शिक्षक आन्दाेलन : विद्यालय बन्द, माइतीघरमा हाजिर

A+ A A-

'हाजिर कहाँ भइरहेको छ ?,’ विद्यालय बन्द गरेर आन्दोलन गर्न काठमाडौं माइतीघर आएका एक शिक्षकले अर्को शिक्षकलाई सोधिरहेका थिए । ‘त्यहाँ पर हाजिर भइरहेको छ,’ अर्का शिक्षकले जवाफ फर्काए । शिक्षा विधेयकको विरोधमा आन्दाेलन गर्न देशभरका शिक्षक काठमाडौंमा छन् ।

विद्यालय बन्द गरेर आन्दोलनमा आएका शिक्षकको हाजिर गर्न दौडधुप देखिन्थ्यो । फाइल बोकेर बानेश्वरदेखि माइतीघरसम्म शिक्षकहरू हाजिर गरिरहेका देखिन्थे । ‘बाध्य भएर आन्दोलनमा आउनुपरेको हो । सडकमा आएर हाजिर गर्नुपर्ने हामीलाई रहर थिएन,’ काभ्रेबाट आएका शिक्षक विष्णु सापकोटाले भने । उनका अनुसार आआफ्ना पालिकाका शिक्षकहरू भेला भएर हाजिरसँगै आन्दोलन गरिरहेका छन् ।

शिक्षकको आन्दोलनका कारण विद्यालय बन्द भएको छ । सडकमा हाजिर गरिरहेका शिक्षकहरू विद्यार्थीको पढाइ दसैँलगायत अन्य बिदामा पढाएर भए पनि पूर्ति गर्ने बताउँछन् । ‘विद्यार्थीको पढाइ बिदामा पढाएर भए पनि पूरा गर्छौं । महासंघले नेतृत्व गरेको आन्दोलन हो । महासंघले जे भन्छ, त्यही गर्छौं,’ शिक्षक सापकोटाले भने ।

बानेश्वर र माइतीघरको दृश्य भने फरक थियो । बानेश्वरमा निषेधित क्षेत्र तोड्न शिक्षकहरू चर्को नारा लगाइरहेका थिए भने माइतीघर पूरै महोत्सवजस्तै देखिन्थ्यो । कोही देउडामा नाँचिरहेका थिए । कोही दोहोरीमा । हिमाल पहाड तराई आआफ्नो संस्कृतिका गीतसंगीतले माइतीघर उत्सवमय देखिन्थ्यो । तर यात्रुहरूको भने बिचल्ली भएको देखिन्थ्यो । सुत्केरीदेखि ज्येष्ठ नागरिकसम्म हिँड्न बाध्य भएका थिए ।