मुख्यमन्त्रीसँग बहुमूल्य धातु, भौतिक मन्त्रीसँग सुन्तलाबारी र वनमन्त्रीसँग भैंसी

मुख्यमन्त्रीसँग बहुमूल्य धातु, भौतिक मन्त्रीसँग सुन्तलाबारी र वनमन्त्रीसँग भैंसी

A+ A A-

गण्डकी प्रदेशका मुख्यमन्त्री सुरेन्द्रराज पाण्डे र मन्त्रीहरुले सम्पत्ति सार्वजनिक गरेका छन् । नियुक्ति भएको ६० दिनभित्र सम्पत्ति विवरण सार्वजनिक गर्नुपर्ने आचारसंहिता रहे पनि करिब ५ महिनापछि बिहीबार सम्पत्ति सार्वजनिक गरेका हुन् । पाण्डेको नेतृत्वमा गत १४ वैशाखमा गण्डकीमा नयाँ सरकार बनेको थियो ।

मुख्यमन्त्रीसँग बहुमूल्य धातु

मुख्यमन्त्री पाण्डेसँग बहुमूल्य धातु हिरा–मोती छ । २ सेट हिरा र १ सेट मोती आफूसँग रहेको उनले सम्पत्ति विवरणमा खुलाएका छन् । उनीसँग चाँदी ५ सय तोला र सुन ४२ तोला छ । पैतृक सम्पत्ति र जग्गा बिक्रीसँगै बचत भएको तलबबाट हिरा, मोती, सुन र चाँदी जोडेको मुख्यमन्त्री पाण्डेले उल्लेख गरेका छन् । स्मरण रहोस्, बहुमूल्य धातु भए पनि हिरा र मोतीभन्दा सुन महँगो पर्छ ।

पाण्डेको नाममा गोरखा र काठमाडौंमा घर छ । ४ वटा बैंकमा गरेर आफ्नो नाममा २४ लाख ९६ हजार, श्रीमती बिनाको विभिन्न बैंकमा ६२ लाख ५२ हजार र छोरा सुयोग्यको १ लाख ५६ हजार रुपैयाँ मौज्दात रहेको पाण्डेले विवरणमा खुलाएका छन् । उनको एभरेष्ट बैंकमा २३ लाख रुपैयाँ ऋण छ ।

पाण्डे र उनको परिवारको नाममा विभिन्न कम्पनीको ७५ हजार १ सय कित्ता शेयर छ । मुख्यमन्त्री पत्नी बिनाको नाममा ३२ लाख रुपैयाँको कार छ । बैंकबाट २० लाख रुपैयाँ ऋण लिएर २०७३ सालमा मारुती बलेनो कार किनेको पाण्डेले विवरणमा उल्लेख गरेका छन् ।

अर्थमन्त्रीसँग निजी वन, बन्दुक

आर्थिक मामिलामन्त्री जीतप्रकाश आलेसँग तनहुँकै भिमादमा २५ कित्तामा जग्गा छ । सगोलमा साविकको भगवतिपुर गाविस वडा नं. ५ मा ५ कित्तामा जग्गा रहेको सम्पत्ति विवरणमा उल्लेख छ । जग्गालाई उनले पुर्ख्याैली स्रोत देखाएका छन् ।

अर्थमन्त्री आलेसँग पैतृक सम्पतिकै रूपमा २१ तोला सुन र २७ तोला चाँदी छ । कामना बचत तथा ऋण सहकारी संस्थामा ३ लाख र कृषि विकास बैंकमा ३३ कित्ता गरेर ३ लाख ३ हजार ३ सय रुपैयाँको शेयर रहेको उनले उल्लेख गरेका छन् । तीनवटा बैंक र एउटा सहकारीमा खाता रहेको खुलाएका उनले मौज्दात कति छ खुलाएका छैनन् । तर, आफ्नो नाममा ३४ लाख ७० हजार रुपैयाँ ऋण रहेको उल्लेख गरेका छन् ।

अर्थमन्त्री आलेको नाममा ६ रोपनी १० आनामा फैलिएको निजी वन छ । २०५४ साल चैतमा पैत्रिक सम्पत्तिबापत उक्त वन प्राप्त भएको अर्थमन्त्री आलेले खुलाएका छन् ।

यमाहा डिस्क मोटरसाइकल छ । त्यसबाहेक उनीसँग एकनाले बन्दुक पनि छ । स्वआर्जनबाट ३३ हजार रुपैयाँमा एकनाले ८ बोरको बन्दुक २०५४ सालमा किनेको विवरणमा उल्लेख छ ।

भौतिक मन्त्रीसँग सुन्तलाबारी

भौतिक पूर्वाधार तथा यातायात व्यवस्थामन्त्री रेशमबहादुर जुग्जालीले स्काभेटर र ट्याक्टरलाई सम्पत्ति देखाएका छन् । उनको एक्साभेटर साझेदारीमा हो । ९५ लाख रुपैयाँको एक्साभेटरमा उनले २० लाख लगानी गरेका छन् ।

२०७५ सालमा २३ लाख रुपैयाँमा ट्याक्टर र २०७४ मा ३ लाख ७० हजार रुपैयाँमा मोटरसाइकल खरिद गरेको मन्त्री जुग्जालीले खुलाएका छन् । मन्त्री जुग्जालीको नाममा म्याग्दीको मालिका गाउँपालिका–७ मा ११ आनामा बनेको एकतले ५ कोठाको पक्की पैतृक घर छ ।

मालिकामै मन्त्री जुग्जालीको नाममा १५ रोपनी जग्गा र बाबु खड्गबहादुर जुग्जालीको नाममा ३५ रोपनी जग्गा छ । मन्त्री जुग्जालीसँग ७ तोला सुन छ । उनको बैंक खातामा ५ लाख ९० हजार रुपैयाँ मौज्दात छ ।

जुग्जालीले हाइड्रो एम्पाएर प्रालिमा २५ लाखको शेयर ऋणमा खरिद गरेका छन् । उनको ६० लाख ऋण छ । मन्त्री जुग्जालीको परिवारको नाममा १ सय ५० बोट सुन्तला छ । बुवा खड्ग जुग्जालीको नाममा रहेको उक्त सुन्तलाबारीबाट वार्षिक ५ लाख रुपैयाँ आम्दानी भइरहेको उनले विवरणमा उल्लेख गरेका छन् ।

वनमन्त्रीसँग भैँसी !

