एमाले बागमतीमा सहमतिको सम्भावना सकियो, अध्यक्षमा दाहाल र ढुंगेल भिड्ने

A+ A A-

नेकपा एमाले बागमती प्रदेशको अधिवेशनबाट सर्वसम्मत अध्यक्ष चयनकाे सम्भावना लगभग सकिएको छ । सोमबार उद्घाटन भएको प्रदेशको पहिलो अधिवेशनबाट सहमतिमा नेतृत्व चयनको प्रयास भए पनि त्यो असफल हुँदा चुनाव हुने भएको हो ।

निर्वाचन मण्डलले बुधबार अध्यक्षका आकांक्षीहरूलाई बोलाएर सहमतिको प्रयास गरेको थियो । तर आकांक्षीहरू पछि हट्न तयार नहुँदा चुनाव हुने लगभग पक्का देखिएको छ । अध्यक्षका आकांक्षी कृष्णप्रसाद दाहालले अब सर्वसम्मतिको सम्भावना सकिएको बताएका छन् । अध्यक्ष मण्डलले सर्वसम्मत गरेर जानका लागि छलफल गरे पनि त्यसमा सहमति नजुटेको उनी बताउँछन् ।

‘अध्यक्ष मण्डलले हामीसँग छलफल गरेकाे थियो । तर सहमति जुट्न सकेन । हामीहरूले स्वच्छ प्रतिस्पर्धामा जान्छौँ भनेपछि अब निर्वाचन प्रक्रियामा जाने भयाैं,’ दाहालले भने ।

निर्वाचन मण्डलका सदस्य शेरबहादुर तामाङ पनि आज बिहान अध्यक्षको लागि पहिलो चरणमा भएको सर्वसम्मतिको प्रयास असफल भएको बताउँछन् । तर, यो प्रयास अहिले पनि जारी रहेको उनको भनाइ छ । ‘सर्वसम्मतको प्रयास जारी छ,' तामाङले भने, 'अध्यक्षमा मात्र होइन, २४० जनामै सहमति गर्नुपर्छ । अधिकतम पदमा सर्वसम्मत गर्ने प्रयास जारी छ । नभए निर्वाचन छँदैछ ।’

सहमति हुनसक्ने पदहरूमा सहमति गर्न प्रयास गरिरहेको तामाङ बताउँछन् । ‘अध्यक्षमा सहमति हुन नसके पनि हरेक जिल्लामा सहमति गर्नुपर्ने हुन्छ । जसबाट उम्मेदवारी दर्ता गर्न पनि सहज हुन्छ । त्यही भएर अहिले जिल्ला जिल्लामा सहमतिको प्रयास भइरहेको छ । छिटै प्रक्रियामा जान्छौँ,’ उनले भने ।

एमाले बागमतीको अध्यक्षमा सुरुमा पाँच जनाले आकांक्षा देखाएका थिए । अन्तिममा दुई जनाबीच प्रतिस्पर्धा हुने देखिएको छ । तर, अहिले नै यति जना अध्यक्षको उम्मेदवार हुन्छन् भन्न हतारो हुने दाहाल बताउँछन् ।

‘अहिले यति जना नै अध्यक्षको आकांक्षी छौँ भन्ने छैन । धेरै जना पनि हुन सक्नुहुन्छ । दुई जनामा मात्र पनि प्रतिस्पर्धा हुनसक्छ,' दाहाल भन्छन्, 'सहमति नभएपछि अब बाँकी भनेको प्रतिस्पर्धा हो । आज उम्मेदवारी दर्ता भएर भोलि निर्वाचन हुन सक्छ ।’

एमाले नेताहरूका अनुसार, प्रदेश अध्यक्षमा मकवानपुरमा दाहाल र रामेछापका कैलाश ढुङ्गेलबीच प्रतिस्पर्धा हुने लगभग पक्का छ । सहमतिको प्रयास गरेको निर्वाचन मण्डललाई दुवै नेताहरूले चुनावी प्रतिस्पर्धामा जाने अडान सुनाएका छन् ।

