राहत शिक्षकहरूको चेतावनी- शिक्षक महासंघले खेल खेल्यो, महासंघविरुद्ध संघर्ष गर्छौं

आन्दोलनरत राहत शिक्षकहरूले शिक्षक महासंघले धोका दिएको निष्कर्ष निकालेका छन् । राहत शिक्षकहरूले अब महासंघ खारेजीको माग राखेर संघर्ष गर्ने चेतावनी दिएका छन् ।

शिक्षा मन्त्रालयमा बुधबार भएको अनौपचारिक छलफलपछि राहत शिक्षक केन्द्रीय समितिका अध्यक्ष खेमराज अधिकारीले महासंघले खेल खेलेको बताए । ‘महासंघले खेल खेलेको छ । शिक्षक महासंघ खारेजी हुनुपर्छ भनेर संघर्ष गर्छौं,’ उनले भने ।

महासंघकी अध्यक्ष कमला तुलाधर कसैले चाहेर महासंघ खारेज नहुने बताउँछिन् । र, राहत शिक्षकको माग सम्बोधन गरेको उनी बताउँछिन् । ‘कसैले खारेज गर्छौं भनेर महासंघ खारेज हुन्छ ? हामीले राहत शिक्षकलाई धोका दिएको छैन । ७५ प्रतिशत पुर्‍याएको छ । कसरी धोका हुन्छ ? थप सहजीकरण पनि गरिरहेका छौँ,’ उनले भनिन् ।

Rahat Teacher protest (7)1695800089.jpg

गत ५ असोजमा महासंघले सरकारसँग ६ बुँदे सम्झौता गरेको थियो । उक्त सम्झौतमा राहत शिक्षकले विरोध जनाउँदै आएका छन् । २०७५ सालभन्दा अगाडिका ४० हजार शिक्षकहरू विस्थापित नहुने गरी ऐन बन्नुपर्ने माग राहत शिक्षकहरूको छ । शिक्षा विधेयकमा ५० प्रतिशत आन्तरिक र ५० प्रतिशत खुला गर्ने थियो ।

६ असोजको सहमतिमा ७५ प्रतिशत आन्तरिक र २५ प्रतिशत खुला गर्ने सहमति भएको छ । तर, यसमा राहत शिक्षक सहमत छैनन् । शतप्रशित नै आन्तरिक हुनुपर्ने र शिक्षा सेवा आयोगको परीक्षामा असफल भए आर्थिक सहयोग दिएर बिदा दिनुपर्ने माग राहत शिक्षकको छ । ‘४० हजार शिक्षकको ७५ प्रतिशतको सट्टा शतप्रतिशत हुनुपर्छ । परीक्षामा असफल भए आर्थिक सहयोग दिएर बिदा गर्नुपर्छ भन्ने माग हो,’ अधिकारी भन्छन् ।

प्रहरीले हातपात गरेको आरोप

राहत शिक्षकको शान्तिपूर्ण र्‍यालीमा प्रहरीले बल प्रयोग गरेको आरोप राहत शिक्षकले लगाएका छन् । बानेश्वर सडकखण्डमा प्रहरीले हस्तक्षेप गरेको अध्यक्ष अधिकारीले बताए । ‘शान्तिपूर्ण र्‍यालीमा शिक्षकहरूमाथि हातपात भएको छ,’ उनले भने । राहत शिक्षकहरू माइतीघरदेखि नयाँ बानेश्वरसम्म पुगेका थिए । र, निषेधित क्षेत्र तोड्न खोजेपछि प्रहरीले भिडलाई नियन्त्रण गर्न खोजेको हो ।

Rahat Teacher protest (1)1695800084.jpg

वार्ता गर्न औपचारिक रूपमा बोलाउनु पर्ने सर्त

आज शिक्षा मन्त्रालयका अधिकारी र राहत शिक्षकबीच अनौपचारिक छलफल भएको छ । वार्ताका लागि औपचारिक रूपमा बोलाउनुपर्ने माग राहत शिक्षकको छ । ‘आज माग के हो भनेर सोध्न मन्त्रालयमा बोलाउनु भएको थियो । अनौपचारिक छलफल भएको छ । वार्तामा बस्न औपचारिक रूपमा बोलाउनुपर्छ,’ अधिकारीले भने । शिक्षा मन्त्रालयका प्रवक्ता राहत शिक्षकको गुनासो सरकारसँग भन्दा पनि शिक्षक महासंघसँग रहेको बताउँछन् ।

‘उहाँहरूसहित सहमति भएको हो । महासंघसँग गुनासो देखियो । थप स्पष्ट महासंघले गर्नुपर्छ । आवश्यक परेमा हामी छलफल गर्न तयार छौँ,’ शिक्षा मन्त्रालयका प्रवक्ता शिवकुमार सापकोटाले भने ।

Rahat Teacher protest (5)1695800087.jpg