भने, ‘अध्यक्ष ठाकुरजी जीवनको उत्तरार्धमा हुनुहुन्छ, यस्तो अवस्थामा पार्टीलाई बलियो बनाए पनि आफूलाई कुनै उपलब्धि हुँदैनन्, त्यसकारण पार्टीको संगठन बलियो होस् वा नहोस्‌सँग कुनै सरोकार छैन भनेर सोचेको हो । दोस्रो, आफू अध्यक्ष हुदाँ आफ्ना नातेदार वा आसेपासे सबैलाई पद दिएको भन्नलाई पनि यस्तो गरेका हुन सक्छन् र तोस्रो लोसपालाई पनि तत्कालीन तमलोपाजस्तै बनाउन खोजेका हुन सक्छन् ।’

समावेशीताको बलियो आवाज निकाल्ने ठाकुरले नै ६५ जना पदाधिकारीमा ३२ जना मधेशी ब्राह्मण समुदायबाट पदाधिकारी राखेका छन् । हुन त, अध्यक्ष ठाकुरमाथि बेलाबेला परिवारवादसँगै जातीवादको आरोप पनि लाग्दै आएको छ । पछिल्लो पटक पार्टीको केन्द्रीय कार्यसमिति गठन गर्दा पनि अध्यक्ष ठाकुरमाथि परिवारवादको आरोप लागेको छ ।

अध्यक्ष ठाकुरले सम्धि उमाकान्त झालाई वरिष्ठ उपाध्यक्ष, सम्धिनी इन्द्रा झालाई उपाध्यक्ष, भतिजा अजयकुमार झालाई सचिव र छोरी डा. मिनाक्षी झालाई पार्टीको केन्द्रीय सदस्य बनाएका छन् । अध्यक्ष ठाकुरले आफ्नो बदनामीबाट बच्न वरिष्ठ नेता राजेन्द्र महतोका भजिता तथा मधेश प्रदेशसभा सदस्य उपेन्द्र महतोलाई महासचिव र लोसपाका नेता तथा महतोका ज्वाइँ अनिल महासेठलाई महासचिव बनाएका छन् । महासेठले भने सोही दिन आफू महासचिवमा नबस्ने भनेर सार्वजनिक रूपमै घोषणा गरिसकेका छन् ।

महतोसँगै अनिल झा पनि अध्यक्ष ठाकुरको निर्णयले असन्तुष्ट छन् । तर पार्टीका अर्का वरिष्ठ नेता तथा वर्तमान सरकारमा श्रम तथा रोजगार मन्त्री रहेका शरतसिंह भण्डारीले भने अध्यक्ष ठाकुरलाई समर्थन गरेको जस्तो देखिन्छ । अध्यक्ष ठाकुरले मन्त्री भण्डारीनिकट निर्जला राउतलाई वरिष्ठ उपाध्यक्ष तथा कोषाध्यक्ष, छोरी श्रृष्टि सिंह भण्डारीसहित साली र साढुभाइलाई पनि केन्द्रिय समितिमा राखेका छन् ।

लोसपाको केन्द्रमा देखिएको विवादको प्रभाव जिल्लाहरूमा पर्ने देखिन्छ । गत भदौ १८ मा महोत्तरीको बर्दिवासमा लोसपामा प्रदेश विस्तारित वैठकले पार्टीको संगठन सुदृढीकरण र विस्तार गर्ने निर्णय गरेको थियो । पार्टीको केन्द्रीय कार्यसमिति गठनपश्चात लोसपाले पनि जिल्लामा संगठन विस्तारको कार्य थाल्ने छ । यस्तो अवस्थामा केन्द्रमा देखिएको नेताहरू बीचको विवादको प्रभाव जिल्लामा पर्ने लोसपाकै नेताहरू बताउँछन् ।

प्रकाशित मिति: बिहीबार, असोज ११, २०८० ११:५४