जनप्रतिनिधिहरूको उत्ताउलो व्यवहारले शिक्षकहरू चिढिएका हुन्: सुनिलरञ्जन सिंह (अन्तर्वार्ता)

जनप्रतिनिधिहरूको उत्ताउलो व्यवहारले शिक्षकहरू चिढिएका हुन्: सुनिलरञ्जन सिंह (अन्तर्वार्ता)

A+ A A-

तत्कालीन स्थानीय तह सीमा निर्धारण आयोगका सदस्य सुनिलरञ्जन सिंहले शिक्षकहरू आन्दोलित हुनुमा जनप्रतिनिधिहरूको उत्ताउलो व्यवहार जिम्मेवार रहेको बताएका छन् ।

जनप्रतिनिधिहरूमा राजनीतिक पूर्वाग्रह तथा व्यवस्थापकीय अभाव देखिएकाले शिक्षकहरू आन्दोलित बनेको उनले बताए । ‘केही जनप्रतिनिधिमा राजनीतिक पूर्वाग्रह तथा व्यवस्थापकीय अभाव देखियो । त्यसैले शिक्षकहरूले स्थानीय सरकार मातहत बस्दैनौँ भन्ने स्थिति आयो,’ शिलापत्रसँगको कुराकानीमा उनले भने ।

कानुन नबनाएर आफ्नो अनुकूलतामा शिक्षा र शिक्षकहरूप्रति जनप्रतिनिधि प्रस्तुत हुँदा शिक्षकहरू चिढिएको उनले बताए । कुराकानीका क्रममा उनले थपे, ‘यसको जिम्मा शिक्षा संघले नै जिम्मा लिनुपर्छ, स्थानीय सरकार स्रोतसाधनविहीन छ भन्नु संविधानविपरीत हुन्छ, यो संघीयता विरोधी कुरा हो ।’

आफूहरूले तत्कालीन सीमा निर्धारण गर्दैगर्दा यी समस्या आउँछन् भन्ने लागेरै प्रतिवेदनसहित केही सुझाव सरकारलाई दिएको उनले बताए । उनले भने, ‘निर्वाचनलगत्तै निर्माण गर्नुपर्ने ऐन कानुनबारे हामीले सुझावसहित त्यो प्रतिवेदन दिएका थियौँ । र, संघदेखि प्रदेश कानुन बनाउने कुरामा उत्साहित देखिएनन् ।’

स्थानीय सरकारले आफूले पाएको अधिकार प्रयोग गरेर कानुन बनाएर काम गर्दा संघीय कानुन बनेको छैन भन्ने छुट अब शिक्षकहरूलाई नभएको उनले बताए । अधिवक्तासमेत रहेका सिंहले भने, ‘संविधानले दिएकै अधिकार प्रयोग गरी बनाइएका स्थानीय कानुन बाझिने गरी संघीय कानुन आउँदैन । यदि त्यसो भयो भने त्यो अदालतको क्षेत्राधिकारभित्र पर्छ ।’