लोसपाभित्र गुम्सिएको असन्तुष्टि महन्थ ठाकुरको निर्णयले छताछुल्ल

A+ A A-

८ असोजमा लोकतान्त्रिक समाजवादी पार्टी (लोसपा) ले ६३ पदाधिकारीसहित ३११ सदस्यीय केन्द्रीय समिति बनाएपछि चर्को आलोचना भइरहेको छ । शीर्ष नेताहरूले नातावाद देखाएको भन्दै पार्टीकै नेता तथा कार्यकार्तामा असन्तुष्टि देखिएको छ । लामो समयदेखि लोसपाभित्र रहेको असन्तुष्टि ठाकुरको यो निर्णयसँगै छताछुल्ल भएको छ ।

केही महिनाअघि लोसपाको कार्यकारणी समितिले २१ पदाधिकारीसहित ३५१ जना केन्द्रीय कार्यसमिति बनाउन अध्यक्ष महन्थ ठाकुरलाई अधिकार दिएको थियो । कार्यकारणी समितिले दिएको अधिकार दुरुपयोग गर्दै ठाकुरले ६५ पदाधिकारीसहित केन्द्रीय कार्यसमिति गठन गरेपछि लोसपामा विवाद बढेको हो ।

तत्कालीन राजपाका महासचिवसमेत रहेका राजिव झाले समाजिक सञ्जालमै ठाकुरलाई असक्षम र निरीह अध्यक्ष भएको टिप्पणी गरेका छन् । लोसपाले तत्काल नवगठित केन्द्रीय कार्यसमिति खारेज नगरे पार्टी नै समाप्त हुने उनको भनाइ छ ।

‘यो पार्टी नेतृत्वको असक्षमता, अकर्मण्य, अदुरदर्शी निर्णय हो । यसलाई तत्काल नसच्चाए पार्टी नै समाप्त हुन्छ । इन्जिन बिग्रेको गाडीको गन्तव्य हुँदैन, यो जानीजानी त्यो गाडीमा चढ्नु हुँदैन जो एक्सिडेन्ट हुने वाला छ,’ झा भन्छन् ।

पार्टी बलियो र जीवन्त राख्न वरिष्ठ नेता राजेन्द्र महतोलाई स्वेच्छाले नेतृत्व हस्तान्तरण गर्नुपर्ने उनको सुझाव छ ।

लोसपाका पुराना नेता रमन पाण्डेयले पार्टीको केन्द्रीय कार्यसमिति गठनमा आपत्ति जनाएका छन् । उक्त निर्णय अविलम्ब सच्चाउनुपर्ने उनको भनाइ छ । यो निर्णयले लामो समयदेखि पार्टीमा लागेका नेता तथा कार्यकर्ताको समर्पण र योगदानमा खेलवाड भएको उनी बताउँछन् ।

जसपाबाट विभाजित भएर लोसपा बनेको दुई वर्ष भइसक्दा पनि संगठन विस्तार हुन सकेको छैन । यस्तो अवस्थामा पदाधिकारीमा नेताहरूले आफन्तलाई घुसाउन थालेपछि कार्यकर्ता थप रुष्ट बनेका छन् । कार्यकर्ताको यो असन्तुष्टिले लोसपा थप कमजोर हुने त होइन भन्ने चिन्ता लोसपाका नेताहरूमा देखिन थालेको छ ।

लोसपाका एक नेताको बुझाइमा भने अध्यक्ष ठाकुरले पार्टी बलियो होस् नहोस् आफू बलियो हुनुपर्छ भन्ने मनसायका साथ यस्तो निर्णय गरेका हुन् । 'ठाकुरले आफू अध्यक्ष हुँदा आफ्ना नातेदार वा आसेपासेलाई पद दिएको भन्नलाई पनि यस्तो गरेका हुन सक्छन,' उनी भन्छन् ।

ठाकुरको यो निर्णयमा वरिष्ठ नेता राजेन्द्र महतो र अनिल झाले असन्तुष्टि जनाएका छन् । तर, अर्का वरिष्ठ नेता तथा श्रममन्त्री शरत सिंह भण्डारीले ठाकुरलाई साथ दिएको जस्तो देखिन्छ । लोसपामा भण्डारीनिकट मानिने निर्जला राउतलाई वरिष्ठ उपाध्यक्ष तथा कोषाध्यक्ष, छोरी श्रृष्टि सिंह भण्डारीसहित साली र साढुभाइ पनि केन्द्रीय समितिमा परेका छन् ।

महतोले आफूलाई जानकारी नै नगराई अनिल महासेठलाई महासचिव बनाइएको भन्दै बदनामीको जिम्मेवारी अध्यक्ष ठाकुरले लिनुपर्ने सार्वजनिक रूपमै टिप्पणी गरेका छन् । ठाकुरले आफन्तलाई मात्रै पदाधिकारी बनाउँदा आलोचना हुने डरले आफ्ना आफन्तलाई पनि पदाधिकारीमा समेटेको हुन सक्ने संकेत महतोको छ ।

अध्यक्ष ठाकुरले केन्द्रीय कार्यसमितिको लिस्ट निर्वाचन आयोग पठाएपछि मात्रै महतोलाई पदाधिकारीहरूको लिस्ट देखाएको लोसपा स्रोत बताउँछ । लिस्ट देखेपछि महतोले असमावेशी र जम्बो भन्दै आपत्ति जनाएको स्रोतको दाबी छ ।

नेता सवेन्द्रनाथ शुक्ला तथा अध्यक्ष ठाकुरका सम्धी उमाकान्त झाले लिस्ट तयार पारेको स्रोतको दाबी छ । लिस्ट फाइलन गर्नुअघि लोसपाका मधेश प्रदेश अध्यक्ष जीतेन्द्र सोनलसँग पनि सल्लाह भएको थियाे ।

तर, सोनल भने केन्द्रीय कार्यसमिति गठनको सबै अधिकार अध्यक्षसँग भएकाले आफूलाई त्यस विषयमा कुनै जानकारी नरहेको बताउँछन् ।

प्रकाशित मिति: बुधबार, असोज १०, २०८० १८:३१