गाउँपालिका र पर्यटन विकास समितिले जिम्मा लिएपछि २ हजार पर्यटकलाई रामारोशन जान अनुमति

गाउँपालिका र पर्यटन विकास समितिले जिम्मा लिएपछि २ हजार पर्यटकलाई रामारोशन जान अनुमति

A+ A A-

अछामको चर्चित पर्यटन गन्तव्य रामारोश जान रोकिएका विभिन्न ३५ मुलुकका दुई हजार पर्यटकलाई त्यहाँ जान अनुमति दिइएको छ । रामारोशन गाउँपालिका र रामारोशन पर्यटन विकास समितिले जिम्मा लिने भएपछि पर्यटकलाई जान अनुमति दिइएको हो ।

रेन्बो ग्यादरिङका लागि भन्दै ठूलो संख्यामा विदेशीहरू रामारोशन जान थालेपछि सुरक्षा चासो भन्दै स्थानीय प्रशासनले उनीहरूलाई रोकेको थियो । प्रमुख जिल्ला अधिकारी शरद कुमार पोखरेलले पर्यटन मन्त्रालयको अनुमति लिएका पर्यटकलाई रामारोशन जान दिइएको शिलापत्रलाई जानकारी दिए । उनले फोनमा भने, ‘भिसा भएका, पर्यटन मन्त्रालयले त्यहाँ जान अनुमति दिएका पर्यटकलाई जान दिने भन्ने भएअनुसार हामीले सहजीकरण गरेका छौँ ।’

स्थानीय प्रशासनले रोकेपछि रामारोशन गाउँपालिका र रामारोशन पर्यटन विकास समितिले उनीहरूलाई रामारोशन आउन दिन भन्दै पर्यटन मन्त्रालय र गृह मन्त्रालयलाई पत्र लेखेका थिए । जिल्ला प्रशासन कार्यालयले पनि त्यहाँको अवस्था जनाएर गृह मन्त्रालयलाई पत्र लेखेको थियो । गाउँपालिका र पर्यटन विकास समितिले रेन्बो ग्यादरिङ कार्यक्रमलाई आफूहरूले अपनत्व लिने बताएपछि सुरक्षा अवस्था बुझेर उनीहरूलाई त्यहाँ जान दिने गृह मन्त्रालयले बताएपछि आज उनीहरूलाई रामारोशन जान दिइएको हो । प्रजिअ पोखरेलले भने, ‘गाउँपालिका र पर्यटन विकास समितिले हामी जिम्मा लिन्छौँ भनेपछि हामी यातायातमा सजीकरण गरेका छौँ । सुरक्षाको कुरा सुरक्षा योजना अनुसारै हुन्छ ।’

सामाजिक सञ्जालमार्फत रामारोशन जाने भन्दै बुछवलका सुनज खनालले आह्वान गरेको र त्यसपछि भारत, युरोप, अमेरिकालगायतका मुलुकबाट २ हजार पर्यटक एक महिना बस्ने गरी रामारोशन जान लागेको बताइएको छ । उनीहरूले त्यहाँ मेडिटेसन, म्यूजिकलगायतका कार्यक्रम गर्ने योजना बनाएको समेत जनाइएको छ ।

प्रकाशित मिति: बुधबार, असोज ३, २०८० १६:३३