देशमा भ्रष्टाचार र तस्करीको पराकाष्ठा छः मदनकृष्ण श्रेष्ठ

वरिष्ठ कलाकार मदनकृष्ण श्रेष्ठले देशमा भ्रष्टाचार र तस्करीको पराकाष्ठा भइरहेको टिप्पणी गरेका छन् ।

मंगलबार संविधान दिवस २०८० को अवसरमा चलचित्र विकास बोर्डमा आयोजित सम्मान तथा पुरस्कार वितरण समारोहमा श्रेष्ठले अहिले पहिलाको दाँजोमा नराम्रो कामले जितेको दाबी गरे ।

अहिले भ्रष्टाचार, अत्याचार, नातावाद, कृपावाद पहिलाको भन्दा बढेको भन्दै श्रेष्ठले दुःख व्यक्त गरे । अहिले विकृति झनै मौलाइरहेकोप्रति उनले चिन्ता व्यक्त गरे ।

‘अहिले भ्रष्टाचारको पराकाष्ठा भइरहेको छ । तस्करको पराकाष्ठा भइरहेको छ । पहिलाको दाँजोमा नराम्रो कामले धेरै जितेको छ,' श्रेष्ठले भने, 'त्यो बेला सबै राम्रो होइन तर त्यो बेला पनि भ्रष्टाचार, अत्याचार, नातावाद, कृपावाद थियो । त्यति पनि अब हुँदैन भन्ने लाग्यो । तर अहिले झनै धेरै विकृति बढ्यो ।'

मंगलबार संविधान दिवस २०८० को अवसरमा चलचित्र विकास बोर्डमा आयोजित सम्मान तथा पुरस्कार वितरण समारोह २०८० लाई सम्बोधन गर्दै केसीले चलचित्र आम सञ्चारको माध्यम भएकाले समाजमा जागरण ल्याउन यसको महत्त्वपूर्ण भूमिका हुने बताए ।

अहिले अवार्ड पाउँदा आफूले गरेका काममा स्याबासी पाएको महशुस भएको उनको भनाइ छ ।

'पहिला अवार्ड पाउँदा एकदम अवार्ड पाएँ र जिम्मेवारी पाएँ जस्तो लाग्थ्यो । अबचाहिँ पैसा आउने पुरस्कार दिएको जस्तो लाग्दो रहेछ । २५ हजार पनि छ रे नत्र पहिला कागज मात्रै आउँथ्यो,' श्रेष्ठले भने, 'कागज लियो, दंग परेर गयो । अहिले पैसा देखिँदा मजा आयो । अहिले पुरस्कार लिँदा आफूले गरेका काम ठिकै रहेछ र स्याबासी पाएको जस्तो लाग्यो ।’

संविधान दिवस २०८० को अवसरमा कलाकारिताको क्षेत्रबाट समाज र देशमा योगदान पुर्‍याएका कलाकारहरू मदनकृष्ण श्रेष्ठ, वसुन्धरा भुसाल, दयाराम दाहाल, रेखा थापा, दीपाश्री निरौला लगायतका कलाकारहरूलाई सम्मान तथा पुरस्कार वितरण गरिएको हो ।

प्रकाशित मिति: मंगलबार, असोज २, २०८० २०:११