इलाममा दुई दिने साहित्य महोत्सव सम्पन्न

A+ A A-

इलाममा आयोजित दुई दिने साहित्य महोत्सव सम्पन्न भएको छ । साहित्यिक महोत्सवमा देश विदेशका साहित्यकार, लेखक र कलाकारहरुको उल्लेख्य उपस्थिति थियो ।

‘पर्यटनको लागि साहित्य’ भन्ने मूल नाराका साथ सञ्चालित महोत्सवमा साहित्यकार, कलाकारदेखि राजनीतिज्ञहरुले विभिन्न शीर्षकमा बहस गरेका थिए ।

साहित्यको माध्यममबाट इलामलाई चिनाउने उद्देश्यले महोत्सव आयोजना गरिएको हो । महोत्सवमा पाँच सय बढी साहित्यकारहरु इलाम भित्रिएको आयोजक इलाम साहित्य समाजका सचिव रोशन राईले जानकारी दिए ।

कार्यक्रमको पहिलो दिन आलोचनात्मक चेत र लोकतन्त्रबारे वक्ता प्रा.डा. संजीव उप्रेती, सत्ता कि प्रतिपक्ष शीर्षकमा वक्ताहरु श्रवण मुकारुङ, मोमिला जोशी, मनु मञ्जील र सहजकर्तामा विमल वैद्य, ‘अ’ मा अल्झेको इलाम विषयमा वक्ताहरु युद्धप्रसाद वैद्य, महेश बस्नेत, विष्णु निष्ठुरी र सहजकर्तामा केदार शर्माले बहस गरेका थिए ।

त्यस्तै, मानकमाथि प्रश्न विषयमा मुख्य वक्ता राजन मुकारुङ, मिश्र वैजन्ती, उज्वल प्रसाई र सहजकर्ता महेश पौडेलले प्रस्तुती दिएका थिए । अधिकारको पेवा सन्दर्भ विचारमा मुख्य वक्तामा जेवी विश्वकर्मा, सीमा आभास, कृष्ण धराबासी र सहजकर्तामा समीरबाबु कट्टेलले प्रस्तुती दिएका थिए ।

महोत्सवमा साहित्यको पछिल्ला आन्दोलनहरुको सन्दर्भमा उन्मुक्त पुस्ता, फरक आयाम, कुकुर कविता लगायतका विषयमा मुनाराज शेर्माले बहस चलाएका थिए । यस्तै सिनेमा र सन्देश शीर्षकमा वक्तामा प्रकाश आङदेम्बे, दिनेश डिसी र स्वस्तीमा खड्का साथै सहजकर्तामा सुरेन्द्र राई रहेका थिए ।
पछिल्लो समय इलाममा साहित्यिक कार्यक्रमहरु सुस्ताईरहेको अवस्थामा पुनःजागरणसहित कार्यक्रम गरिएको आयोजकले जनाएको छ । यसअघि यस्तै किसिमको कार्यक्रम देउमाई नगरपालिकाको मंगलबारेमा समेत भएको थियो ।

प्रकाशित मिति: आइतबार, असोज ५, २०७६ २०:२६