'अभागी लनामे कान्छी’: दोस्रोपटक लुटिएपछि हत्या, ‘राइड शेयरिङ’मा भागेका थिए हत्यारा

'अभागी लनामे कान्छी’: दोस्रोपटक लुटिएपछि हत्या, ‘राइड शेयरिङ’मा भागेका थिए हत्यारा

A+ A A-

गोरखाको श्यामचेत गाउँलाई बर्सेनि पहिरोले सताइरहन्छ । ठूलो पानी पर्नेबित्तिकै डाँडाबाट पहिरो खसेर स्थानीय भाग्ने अवस्था आउँछ । बर्खामा पहिरोबाट तर्सिने यो गाउँ अहिले हालै भएको एउटा जघन्य अपराधले तर्सिएको छ । आरुघाट गाउँपालिका– १, मान्बु श्यामचेतकी ७० वर्षीय सुनमाया लामाको गत २८ भदौमा आफ्नै घरमा हत्या भएको थियो ।

एक्लाे जिन्दगी काटिरहेकी सुनमायाको हत्यामा संलग्न भएको निष्कर्षसहित जिल्ला प्रहरी कार्यालय गोरखाले दुई जना युवकलाई पक्राउ गरेको छ । पक्राउ पर्नेमा श्यामचेतकै ३१ वर्षीय कर्मा छिरिङ लामा र १८ वर्षीय सुपराज लामा (साने) रहेको गोरखा प्रहरीका सूचना अधिकारी डीएसपी रमेशकुमार श्रेष्ठले शिलापत्रलाई जानकारी दिए । उनीहरू ३ असाेजमा पक्राउ परेका हुन् । प्रत्यक्ष साइनो नभए पनि एउटै गाउँको भएकाले हत्या आरोपमा पक्राउ परेकाहरूले सुनमायालाई ‘ठूलीआमा’ भन्थे ।

कसरी भयो हत्या ?

गत २८ भदौ साँझ ६ बजे सुनमाया घरमै थिइन् । दुई जना युवक उनको एककोठे कच्ची घरमा छिरे । गाउँकै छोरा–नाति घरमा आउनु सामान्य नै थियो । तर, आफूलाई लुट्न आएको सुनमायालाई मेसो नै भएन । त्यत्तिकैमा दुवैले डोरीले दुईतिरबाट घाँटी थिचेर सुनमायाको हत्या गरे । हत्या मात्रै गरेनन्, यसलाई आत्महत्या देखाउने प्रयास पनि गरे ।

घाँसदाउरा बोक्न प्रयोग हुने नाम्लो प्रयोग गरेर उनको शव घरमै झुण्ड्याए ।

घटनापछि उनीहरू भागेर धादिङ पुगेको प्रहरी अनुसन्धानबाट खुलेको छ । गाउँकै स्थानीयको साधन ‘राइड शेयरिङ’जसरी नै पैसा तिरेर उनीहरू रातारात धादिङ पुगेका थिए । श्यामचेतबाट धादिङबेँसी पुग्न सवारीमा ३ घण्टा लाग्छ ।

याे पनि..

बढिरहेछ सामान्य विषयमा हत्या शृङ्खला, 'तीनकुने घटना' पनि रिसिइबीले भएकाे आशंका

सुनमायाको कानको गहना (मुन्द्रा) धादिङ लगेर बिक्री गरेको अनुसन्धानमा संलग्न प्रहरी अधिकारीले बताए । उनले भने, ‘घटनापछि भागेर धादिङबेँसी गएर दाइ–भाउजूसँग बसेका रहेछन् । त्यसपछि त्यहीँ बजारमै सुन बेचेछन्, उनीहरूले मदिरा पिएका थिए/थिएनन्, त्यो बाइकवालाले पैसा मात्रै लिए वा संलग्नता छ भन्नेसहित अरू विषयमा हामी अनुसन्धानकै सिलसिलामा छौँ ।’

