कांग्रेस केन्द्रीय समिति बैठकमा हिन्दू धर्मकाे चर्चा

A+ A A-

नेपाली कांग्रेसको केन्द्रीय समिति बैठकमा संघीयता र धर्म निरपेक्षतामाथि प्रश्न उठेको छ । केन्द्रीय सदस्य शंकर भण्डारीले महासमिति बैठकमा हिन्दु राष्ट्र एजेन्डाबारे छलफल हुनुपर्ने बताए ।

‘पहिले पनि हामीले हस्ताक्षर गरेर दिएको हो यसबारे महासमितिमा छलफल भएन । महामन्त्रीलाई आग्रह गर्न चाहन्छु हामी निर्वाचित सदस्य हौं । समितिमा यो एजेन्डा छलफल हुनुपर्छ । नत्र धेरै अप्ठ्यारो पर्नेछ,’ उनले भने ।

भण्डारीले संघीयता बारेमा पार्टीले पुनर्विचार गर्नुपर्ने पनि बताएका छन् । पार्टी मुख्यालय सानेपामा जारी केन्द्रीय समिति बैठकमा उनले वर्तमान संघीय प्रणालीले राष्ट्रिय सुरक्षाको दृष्टिकोणले खतरा रहेको बताए ।

‘संघीय पणाली मुलुकको समग्र हित र राष्टिय सुरक्षा दृष्टिकोणले खतरा छ । यसमा पार्टीले पुर्नविचार गर्नुपर्दछ,’ उनले भने ।

अर्का केन्द्रीय सदस्य भीम पराजुलीले पनि वैदिक सनातन हिन्दु राष्ट्रको पक्षमा कांग्रेस उभिनुपर्ने बताए । ‘यसले मात्र देश र कांग्रेसको कल्याण हुन्छ भन्नेमा म विश्वास राख्दछु र यसलाई लिएर कांग्रेस अगाडि बढ्नुपर्दछ भन्ने विचार राख्दछु,’ उनले भने ।

उनले कोशीमा सत्ता गठबन्धनले राप्रपासँग तालमेल गरेर अघि बढे मात्रै सरकार स्थिर रहन सक्ने बताए ।

‘कोशी प्रदेशको सरकार गठन सन्दर्भमा राप्रपा सँग तालमेल नगरिकन अघि बढ्दा पटकपटक अस्थिरता दोहोरिएको छ,’ उनले भने, ‘कोशी प्रदेशमा सरकारको स्थिरता खोज्ने हो भने राप्रपासँग निर्णायक बार्ताअघि बढाएर नयाँ समीकरण निर्माण गर्नुपर्दछ ।’

गण्डकी प्रदेशका मुख्यमन्त्री तथा केन्द्रीय सदस्य सुरेन्द्रराज पाण्डेले संघीयताबारे प्रश्न उठिरहेको बताए । उनले केन्द्र र स्थानीय सरकार पहिले पनि रहेको तर प्रदेश नयाँ भएकोले प्रहार प्रदेश सरकारमाथि हुने गरेको पनि बताए ।

‘संघीयता संविधानमा लेखेकोले आत्मसाथ गरेको हो कि लागु गर्ने इच्छाशक्ति पनि छ ? असन्तुष्टिको पहिलो प्रहार संघीयतामाथि हुँदैछ । यसमा हामीले प्रष्ट दृष्टिकोण पनि राख्नुपर्छ,’ उनले भने ।

कानून बनाउने रूची विगतका र अहिलेका सरकारमा नदेखिएको उनको भनाइ छ ।

‘संविधानले कल्पना गरेअनुसार कानुन बनाउने विगतका सरकारले पनि खासै रूची देखाएका थिएनन् । मुख्यमन्त्रीहरूको पोखराको बैठकले बुँदाहरू लेखेर पनि दिएका थियौं, प्रतिबद्धता पनि आएको थियो। तर त्यसअनुसार कानुन बन्ने तहमा पुगेका छैनौं,’ उनले भने ।

उनले प्रदेशले अधिकार नपाए प्रदेश सरकारको औचित्य नेदेखिने बताए ।

‘प्रहरी समायोजन, संघीय निजामती कानुन र जग्गा प्राप्ति अधिकार प्रदेश सरकारले पाउन सकेन भने प्रदेश सरकार हामीले कल्पना गरेजस्तो काम गर्न सक्ने अवस्थामा रहँदैन । यी कानुन बनाउन सरकारले पहल गर्नुपर्‍याे,’ उनले भने । बैठकमा अर्का केन्द्रीय सदस्य आनन्द ढुंगानाले प्रेदशमाथि प्रश्न उठ्दा पार्टीले संघीयता बलियो पार्ने काम गर्नुपर्ने बताए ।

‘संघीयताको बारेमा प्रश्न उठेको छ । साँच्चै नै संघीयता चाहेका हौं भने संघीयतलाई बलियो बनाउनुपर्छ । कांग्रेस मात्रै टेवा दिने पार्टीको रुपमा रहेको छ,’ उनले भने ।

प्रकाशित मिति: आइतबार, असोज ७, २०८० १३:०२