प्रचण्डको चीन भ्रमणः कर्णाली र भेरी कोरिडोरबारे सम्झौता हुने कर्णालीवासीको आस

प्रचण्डको चीन भ्रमणः कर्णाली र भेरी कोरिडोरबारे सम्झौता हुने कर्णालीवासीको आस

A+ A A-

संयुक्त राष्ट्रसंघको महासभामा नेपालको तर्फबाट भाग लिन अमेरिका पुगेका प्रधानमन्त्री पुष्पकमल दाहल (प्रचण्ड) आज मित्रराष्ट्र चीनको मैत्रीपूर्ण भ्रमणमा जाँदैछन् । तेस्रोपटक हुन लागेको प्रचण्डको चीन भ्रमणलाई कर्णालीले विशेष महत्त्वका साथ हेरेको छ ।

हुन त प्रचण्डले कर्णालीलाई ‘जनयुद्धको आधार इलाका’ रहेकाले कर्णाली आफ्नो प्राथमिकतामा परेको भाषण दिन थालेको भने दसक भइसक्यो । तर, प्रचण्डले कर्णालीलाई समृद्धिको बाटोमा लैजाने खालको कुनै पनि योजना अगाडि सार्न सकेका छैनन् ।

गत ४ मंसिर २०७९ मा सम्पन्न संघ र प्रदेश निर्वाचनको प्रचार प्रसारका क्रममा २२ कार्तिक २०७९ मा सत्ता गठबन्धनले कालीकोटमा आयोजना गरेको चुनावीसभालाई सम्बोधन गर्न पुगेका प्रचण्डले आफ्नो पार्टीका महेन्द्रबहादुर शाहीलाई जिताए मन्त्री बनाएर पठाउने आश्वासन दिएका थिए । ‘महेन्द्र कमरेडले मुख्यमन्त्री हुँदा राम्रो काम गर्नुभएको छ । योपटक उहाँलाई जिताएर पठाउनुस्, क्याबिनेटको मन्त्री बनाएर पठाउँछु ।’

प्रचण्डले निर्वाचनपछि बन्ने सरकारले बजेटमा कर्णालीलाई पहिलो प्राथमिकतामा राख्ने पनि आश्वासन दिएका थिए । उनले कर्णाली कोरिडोरलगायतका सडक सञ्जालको स्तरोन्नत्ति गर्ने पनि बताएका थिए ।

सोही दिन जुम्ला पुगेका प्रचण्डले तत्कालीन पाँचदलीय गठवन्धनबाट उम्मेदवार बनेकी माओवादीकी गोमा कुँवरलाई जिताएर पठाए उनलाई पनि मन्त्री बनाउने बाचा गरेका थिए । प्रचण्डले भनेअनुसार नै कालीकोटका महेन्द्रबहादुर शाही संघ र हुम्लाका जीवनबहादुर शाही प्रदेशमा विजयी भएर आए । तर, यी दुईलाई प्रचण्डले मन्त्री बनाए न त मुख्यमन्त्री नै । प्रचण्डले भने झै निर्वाचनपछि बनेको सरकारको वजेटले पनि कर्णालीलाई प्राथमिकता पारेन ।

४ भदौ २०८० मा प्रदेश राजधानी सुर्खेतको वीरेन्द्रनगरमा आयोजित प्रदेश स्थापना दिवश समारोहमा बोल्दै प्रचण्डले आफ्नो मित्रराष्ट्र चीन भ्रमणमा उत्तर–दक्षिण चीन र भारत जोड्ने रणनीतिक महत्त्वको कर्णाली र भेरी कोरिडोर निर्माणका लागि महत्त्वपूर्ण सम्झौता हुने खुलासा गरेका थिए ।

‘प्रदेशको मेरूदण्डका रूपमा रहेका टेरिटोरियल तथा कोरिडोर विकास अवधारणा, कर्णाली कोरिडोर, कर्णाली राजमार्ग, भेरी कोरिडोर, राप्ती लोकमार्ग, थारमारे चौरजहारी जुम्ला शहीद कामी बुढा मार्ग, कैलाश मानसरोबर दर्शन क्षेत्रहुँदै मुक्तिनाथ जोड्ने सडक योजना जस्ता रणनीतिक महत्त्वका योजना पूरा गर्न संघीय सरकारको तर्फबाट पूर्ण रूपमा पहल हुने यहाँहरू माझ प्रतिवद्धता जनाउन चाहन्छु ।’

प्रचण्डले भनेका थिए, ‘र अर्को आज म तपाईंहरू माझ अर्को महत्त्वपूर्ण कुरा के भन्न चाहन्छु भने लगत्तै हुन लागेको मित्रराष्ट्र चीन भ्रमणका क्रममा कर्णाली र भेरी कोरिडोर निर्माणमा महत्त्वपूर्ण सम्झौता गर्ने तयारीमा रहेको कुरा खुलासा गर्न चाहन्छु ।’

उक्त खुलासा गरेको एक महिनापछि प्रधानमन्त्री प्रचण्ड चीन भ्रमणमा पुगेका छन् । यसपटक पनि प्रचण्डले कर्णालीलाई धोका दिन्छन् या आफ्नो भ्रमणलाई सफल बनाउन मित्रराष्ट्र चीनलाई उक्त कोरिडोर बनाउन सहमत गराउँछन् भन्ने विषय अहिले कर्णालीमा चर्चा भइरहेको भए पनि कर्णालीवासी विश्वस्त भने छैनन् ।

मानव विकास सूचाङ्कको पुछारमा रहेको कर्णालीलाई समृद्धिको बाटोमा लैजानका लागि यी दुई महत्त्वपूर्ण सडक पूर्वाधारहरूको आवश्यकता छ । कर्णालीलाई हेर्ने काठमाडौं आँखा र कर्णालीको राजनीतिक चेतमा घाम लाग्न नसक्दा कर्णालीले समृद्धिको लय अझैसम्म पनि समाउन सकेको अवस्था छैन ।

प्रधानमन्त्री प्रचण्डको यसपालीको औपचारिक चीन भ्रमण विगतभन्दा फरक हुन सके मात्र उनको कार्यकालको सफलताको मापन गर्न सकिने राजनीतिक विश्लेषक पीताम्बर ढकाल बताउँछन् ।

‘शीर्ष नेताहरूमा केन्द्रिकृत चेत देखिन्छ, उनीहरू जनमत बटुल्न जे पनि बोल्दिन्छन्, तर व्यवहारमा भने गर्दैनन्,’ ढकाल भन्छन्, ‘प्रधानमन्त्री प्रचण्डले कर्णालीका लागि जति बोल्नु हुन्छ त्यो पूरा गर्ने बेला आएको छ, यदि उहाँलाई साच्चिकै कर्णाली बारे चिन्तन छ भने यसपटक केही फरक हुनसके कर्णालीका लागि मात्रै होइन देशकै लागि हित हुने मेरो ठम्याइ हो ।’

प्रकाशित मिति: शुक्रबार, असोज ५, २०८० १४:३०