माओवादी द्वन्दकालमा बन्द गरिएका छोटी भन्सार कार्यालय सुरु भएनन्, फुटकर व्यवसायी मारमा

माओवादी द्वन्दकालमा बन्द गरिएका छोटी भन्सार कार्यालय सुरु भएनन्, फुटकर व्यवसायी मारमा

A+ A A-

माओवादी द्वन्दकालमा सुरक्षाको कारण देखाउँदै बन्द गरिएको महोत्तरी जिल्लाका ४ वटा छोटी भन्सार कार्यलय हालसम्म संचालनमा नहुदाँ फुटकर तथा साना व्यवसायीहरू मारमा परेका छन् ।

माओवादी द्वन्द उत्कर्समा पुगेको बेला सुरक्षाको कारण देखाउँदै महोत्तरी जिल्लाको रघुनाथपुर छोटी भन्सार कार्यालय, कटैया छोटी भन्सार कार्यालय, पोखरभिण्डा र बथनाहा छोटी कार्यालय बन्द गरिएको थियो । त्यतिबेला बन्द भएको ती कार्यालय माओवादी शान्ति आएर सत्तामा पुगेको १६ वर्ष पुगिसक्दा पनि ती कार्यालय संचालन नहुदाँ सरकारको लाखौँ रुपैयाँ राजस्व गुम्दै गएको छ भने साना तथा फुटकर व्यवसायीहरू मारमा परेका छन् ।

बन्द रहेका छोटी कार्यालयहरू सुरु नहुदाँ हाल उक्त नाकाबाट तस्करहरूले तस्करीका लागि व्यापक मात्रामा सो नाका प्रयोग गरिरहेको स्थानीयको भनाइ छ । महोत्तरी जिल्लाको दक्षिणी भारतीय सीमासँग जोडिएका ती नाकाहरूमा भन्सार कार्यालयहरू पुनः सुरु गर्न स्थानीय व्यवसायीहरूको माग छ । पछिल्लो समय ती छोटी भन्सार कार्यालयहरू बन्द हुदाँ व्यवसायीहरू बिना अवरोध ती नाकाबाट समान ल्याउने गरेको त्यस भेगका व्यापारीहरू बताउँछन् । भारतबाट आउने समानको भन्सार नकटाई ल्यानुपर्ने वाध्यता रहेको मनरासिसवाका व्यवसायी बिनोद साह भन्छन् ,‘चहलपहलसमेत घटेकाले यसको असर बजारमा परेको छ ।’

छोटी भन्सार कार्यालय सुरु नहुदाँ सो नाकामा सुरक्षाकर्मीको बाक्लोको उपस्थित रहे पनि भारतबाट ल्याउने समान पक्राउ गर्ने गरेको संघीय सरकारले बन्द रहेको छोटी भन्सार कार्यालय तुरुन्त सुरु गर्नुपर्ने माग व्यवसायीको रहेको छ । ती भन्सार कार्यालयहरू बन्द भएपछि भारतबाट समान अयात गरेर व्यवसाय संचालन गर्ने व्यापारीहरूलाई जीविकोपार्जन गर्न समस्या भएको अर्का व्यापारी कपिल देव साह बताउँछन् ।

उनी भन्छन्, ‘छोटी भन्सार कार्यालय सुरु नहुदाँ भारतबाट ल्याउने समानको भन्सार कटाउन करिव ५० किलोमिटर बाटो छिचोल्दै जलेश्वर भन्सार कार्यालय पुग्नुपर्ने वाध्यता छ, त्यसकारण कतिपय व्यापारी भन्सार तिर्न जाँदैनन्, प्रहरीलाई केही रकम दिएर आफ्नो समानहरू ल्याउने गर्छन् ।’ महोत्तरीमा छोटी भन्सार कार्यालय नहुदाँ भारतबाट बिना भन्सार लुकीछिपी समान नेपाल भित्रिने गरेको छ । जसको कारण सरकारलाई महिनामा लाखौँ रुपैयाँ राजस्व घाटा हुँदै आएको छ ।

छोटी भन्सार कार्यालय संचालनमा नरहदाँ त्यसको अवसर महोत्तरीको मुल भन्सार कार्यालयको राजस्वमा पर्ने गरेको छ । गत आर्थिक वर्षमा भन्सार विभागले जलेश्वर भन्सार कार्यालयलाई ३ अर्व ६३ करोड ९१ लाख राजस्व उठाउने लक्ष्य दिएकोमा २ अर्व ८१ करोड ७३ लाख ४० हजार मात्रै राजस्व उठाउन सकेको थियो ।

यता, जलेश्वर भन्सार कार्यालयका भिठामोडका प्रमुख अमित पौडेलले छोटी भन्सार कार्यालय संचालनमा लागि आवश्यक जनशक्ति नभएको र संचालन गर्दा खर्च पनि बढ्ने र त्यसको संचालनमा आफूहरूले ध्यान नदिएको बताए । छोटी भन्सार क्षेत्रमा हुने तस्करी नियन्त्रण गर्न, व्यापार सहजीकरण गर्न र व्यापारीलाई भन्सार विन्दुसम्म पुर्‍याउन त्यहाँ खटेको सुरक्षाकर्मीले भूमिका खेल्नुपर्नेमा उनले जोड दिए । हाल महोत्तरी जिल्लामा जलेश्वर भन्सार कार्यालय, मठिहानी र सम्सी भन्सार कार्यालय मात्र संचालनमा रहेका छन् ।