उद्योग, पर्यटन वन तथा वातावरणमन्त्री दीपेन्द्रबहादुर थापाको नाममा बागलुङ नगरपालिका–३ मा २ वटा घर छन् । उनीसँग २ वटा भैंसी छन् । उनले ४ लाख ५० हजार रुपैयाँमा रसियन बेलारुसी ट्याक्टर र पिकअप गाडी ११ लाख ५० हजार खरिद गरेका छन् ।

कास्कीको शिशुवामा ६० लाख र ५० लाख रुपैयाँमा २ कित्ता जग्गा छ । व्यवसाय, जिप, ट््याक्टरलाई उनले खरिदको स्रोत देखाएका छन् । बागलुङ–११ मा ५ फरक कित्तामा अंशवण्डा नभएको जग्गा पनि छ । त्यसबाहेक थापासँग १७ तोला सुन, २ केजी चाँदी छ ।

थापाको विभिन्न बैंकमा २ लाख २५ हजार रुपैयाँ नगद मौज्दात छ । थापाको नाममा साढे १४ लाख रुपैयाँ बराबरको शेयर छ । आफ्नो नाममा ३७ लाख रुपैयाँ ऋण लिएको विवरणमा उनले उल्लेख गरेका छन् ।

सामाजिक विकासमन्त्रीको जुम्लामा सम्पत्ति

सामाजिक विकासमन्त्री सुशिला सिम्खडाको परिवारसँग ४ ठाउँमा घर छ । गोरखा, ललितपुर, नवलपुर र जुम्लामा घर छ । गोरखाको घर दाइको, जुम्लाको श्रीमानको र बाँकी दुई ठाउँको घर आफ्नो नाममा रहेको उनले विवरणमा उल्लेख गरेकी छन् ।

श्रीमानको पुख्र्यौली सम्पत्ति जुम्लाको तातोपानी गाउँपालिका–२ मा १९ रोपनी जग्गा छ । सिम्खडाको परिवारसँग सुनचाँदी छैन । उनको बैंक खातामा १ लाख ७० हजार मौज्दात छ । मन्त्री सिम्खडाको १ लाख रुपैयाँ बराबरको शेयर छ ।

वैदेशिक रोजगारीमा जाने २ जनालाई ६ लाख ७५ हजार रुपैयाँ ऋण दिएकी छन् । उनीसँग २६ हजार रुपैयाँको मोबाइल र ७ हजार रुपैयाँको घडी छ ।

कृषिमन्त्रीको कैफियत : स्टेटमेन्ट नै आएन

कृषि तथा भूमि व्यवस्थामन्त्री महेन्द्रध्वज जीसीको १३ वटा कित्तामा नवलपुर र चितवनमा जग्गा छ । उनीसँग ४० तोला सुन र २० तोला चाँदी छ । यसको स्रोत पैतृक देखाएका छन् ।

चारवटा बैंकमा मौज्दात रहे पनि रकम खुलाएका छैनन् । ‘बैंक स्टेटमेन्ट प्राप्त भएपछि उल्लेख गरिने,’ कैफियतमा उनले लेखेका छन् । कृषि विकास बैंकमा शेयर र सिटी एक्सप्रेस सहकारीमा ऋण भए पनि उनले खुलाएका छैनन् । त्यसमा पनि स्टेटमेन्ट नआएको कैफियत उल्लेख गरेका छन् ।

स्वार्जनबाट खरिद गरेको ट्याक्टर भए पनि कति पैसामा किनेको खुलाएका छैनन् । उनको सम्पत्ति विवरण हेर्दा उनले ‘विवरण बुझाएँ’ भन्नलाई मात्र फारम भरेको देखिन्छ ।

ऊर्जामन्त्रीको ९५ लाख रुपैयाँ ऋण

जलस्रोत तथा खानेपानीमन्त्री सरस्वती अर्याल तिवारीको व्यक्तिगत सम्पत्ति छैन । उनले विवरणमा श्रीमान मणिको नाममा रहेको सम्पत्ति खुलाएकी छन् ।

व्यक्ति, सहकारी र बैंकबाट आफ्नो परिवारले ९५ लाख रुपैयाँ ऋण लिएको विवरणमा उल्लेख छ । आफ्नो नाममा दुईवटा स्कुटर र श्रीमानको नाममा एउटा मोटरसाइकल छ ।

सहकारी, हाइड्रो, अस्पतालमा २ लाख ८५ हजार बराबरको शेयर मन्त्री अर्यालको परिवारको नाममा छ । अर्यालले २३ लाख नगद, २२ तोला सुन, ४० तोला चाँदी चल सम्पत्ति विवरणमा खुलाएकी छन् । मन्त्री र उनका छोराको नाममा ३ लाख ५७ हजार रुपैयाँ वित्तीय संस्थामा मौज्दात छ ।

प्रकाशित मिति: शुक्रबार, असोज ५, २०८० २०:३८