हत्याको दुई दिनपछि मात्र घटना बाहिर आएको थियो । छिमेकीले दुई दिनसम्म सुनमायालाई नदेखेपछि र घरमा गएर हेर्दा शव झुण्डिएको देखेपछि प्रहरीलाई खबर गरेका थिए । कानको लोती च्यातिएको र घटनास्थल हेर्दा आत्महत्या नदेखिएपछि प्रहरीले लुट्ने उद्देश्यसहित हत्या भएको निष्कर्ष निकालेर अनुसन्धान अघि बढाएको थियो । चोरी र लुट्ने उद्देश्यसहित सुनमायाको हत्या भएको निष्कर्ष प्रहरीको छ । हत्या आरोपमा पक्राउ परेकाहरू ज्याला-मजदुरी गर्छन् । उनीहरू काम गर्न लमजुङतिर पनि आउजाउ गर्थे ।

...त्यो दिन प्रहरी डाकेको भए

सुनमायाको घर भएको ठाउँमा १४/१५ वटा मात्र घरहरू छन् । उनको घर एकान्तमा छ । लामा समुदायको बाक्लो बस्ती रहेको श्यामचेतमा सुनमायाको हत्याभन्दा अघि एउटा घरमा चोरी भएको थियो ।

२८ भदौको घटनाभन्दा एक हप्ताजति अघि स्थानीय सुकमाया लामाको घरमा चोर पसेका थिए । त्यतिबेला उनको घरबाट पैसा चोरी भएको थियो । तर, त्यो घटना गाउँमै साम्य पारियो । घर फोर्न प्रयोग भएको सामान हेर्दा अहिले हत्या आरोपमा पक्राउ परेकाहरूकै रहेको अनुमान त्यतिबेलै थियो । तर, घरधनीले नै ४/५ हजार रूपैयाँ मात्रै चोरी भएकाले मुद्दा मामिलामा जाने इच्छा देखाइनन् ।

आरूघाट–१ का वडा सदस्य मेघबहादुर गुरुङले त्यो घटनाबारे प्रहरीलाई जानकारी नगराउँदा अहिले पछुतो लागेको सुनाए । ‘२३/२४ गतेतिरै चोरी भयो । सामान हेर्दा अहिले समातिएका केटाहरूकै थियो भन्छन् । त्यतिबेला प्रहरीकहाँ उजुरी भएन,’ उनी भन्छन्, ‘त्यतिबेला प्रहरीलाई थाहा दिएको भए र उनीहरूले चोरेको भए समातिन्थे । नभए पनि चोर्न जान डराउँथे नि !’

पहिला पनि लुटिएकी थिइन्

स्थानीयवासीका अनुसार, भूकम्पभन्दा अघि सुनमाया बुबा लनामे लामासँगै बस्थिन् । बुबा बितेपछि उनी एक्लै बस्न थालिन् । बुवाको नाम लनामे भएको र तीन सन्तानमध्ये कान्छी भएकाले सुनमायालाई गाउँले ‘लनामे कान्छी’ भनेर चिन्थे ।

लनामे कान्छी लुटिएको पहिलोपटक भने होइन । एक्लै बस्दा ५/६ वर्षअघि पनि उनी एकपटक लुटिएको आरूघाट– १ का वडा सदस्य मेघबहादुर गुरुङले बताए । ‘त्यतिबेला पनि कानकै सुन चोरी भएको थियो । कसले चोर्‍यो, थाहा भएन । प्रहरीलाई पनि भनिएन, त्यसपछि उहाँ दाइभाउजूकहाँ बस्न थाल्नुभयो,’ उनले सुनाए ।

दाइ-भाउजूकहाँ केही समय बसेपछि उनी फेरि एक्लै बसिन् । तेस्रो लिङ्गी भएकाले सुनमायाको विवाह नभएको र एक्लै बस्ने गरेकी थिइन् ।

याे पनि...

प्रकाशित मिति: शुक्रबार, असोज ५, २०८० १९:५५