आफन्तलाई पदाधिकारी बनाएपछि लोसपामा बबण्डर, महासेठले भने- महासचिवबाट मेरो नाम हटाइदिनू

आफन्तलाई पदाधिकारी बनाएपछि लोसपामा बबण्डर, महासेठले भने- महासचिवबाट मेरो नाम हटाइदिनू

A+ A A-

लोकतान्त्रिक समाजवादी पार्टी (लोसपा) ले सोमबार केन्द्रीय केन्द्रीय समिति पुनर्गठन गरेको छ । पुनर्गठन गरेर लोसपाले ६३ पदाधिकारीसहित ३११ सदस्यीय केन्द्रीय समिति बनाएको हो ।

जम्बो पदाधिकारीसहितको केन्द्रीय कमिटी गठन गरे पनि लोसपामा विवाद झन् उग्र बनेको छ । महत्त्वपूर्ण पदहरूमा आसेपासे र आफन्तलाई राखिएको भन्दै लोसपामा तीव्र असन्तुष्टि बढेको हो । पार्टी अध्यक्ष तथा वरिष्ठ नेताले आफ्नै हात जगन्नाथ गरी सम्धीसम्धिनीदेखि भाई भतिजा, छोरी ज्वाइसम्मलाई पार्टी पदाधिकारीमा अटाएको भन्दै विरोध भएको हो ।

स्थापनाको २ वर्षसम्म केन्द्रीय कमिटी बनाउन नसकेको लोपसाले सोमबार केन्द्रीय समिति पुनर्गठन गरेको हो । उक्त केन्द्रीय समितिको पदाधिकारीमा अध्यक्ष महन्थ ठाकुर मात्र होइन, वरिष्ठ नेता राजेन्द्र महतो र शरतसिंह भण्डारीले पनि आफन्तलाई घुसाएका छन् ।

जसपाबाट विभाजित भएर गठन भएलगत्तै लोसपा गत वर्ष चुनावमा होमिएको थियो । संगठन विस्तारसमेत गर्न नभ्याएको लोसपाभित्र ३१ सदस्यीय केन्द्रीय कार्यकारिणी समितिमै विवाद थियो । त्यही विवादका कारण चुनावको नतिजासमेत प्रभावित भएको लोसपाका नेताहरूको विश्लेषण थियो ।

मधेशका शीर्ष मानिएका नेताहरू महन्थ ठाकुर, राजेन्द्र महतो, शरतसिंह भण्डारी, अनिल झाहरू रहेको लोसपा चुनावमा जम्माजम्मी ४ सिटमा खुम्चियो ।

त्यतिबेला अध्यक्ष ठाकुरले छोरी मिनाक्षी झालाई समानुपातिकको पहिलो नम्बरमा राखेपछि लोसपामा तीव्र विवाद भएको थियो । सोही कारण समानुपातिकमा मतदान नगर्न पार्टीभित्रै अनौपचारिक अभियान चलेको पनि बताइएको थियो । त्यहीकारण चुनावमा लोसपाले थ्रेसहोल्ड समेत कटाउन सकेन ।

सार्वजनिक भएको सूचीअनुसार राजेन्द्र महतो, शरत सिंह भण्डारी र अनिल झालाई वरिष्ठ नेता बनाइएको छ । त्यसैगरी सर्वेन्द्रनाथ शुक्लालाई पार्टीका वरिष्ठ सहअध्यक्ष बनाइएको छ ।

त्यस्तै ६ जनालाई पार्टीको वरिष्ठ उपाध्यक्ष, १५ जनालाई उपाध्यक्ष, १६ जनालाई महासचिव, ८ जना सहमहासचिव, ११ जना सचिव र २ जना कोषध्यक्ष र १ जना सहकोषध्यक्ष बनाइएको छ । तिनै पदाधिकारी मनोनित गर्ने क्रममा परिवारवाद हावी भएको हो ।

अध्यक्ष ठाकुरले सन्धी उमाकान्त झालाई वरिष्ठ उपाध्यक्ष, सम्धीनी इन्द्रा झालाई उपाध्यक्ष, भतिजा अजय कुमार झालाई सचिव र छोरी डा. मिनाक्षी झालाई पार्टीको केन्द्रीय सदस्य बनाएका छन् ।

त्यस्तै, वरिष्ठ नेता राजेन्द्र महतोका भजिता तथा मधेश प्रदेशसभा सदस्य उपेन्द्र महतोलाई महासचिव र लोसपाका नेता तथा महतोका ज्वाइँ अनिल महासेठलाई महासचिव बनाइएको छ । पार्टीका वरिष्ठ नेता शरतसिंह भण्डारीनिकट निर्जला राउतलाई वरिष्ठ उपाध्यक्ष तथा कोषाध्यक्ष र छोरी श्रृष्टि सिंह भण्डारीलाई सचिव बनाइएको छ ।

लोसपाका युवा नेता तथा महतोका ज्वाइँ महासेठले भने आफू पार्टीको महासचिव जस्तो गरिमाय पद अस्वीकार गरेका छन् । उनले फेसबुकमा स्टाटस लेखेरै महासचिव पदबाट हटाएर योग्यलाई जिम्मेवारी दिन आग्रह गरेका छन् ।

पुनर्गठित केन्द्रीय समितिप्रति राजेन्द्र महतो र अनिल झा पनि असन्तुष्ट छन् । उनीहरूका आफ्ना मान्छे नपरेका कारण महतो र झा असन्तुष्ट रहेको लोसपाका नेताहरू बताउँछन् । आफूमाथि परिवारवादको आरोप नलागोस् भनेर ठाकुरले महतोको ज्वाइँलाई पनि पदाधिकारीमा राखेको भन्दै लोसपाभित्र चर्चा चलेको छ । महतो असन्तुष्ट भएकै कारण उनका ज्वाइँ महासेठले महासचिव अस्वीकार गरेको चर्चा छ ।

लोसपाका महासचिव डा. सुरेन्द्र झा भने राजनीतिक व्यक्ति र गैराजनीतिक व्यक्तिबीच मनोनित गर्न समागम भएको नदेखिएको स्वीकार्छन् । यो तदर्थ समिति भएको र महाधिवेशनबाट सच्याउन सकिने उनको भनाइ छ ।

‘अहिले असन्तुष्ट देखिए पनि अहिले तदर्थ समिति भएकाले महाधिवेशनपछि सच्याउन सकिन्छ, अब त्यही बाटोमा जानुपर्छ,’ महासचिव झाले भने ।