सहमतिको प्रयास भए पनि त्यो सफल नहुँदा प्रतिस्पर्धामा जाने तयारी भएको अध्यक्षका ढुङ्गेल बताउँछन् । ‘सहमतिको प्रयास भएको थियो । तर सहमति हुन सकेन । हामीहरूले प्रतिस्पर्धामा जान्छौँ भनेका छौँ । अब प्रतिस्पर्धा हुन्छ,’ उनले भने ।

तीन दिनदेखिको माहोल हेर्दा अध्यक्षमा दाहाल र ढुङ्गेलबीच प्रतिस्पर्धी हुने देखिन्छ । चुनाव हुने देखिएपछि अध्यक्ष मण्डलले पहिलो चरणको मतदाताको नामावली सार्वजनिक गरेको छ । पहिलो चरणमा सार्वजनिक गरेका मतदार्ताको संख्या १ हजार १ सय ६४ छ ।

बागमतीको अध्यक्षका लागि दाहाल र ढुंगेलबीचको प्रतिस्पर्धालाई कतिपय एमाले नेताहरूले उपाध्यक्ष विष्णु पौडेल र महासचिव शंकर पोखरेलबीचको लडाइँका रूपमा पनि अर्थ्याएका छन् । जसमा अध्यक्ष केपी ओलीले पोखरेललाई साथ दिएको कतिपयको बुझाइ छ । बागमतीको नेतृत्व चयनमा पोलिटब्युरो सदस्यद्वय गोकुल बास्कोटा र महेश बस्नेत पनि गुटगत प्रतिस्पर्धामा देखिएका छन् ।

बागमतीको अध्यक्षमा महासचिव पोखरेलले ढुंगेललाई अघि सार्दा उपाध्यक्ष पौडेलले दाहाललाई मैदानमा उतारेका छन् । यही मेसोमा पोलिटब्युरो सदस्यद्वय बास्कोटा र बस्नेतको पनि छुट्टाछुट्टै लबिङ देखिएको छ । बास्कोटाले दाहाल र बस्नेतले ढुंगेललाई समर्थन गरेका छन् ।

३ वर्षपछि हुने पार्टीको ११औँ महाधिवेशनको रिहर्सल अधिवेशनबाट हुन थालेको एमाले वृतमा चर्चा हुन थालेको छ ।ओलीलाई सर्वसम्मत नेता स्वीकारेका पौडेल र पोखरेलले उनीपछिको नेतामा आफूलाई स्थापित गराउन प्रयास गरिरहेका छन् ।

एमाले बागमतीमा पूर्वमाओवादी नेताहरू पनि पदाधिकारीको आकांक्षी छन् । चितवनका जगन्नाथ आचार्य उपसचिवका आकांक्षी छन् । ‘जिल्ला-जिल्लाबाट साथीहरू प्रतिनिधि आउनुभएको छ । मैले उपसचिवमा आकांक्षा राखेको छु । छलफलमै छौँ,’ आचार्य भन्छन् ।

पूर्वमाओवादीबाट ७० जना जति प्रतिनिधि आएको अनुमान गरिएको छ । जिल्ला-जिल्लामा नै पदाधिकारी र सदस्यहरूको नाममाथि छलफल भइरहेकाले को कुन पदका आकांक्षी छन् अहिले नै भन्न नसकिने आचार्यको भनाइ छ ।

निर्वाचन मण्डलले केही समयअघि निर्वाचन कार्यतालिका सार्वजनिक गरेको छ । जसमा ३ बजे मनोनयन फारम वितरण, ४ देखि ६ बजेसम्म मनोनयन दर्ता, ७ बजे मनोनयन प्रारम्भिक नामावली प्रकाशन, ८ बजे उम्मेदवार अन्तिम नामावली प्रकाशन, ११ गते बिहानदेखी मतदान हुनेछ ।

प्रकाशित मिति: बुधबार, असोज १०, २०८० १५:२९