सिरहादेखि पथलैयासम्मको पूर्व-पश्चिम राजमार्ग चार लेनको बनाइने

A+ A A-

पूर्व-पश्चिम राजमार्गअन्तरगत सिरहादेखि बाराको पथलैयासम्मको सडकलाई चार लेनको बनाइने भएको छ । भौतिक पूर्वाधार तथा यातायात मन्त्रालयले विश्व बैंकको ८८ अर्ब सहयोगमा सो सडक निर्माण गर्न लागेको हो ।

वि.सं. २०२१ मा तत्कालीन सोभियत संघको सहयोगमा दुई लेनको पूर्व-पश्चिम महेन्द्र राजमार्ग निर्माण भएको थियो । सोही सडकमा सिरहादेखि पथलैयासम्म चार लेनमा बिस्तार गर्ने योजनाअन्तरगत सडक फराकिलो पार्ने कार्य थालिएको पथलैया, ढल्के, कमला सडक योजना कार्यालयका प्रमुख दिपेन्द्र पाण्डेले बताए ।

पूर्व-पश्चिम राजमार्गअन्तरगत १३० किलोमिटर सडकलाई पथलैया ढल्के र ढल्केवर कमला गरी दुई प्याकेजमा विभाजन गरेर सडकको दायाँबायाँका संरचना हटाउन सुरु गरिएको उनले बताए । सडकको दायाँबायाँका घर-टहरालगायतका संरचना हटाउने, रुख कटान गर्ने, विद्युतका पोल सार्ने कामहरु सुरु गरिएको पाण्डेले जानकारी दिए ।

योजनाअन्तरगत निर्माण हुने १३० किलोमिटर सडकमा जंगल क्षेत्रसमेत पर्छ । जंगल क्षेत्रमा २७ मिटर र शहरी क्षेत्रमा ५० मिटर चौडा सडक बनाइने छ । बस्ती र शहरी क्षेत्रमा चार लेनको सडकसँगै नाला, सडकपेटीसहित साइकल लेनसमेत निर्माण गरिने छ । त्यसका लागि ठेक्का लगाई काम सुरु गरिएको पाण्डेले जानकारी दिए ।

एउटा लेन ३.५ मिटरको हुने सडकको दायाँबायाँ दुवै छेउमा रुख बिरुवा तथा फलफूल रोपिने छ । सडकको दायाँबायाँ २.५ मिटर अतिरिक्त कालोपत्रे गर्ने योजना रहेको कार्यालयले जनाएको छ । चार लेनको सडक निर्माण भइरहेकोले बागमती र कमला नदीको पुलबाहेक सानाठूला गरी ७२ पुलहरू निर्माण गरिनेछ ।

त्यस्तै पर्यावरणीय दृष्टिले संवेदनशील रहेकोले सडक वारपार गर्ने जंगली जनावरको लागि एनिमल पासब्रिज निर्माण गर्ने योजना छ । साथै पानी नेटवर्कको पाइपलाइन, विद्युत् र वातावरण संरक्षणको विविध पक्षलाई ध्यानमा राखी सडक बनाइने कार्यालयले जानकारी दिएको छ ।

सडकलाई चार लेनको बनाउँदा ३ हजार ८७१ रुख कटान हुनेछ भने एउटाको १० का दरले ३ लाख ८ हजारभन्दा बढी विरुवा रोपिने पाण्डेले बताए । दुई लेनको सडकमा हजारौँ सवारीसाधन ओहरदोहर गर्दा बढी चापका कारण दुर्घटना बढेको भन्दै चार लेनको सडक बनाएपछि सवारीसाधनहरुलाई आवतजावतमा सहज हुने विश्वास प्राविधिकहरूको छ ।

प्रकाशित मिति: बिहीबार, असोज ४, २०८० १९:०७