नासाले अन्तरिक्षबाट ल्यायो क्षुद्रग्रहको अहिलेसम्मकै ठूलो टुक्रा, के भन्छन् वैज्ञानिक ?

अमेरिकी अन्तरिक्ष संस्था नासाको स्पेस क्याप्युसले अन्तरिक्षबाट क्षुद्रग्रहको अहिलेसम्मकै ठूलो टुक्रा संकलन गरेर पृथ्वीमा ल्याएको छ ।

क्षुद्रग्रहबाट नमूना संकलन गर्न सात वर्षअगाडि नै अभियान सञ्चालन गरिएको थियो । यस्तै, तीन वर्षअगाडि नै अमेरिकी यानले नमूना संकलन गरेको थियो । युटाहा मरुभूमिमा क्षुद्रग्रहको अहिलेसम्मकै ठूलो टुक्रा बोकेर नासाको ओसिरिस-रेक्स अन्तरिक्षयानको क्याप्सुल आइतबार पृथ्वीमा अवतरण गरेको हो ।

नासाका अनुसार क्याप्सुलबाट झिकिएको क्षुद्रग्रहको नमूना सोमबार ह्युस्टनस्थित नासाको जोन्सन स्पेस सेन्टरको नयाँ प्रयोगशालामा पठाइनेछ । यो भवनमा आधा शताब्दीभन्दा अघि अपोल्लो अन्तरिक्षयात्रीहरूले जम्मा गरेका लगभग ४०० किलोग्राम चन्द्रमाको चट्टानहरू पनि छन् ।

नासाका अनुसार कार्बनद्वारा निर्मित बेन्नु क्षुद्रग्रहको कम्तीमा एक कप टुक्रा पृथ्वी ल्याइएको हो । यसअघि जापान क्षुद्रग्रहको नमूना संकलन गर्ने एक मात्र राष्ट्र थियो । जापानले एक चम्चामा अटाउने नमूना संकलन गरेर पृथ्वीमा ल्याएको थियो ।

नासाको ओसिरिस-रेक्स रोवोटिक यानले तीन वर्षअगाडि नै बेन्नु क्षुद्रग्रहको नमूना संकलन गरेको थियो । उक्त यान भने ७ वर्षअगाडि अन्तरिक्षमा पठाइएको थियो । बेन्नु क्षुद्रग्रह सन् १९९९ मा पत्ता लागेको क्षुद्रग्रह हो । हरेक ६ वर्षमा एकपटक यो क्षुद्रग्रह पृथ्वी नजिकैबाट गुज्रिन गरेको वैज्ञानिकहरू बताउँछन् ।

अमेरिकी इम्पाएर बिल्डिङभन्दा बेन्नु क्षुद्रग्रह केही फराकिलो छ । यसको लम्बाई ५०० मिटर हो । बेन्नु क्षुद्रग्रह प्रारम्भिक सौर प्रणालीको अवशेष भएको अनुमान छ । हाल पृथ्वीमा ल्याइएको नमूनाबाट पृथ्वी जस्ता चट्टानी ग्रहहरूको उत्पत्ति र विकासबारे बहुमूल्य र महत्त्वपूर्ण जानकारी हासिल गर्न सकिने अपेक्षा वैज्ञानिकहरूले गरेका छन् ।

सन् २०१६ को सेम्टेम्बर महिनामा ओसिरिस-रेक्स अन्तरिक्षयानलाई रकेटबाट अन्तरिक्षमा पठाइएको थियो । ओसिरिस-रेक्स सन् २०१८ मा बेन्नु क्षुद्रग्रहमा पुगेको थियो । सोहीबेला संकलन गरिएको नमूना यतिबेला अन्तरिक्षयानको क्याप्सुलमा पृथ्वीमा ल्याइएको हो ।