पूर्वमा फुटबल क्रेज

A+ A A-

पाँचथर सदरमुकाम फिदिममा रहेको खेलमैदान स्तरोन्नत्तिको काम समयमा नहुँदा मैदान खेल्न मिल्ने अवस्थामा थिएन । फिदिम नगरपालिकाको अगुवाइमा मैदान सम्याएर सामान्य खेल्न मिल्ने बनाएपछि आयोजित मैत्रीपूर्ण खेलमा उपस्थित दर्शकहरु देख्दा फुटबल हेर्ने भोक कति रहेछ भन्ने देखियो ।

नगरपालिकाले संविधान दिवसका अवसरमा राजनीतिक दल, पत्रकार र वाणिज्य संघ मिलाएर बनाएको नागरिक समाज र कर्मचारीबीच खेल आयोजना गरेको थियो । यो कुनै प्रतियोगिता नभए पनि सामान्य जानकारीका भरमा राम्रो संख्यामा दर्शकको उपस्थिति देखिएको थियो । खेल सम्पन्न हुँदासम्म साँझ झपक्क परेको थियो, दर्शकहरुले हुटिङ गरिरहेका थिए ।

यो खेलमैदानमा फुटबल प्रतियोगिता हुन नसकेको पाँच वर्ष भइसकेको छ । अझै कहिले खेल मैदानको निर्माण सकिने हो यकिन छैन । दसौँ संस्करणसम्म फाल्गुनन्द गोल्डकप र तेस्रो संस्करणसम्म पाँचथर गोल्डकप यहि मैदानमा भएर रोकिएका छन् ।

‘फूटबलप्रति यत्रो माया छ, खेलमैदान नभएर खत्तम भयो,’ पाँचथर फुटबल संघका पूर्वअध्यक्ष तथा पूर्व खेलाडी सुजन नेम्बाङको टिप्पणी थियो । केही हप्ता अगाडि ताप्लेजुङमा सम्पन्न ताप्लेजुङ गोल्डकपको फाइनलको दिन धेरै दर्शकले बसेर फुटबल हेर्न पाएनन् । खेल सुरु हुनु अगाडि नै दर्शकदीर्घामा टेक्ने ठाँउ नभएपछि टिकट बन्द गरिएको थियो ।

ताप्लेजुङका गाँउ गाँउबाट र छिमेकी जिल्लाबाट फुटबल प्रेमीहरु भानुजन माध्यमिक विद्यालयको खेलमैदानमा पुगेका थिए । अरु दिन पनि उलेख्य दर्शक पाएको प्रतियोगितामा फाइनलका दिन ओइरो लागेको थियो । आयोजक समितिका अध्यक्ष देवराज गुरुङका अनुसार फाइनलमा ७ लाख ५५ हजारको टिकट बिक्यो । करिब ७ सयभन्दा बढी गेटपास आयोजकले बाँडेको थियो भने मञ्चमा उलेख्य अतिथि समेत थिए । गुरुङका अनुसार प्रतियोगितामा ७४ लाख ४९ हजार रुपैँया संकलन गर्दै २३ लाख नाफा भएको छ ।

ताप्लेजुङमा दर्शकको यो उपस्थितिले फुटबलप्रतिको क्रेज देखाउँछ । गाँउदेखि शहरसम्म फुटबल प्रतियोगिता हुन्छन् । भाले, खसी कपदेखि ठूला ठूला प्रतियोगिता हुने गरेका छन् । प्रायः विद्यालयका खेलमैदानमा विद्यार्थीहरु फुटबल नै खेलिरहेका देखिन्छन् । मेला, पर्व, विभिन्न अवसरमा फुटबल प्रतियोगिता हुन्छ । शहर मात्र नभई गाँउका मैदानमा पनि दर्शकको उलेख्य उपस्थिति देख्न पाइन्छ ।

प्रतियोगितमा सानो, ठूलो आर्थिक सहयोग गर्नेहरु धेरै भेटिन्छन् । विदेश गएकाहरु पनि फुटबल प्रतियोगितामा सहयोग गर्न पछि परेको देखिँदैन । गाँउ अनुसारका मेलाहरुमा प्रतियोगिता हुने गर्छ । ठूलो धनराशीको प्रतियोगितामा विभिन्न ठाँउमा राम्रो खेल प्रर्दशन गर्न सक्ने खेलाडी ल्याइने गरेको पाइन्छ ।

पूर्वका पहाडमा फुटबलमा उत्साहजनक सहभागिता हुने गरेको रेफ्री श्याम दनुवार बताउँछन् । विभिन्न क्षेत्र पुगेर फुटबल खेलाउन क्रियाशील दनुवार भन्छन्, ‘सबै प्रतियोगितामा दर्शकको संख्या राम्रो रहेको हुन्छ । यो क्षेत्रका दर्शकहरु अनुशासित पनि छन् । दर्शकको फुटबलको प्रेम सहभागिताले पनि जनाउँछ ।’

पूर्वका ताप्लेजुङ, पाँचथर, तेह्रथमु, इलाम जस्ता पहाडी जिल्लामा गाँउ, पालीका, जिल्ला, राष्ट्रिय, अन्तर्राष्ट्रिय स्तरका प्रतियोगिता हुने गरेका छन् । गाँउका प्रतियोगितामा धेरै टिमले सहभागिता जनाउँछन् । ठूलो प्रतियोगितमा चर्चित टिम र राष्ट्रिय खेलाडी आइपुग्ने गर्छन् ।

खेलमैदान अभावले पाँचथरमा फाल्गुनन्द गोल्डकप स्थगित छ । इलाममा माइभ्याली गोल्डकप पनि रोकिएको छ । पूर्वी तराईका जिल्लामा हुने प्रतियोगितमा पनि पहाडबाट दर्शक पुग्छन् । त्यसो त पूर्वका झापा, मोरङ, सुनसरी खेलाडी उत्पादनका ‘पावर हाउस’ हुन् ।

‘नेपाली फुटबलमा पूर्वको योगदान महत्पूर्ण रहेको छ । राष्ट्रिय लेभलमा नै सर्पोट भएको छ । खेलाडी होस्, दर्शकको क्रेज पूर्व धरै राम्रो देखिन्छ’, अखिल नेपाल फुटवल संघका प्रवक्ता सुरेश शाह भन्छन्, गाँउ गाँउ, कुना कन्दरासम्ममा प्रतियोगिता हुने गरेको छ ।’ फुटबलको क्रेज भए पनि पूर्वले उपयुक्त खेलमैदानको अभाव भने भोगिरहेको छ ।

प्रकाशित मिति: शनिबार, असोज ६, २०८० १५:०४