कांग्रेसलाई कार्ययोजना र कार्यतालिकाअनुसार नै चलाउनुपर्नेमा शेखर समूहको जोड

A+ A A-

नेपाली कांग्रेसका नेता डा. शेखर कोइराला समूहले पार्टीलाई अघिल्लो केन्द्रीय समिति बैठकले बनाएको कार्ययोजना र कार्यतालिकाअनुरुप नै चलाउनुपर्नेमा जोड दिएको छ ।

मंगलबार बालुवाटारमा बसेको कोइराला पक्षधर नेताहरूको बैठकले पार्टीलाई अघिल्लो केन्द्रीय समिति बैठकले बनाएको कार्ययोजना र कार्यतालिका अनुरुप चलाउनुपर्नेमा जोड दिएको हो ।

‘सांगठनिक रूपमा कार्यतालिका र कार्ययोजनाअनुसार पार्टी अगाडि बढीरहेको छ । एक चरणको कार्यक्रम पूरा भइसकेको छ । अब यसको समीक्षा गर्नुपर्छ र कार्यतालिका र कार्ययोजनालाई निरन्तर रूपमा अगाडि बढाउनुपर्छ,' बैठकपछि सञ्चारकर्मीहरूसँग कुरा गर्दै नेता दिलेन्द्रप्रसाद बडूले भने, 'त्यसले नै पार्टीलाई चलायमान बनाउँछ । सबै संरचनालाई चलायमान बनाउनुपर्छ त्यसलाई कुनै किसिमले अवरुद्ध गर्न दिनु हुँदैन ।'

कांग्रेसको असोज ४ गतेदेखि हुने केन्द्रीय कमिटी बैठकमा आफ्नो समूहका तर्फबाट एजेण्डा तय गर्न बसेको बैठकले कार्यतालिकाअनुसार सांगठनिक गतिविधि भए/नभएको समीक्षा गर्दै सो तालिका र कार्ययोजनालाई निरन्तरता दिनुपर्ने निष्कर्ष निकालेको छ ।

'पछिल्लो कार्यसमितिबाट पारित गरिसकेको कार्ययोजना र कार्यतालिका त्यसको समीक्षा हुनुपर्‍यो । कति कार्यान्वयन भयो कति भएन । के कमी रह्यो ? र त्यसलाई कसरी सुधारेर जाने भन्ने नै मुख्य विषय त्यो नै हो,’ उनले भने ।

बडूले असोज ४ देखि हुने पार्टीको केन्द्रीय समिति बैठकको एजेण्डाको विषयमा छलफल केन्द्रित भएको बताए । पार्टीलाई चलायमान बनाउन पार्टीले अवलम्वन गरेको कार्यतालिकालाई अवरुद्ध गर्नु नहुने र त्यसलाई निरन्तरता दिनुपर्नेमा आफूहरूको मत रहेको बडूको भनाइ छ ।

आगामी दिनमा हुने पार्टीको नीति अधिवेशनलाई व्यवस्थित गर्न गर्नुपर्ने तयारीको सम्बन्धमा पनि छलफल भएको उनले जानकारी दिए ।

'नीति अधिवेशनको रूपमा महासमिति बैठक बोलाउने कुरा गरेका छौँ । महासमिति बैठकलाई व्यवस्थित गर्नका लागि के–कस्तो तयारी गर्नुपर्छ भन्ने कुरा भयो,' बडूले भने, 'उपसभापति र महामन्त्रीले गर्नुपर्ने तयारीका लागि सुझाव दियौँ ।'

आगामी १५औँ महाधिवेशनको तयारीको सम्बन्धमा पनि छलफल भएको बडूको भनाइ छ । 'समयमा हाम्रो १५औँ महाधिवेशन सुरु गर्नुपर्ने हुन्छ । त्यसका निमित्त पनि हामीले आवश्यक तयारी र क्रियाशील सदस्यताको वितरणको कुरा र त्यसको अध्यावधिक रेकर्डहरू के छ त्यसलाई हेर्नुपर्छ,' बडूले भने ।

नेता बडूले सरकारको काममा सन्तोष गर्नुपर्ने स्थिति नरहेको भन्दै सरकारको कामको सम्बन्धमा पनि पार्टी केन्द्रीय समिति बैठकमा समीक्षा हुने बताए ।

बैठकमा डा. शेखर कोइरला, उपसभापति धनराज गुरुङ, महामन्त्री गगन थापा, सहमहामन्त्रीद्वय जीवन परियार र बद्री पाण्डे, नेता मिनेन्द्र रिजाल लगायतको उपस्थिति थियो ।

प्रकाशित मिति: मंगलबार, असोज २, २०८० १८:१६